SALMOS 112 - Dios Rimashca Shimicunami

SALMO 112 Mandaj Diosta manchajcunaca tucuipimi ashtahuan ashtahuan alli llujshin

Mandaj Diosta alabaichigari.

¹ Mandaj Diosta manchaj runaca cushichishcami. Pai mandashcacunapimi jatunta cushicun.

² Paipaj huahua huahuacunaca cai pachapica imatapish rurai tucujcunami canga. Ima pandata mana rurajcunapaj huahua huahuacunaca alli nishcami canga.

³ Paipaj huasipica, achca charinacunami tiyan. Pai cashcata ruranaca huiñaipajmi canga.

⁴ Cashcata rurajcunapajca amsapi luzta japichishca shinami. Paica llaquijmi, cujmi, cashcata rurajmi.

⁵ Alli runaca llaquijmi, imatapish mañachijmi. Paipaj ima ruranacunapipish cashcata rurashpami mandan.

⁶ Chaimanta paica manataj lluchcaringachu. Cashcata ruraj runataca huiñaipaj yuyaricungallami.

⁷ Llaquicunami shamugrin nishpa huillajpipish, paica mana manchangachu. Mandaj Diospi paipaj shunguta churashpami imata mana manchashpa causanga.

⁸ Paipaj shungupica, imata mana manchangachu. Paita p'iñajcunata pai munashca shina tucujta ricungacamami mana manchanga.

⁹ Paica chaupijmi, huajchacunaman cujmi. Paipaj cashcata ruraj canaca huiñaipajmi canga. Pai tucuita rurai tucuj cashcataca yallitaj jatunyachishcami canga.

¹⁰ Millai runa chaita ricushpaca, yallitajmi p'iñaringa. Quirucunata canirishpami chingaringa. Diosta mana rijsijcunapaj munaica chingarigringami.