SALMOS 111 - Dios Rimashca Shimicunami

SALMO 111 Taita Diosca paipaj cajcunataca cuidanmi

Mandaj Diosta alabaichigari.

¹ Mandaj Diostaca tucui shunguhuanmi alabasha. Ima pandata mana rurajcunapaj tandanacuipimi paicunahuan alabasha.

² Mandaj Diospaj rurashcacunata mashcajcunapajca, Mandaj Dios imalla rurashcacunaca jatunmari.

³ Pai imalla rurashcacunaca jatun sumajmari. Pai cashcata ruranaca huiñaipajmari.

⁴ Mandaj Diosca mana cungaripaj mancharinacunatamari rurashca. Mandaj Diosca llaquijmari, c'uyajmari.

⁵ Paita manchajcunamanca micunata cujmi. Pai imata ari nishcataca manataj cungaringachu.

⁶ Paipaj cajcunamanca tucuita rurai tucuj cashcatami ricuchirca. Shujtajcunapaj llajtata quichushpa cushpami chashna ricuchirca.

⁷ Paipaj maquihuan rurashcacunaca ima mana yangallachu. Imapish chashnataj allitaj rurashcacunami. Tucui pai mandashcacunaca shunguta churanami.

⁸ Chai mandashcacunaca huiñaipaj sinchita churashcamari. Chaica mana panda chashnataj cachun churashcamari.

⁹ Paipaj cajcunamanca quishpirinatamari cachashca. Paicunahuanca huiñaipajmari shuj ruranata ari nirca. Paipaj shutica ima jucha illaj, manchanamari.

¹⁰ Yachaipaj callarica, Mandaj Diosta manchanami. Pai mandashcacunata rurashpa causajcunaca alli yuyaicunatami charincuna. Mandaj Diosta alabanaca huiñaipajmi.