SALMOS 113 - Dios Rimashca Shimicunami

SALMO 113 Taita Diosmi huajchacunataca alli nishca canapi churan

Mandaj Diosta alabaichigari.

¹ Mandaj Diospajta rurajcuna paitaca alabaichigari. Mandaj Diospaj shutita alabaichigari.

² Mandaj Diospaj shutica alli nishca cachun. Cunanmantapacha huiñai huiñaita alli nishca cachun.

³ Mandaj Diospaj shutitaca, inti llujshin ladomanta inti huashicun ladopi causajcunacama alabashca cachun.

⁴ Mandaj Diosca tucui llajtacunapaj jahuapimi. Pai jatun canaca jahua pachacunapaj jahuapimi.

⁵ Mandaj Dios, ñucanchij Taita Dios shinaca ¿pitaj tiyangari? Pai shina jahuajman tiyacujca ¿pitaj tiyangari?

⁶ Paica jahua pachatapish cumurishpami ricucun. Paica cai pachatapish cumurishpami ricucun.

⁷ Paimi huajchataca ñutu allpamanta jatarichin. Paimi ima illajtapish ima illaj canamanta jatarichin.

⁸ Jatun mandajcunahuan tiyachingapajmi chashna ruran. Paipaj cajcunata mandajcunahuan tiyachingapajmi chashna ruran.

⁹ Paimi mana huachaj huarmitaca familiayujta ruran. Huahuacunayujta rurashpami cushichin. ¡Mandaj Diosta alabaichigari!