SALMOS 110 - Dios Rimashca Shimicunami

SALMO 110 Mandaj Diosmi jatun mandajmanca cazuchij canata cun

David rurashca Salmomi.

¹ Mandaj Diosca ñucata mandajtaca: “Quiquinta p'iñajcunata quiquinpaj chaqui sarunapi churangacama ñuca alli ladopi tiyarilla” nircami.

² Quiquin mandai tucuna varataca Mandaj Diosmi Sionmanta cachanga. Quiquinta p'iñajcunapaj chaupipimi cazuchishpa mandacungui.

³ Quiquinpaj cajcunaca quiquin mandacui punllapica, paicuna quiquinllatajmi quiquinman curingacuna. Quiquin jucha illaj sumaj cashcapimi curingacuna. Pacari shullahuan cada tutamanta mushujyaj shinami punllanta mushujllataj canguilla.

⁴ Mandaj Diosca paipaj shimihuantajmi: “Melquisedec cura cashca shinallataj, quiquinca huiñaipaj curami cangui” nirca. Chaitaca mana p'aquingachu.

⁵ Jatun Diosca quiquinpaj alli ladopimari. Pai p'iñari punllapica jatun mandajcunataca ñutungamari.

⁶ Paimi llajtacunapi causajcunataca paicuna ima shinalla rurashca shinallataj ricuchinga. Chaimantaca huañushcacunataca montonandijmi shitanga. Tauca llajtacunapaj jatun mandajcunatami chingachinga.

⁷ Ñan c'uchuta ricuj yacutami ubyanga. Chaita ubyashpami fuerzata japinga.