SALMOS 11 - Dios Rimashca Shimicunami

SALMO 11 Cashcata ruraj miticunami

Tonota alli yachaj cantachichun, David rurashca Salmomi.

¹ Ñucaca Mandaj Diospimi shunguta churani. Ñucataca maitataj: “Pajarocuna shina urcucunapi miticugri” ninguichigari.

² Millaicunaca puntajlla caspita arcopi churashpami shayacuncuna. Paicunaca arcota chutashca shitanajllami shayacuncuna. Alli shungucunata pacallamanta shitashpa huañuchingapajmi shayacuncuna.

³ Callaripi churashca rumicuna ñuturijpica, cashcata rurajca ¿imatashi ruranga? ninguichijmi.

⁴ Mandaj Diosca paipajlla huasipimi. Mandaj Diosca jahua pachapimi paipaj jatun tiyanataca charin. Mandaj Diosca huañujlla runacunataca tucuicunatami allita rurajta, mana allita rurajta alli ricucun.

⁵ Mandaj Diosca allita ruraj cajta, mana allita ruraj cajta ricunrajmi. Millaita ruranata c'uyajtaca p'iñanmi.

⁶ Mandaj Diosca millaicunapaj jahuapica, rupachij llaquitami tamyachinga. Paicuna japina cashca copataca azufrehuan rupacuj ninata, ima tiyashcata rupachij huairatami cunga.

⁷ Mandaj Diosca cashcata rurajmi. Cashcata ruranata c'uyajmi. Cashcata ruraj runami paipaj ñahuitaca ricunga.