SALMOS 109 - Dios Rimashca Shimicunami

SALMO 109 Millaicunata llaquichichun mañashcami

Tonota alli yachaj cantachichun, David rurashca Salmomi.

¹ Ñuca alabana Taita Dioslla, ama upajlla caichu.

² Quiquinta mana rijsij runapish, umaj runapish ñucata p'iñashpamari rimancuna. Ñucamantaca llulla c'alluhuanmi rimancuna.

³ P'iñashpa rimashca shimicunahuanmi ñucataca muyunchircacuna. Manapish imata rurajpimi ñucataca llaquichircacuna.

⁴ Ñuca paicunata c'uyashcamantaca, p'iñashpamari cutichincuna. Ashtahuanpish paicunamantaca quiquintamari mañaj carcani.

⁵ Paicunapaj allita rurashcamantaca, millaita rurashcahuanmi ñucamanca cutichincuna. Paicunata c'uyashcamantaca, p'iñashcahuanmi cutichincuna.

⁶ Paipaj jahuapica Diosta mana rijsij runata churahuai. Paipaj alli maqui ladomanca Satanás cashca cachun.

⁷ Pai ima shina cashcata ricuj ricujpica, juchachishca llujshishca cachun. Taita Diosta pai mañacushcapish jucha ricurishca cachun.

⁸ Paipaj causaica ashacamalla cachun. Pai imata ruranataca shujtaj runa japishca cachun.

⁹ Paipaj huahuacunapish yaya mama illaj saquirishca cachun. Paipaj huarmipish viuda saquirishca cachun.

¹⁰ Paicunapaj huahuacunaca puricujllacuna cashca cachun. Mañashpalla causajcuna cashca cachun. Paicunapaj urmachishca huasicunamanta llujshishpa, carucunapi micunata mashcajcuna cachun.

¹¹ Pai tucui imalla charishcatapish paiman cullquita mañachij japishca cachun. Pai trabajashpa imalla charishcatapish, shujtaj llajtacunalla apashca cachun.

¹² Paicunata llaquijca pi ama tiyashca cachun. Yaya mama illaj paipaj huahuacunata llaquijpish pi ama tiyashca cachun.

¹³ Paipaj huahua huahuacunapish chingachishca cachun. Q'uipa huahua huahuacunapica paipaj shutica p'ichashca cachun.

¹⁴ Paicunapaj yayacuna millaita rurashcaca Mandaj Diospaj yuyaimantaca amataj anchushca cachun. Paipaj mamapaj juchatapish, amataj p'ichashca cachun.

¹⁵ Chai juchacunaca, Mandaj Diospaj ñaupajpi huiñaita cashca cachun. Pai tiyashca cashcataca cai pachapica nunca pi ama yuyarishca cachun.

¹⁶ Llaquij cana cashcataca mana yuyarircachu. Llaquihuan caj, ima illajlla cajcunataca catirashpami llaquichirca. Shungu p'aquirishcacunata huañuchingapajmi chashna rurarca.

¹⁷ Imapish tucushca canman nij canatami c'uyaj carca. Chaica paipaj jahuallapitajmi urmarca. Alli cashca cachun nij canataca mana munarcachu. Chaimantami alli cashca cachun nij canaca paimantaca tucui anchurirca.

¹⁸ Imapish tucushca canman nij canataca churanata shinami churarishca carca. Chaica paipaj aichapica, yacu shinami yaicurca. Paipaj tullucunapipish aceite shinami yaicurca.

¹⁹ Chashna canataca churanata churarishca shina cachun. Chumbipaj randica llaquicunahuan huiñaipaj chumbillirishca cachun.

²⁰ Mandaj Diosca ñucata p'iñajcunamanca, chashna llaquicunata cushca cachun. Ñucata p'iñashpa millaita rimajcunaca chashna tucushca cachun.

²¹ Quiquinca ñuca Mandaj Diosmi cangui. Ñuca Jatun Diosmi cangui. Quiquinpaj shutita c'uyashcamanta ñucapaj allita rurapai. Quiquin llaquij cashcaca allimari, quishpichihuayari.

²² Ñucaca llaquichishca ima illajllamari cani. Ñuca shungupish tucui chugririshcamari cani.

²³ Llandu chingaricuj shina chingaricunica. Langosta c'uru shina huaira apanalla tucunica.

²⁴ Ayunacushpallamari ñuca cunguricunaca chujchucuj tucuni. Ñuca aichaca chingarinmari, tucuimari irquiyani.

²⁵ Ñucaca paicuna asina tucushcanica. Paicuna ñucata ricushpaca umata cuyuchishpamari chanzata rurarcacuna.

²⁶ Mandaj Dios, ñuca Taita Dioslla, ayudahuayari. Quiquin llaquij cashca shinallataj quishpichihuayari.

²⁷ Chashna rurajpica quiquinpaj maqui rurashcata entendichuncuna. Quiquin Mandaj Dios chaita rurashcata entendichuncuna.

²⁸ Paicuna ñucata imapish tucushca cachun nijpipish, ashtahuanpish quiquinca ñucataca alli cashca cachun niyari. Paicuna ñucata llaquichinaman jatarishpapish pingai tucushpallami saquiringacuna. Ashtahuanpish quiquinpajta rurajtaca cushichiyari.

²⁹ Ñucata p'iñajcunaca yanganchishca canahuan churarishca cachun. Jahua churanaca musparishca canahuan churarishca cachun.

³⁰ Ñuca shimihuanca Mandaj Diostami achcata pagui nishpa alabasha. Achcacuna tandanacushcapimari alabasha.

³¹ Paica huajchacunapaj alli ladopimari shayaringa. Huañuchijcuna huañunami cangui nijpipish quishpichijmi.