SALMOS 108 - Dios Rimashca Shimicunami

SALMO 108 P'iñajcunata llaquichichun Taita Diosta mañashcani

Cantanapaj David rurashca Salmomi.

¹ Taita Dioslla ñuca shunguca quiquinta cantanajllamari. Salmocunata tononchishpami cantasha. Chaimari ñuca cushicunaca.

² Salteriopish, arpapish rijcharichigari. Mushuj punllatapish rijchachishami.

³ Mandaj Dioslla, quiquintaca gentecunapaj chaupipimi alabasha. Llajtacunapaj chaupipimi quiquintaca salmocunata cantasha.

⁴ Quiquin llaquij cashcaca jahua pachatapish yalli mana tucuripajmari. Quiquinpaj mana llullaca jahua pachacamamari.

⁵ Taita Dioslla, jahua pachapipish jatunyachishca caiyari. Quiquinpaj sumaj cashcataca cai pachapipish jatunyachishca caiyari.

⁶ Quiquin c'uyashcacuna quishpirishca cachun ñuca mañashcata cutichihuayari. Quiquinpaj alli lado maquihuan quishpichihuayari.

⁷ Taita Diosca paipajlla ucupica cashnami nirca: “Ñucaca cushicushami. Siquem llajtataca chaupishami. Sucot pugru pambataca medishami.

⁸ Galaadca ñucapajmi. Manasesca ñucapajmi. Efrainca ñuca umata pacajmi. Judaca ñuca mandana varami.

⁹ Moabca, ñuca maillarina bateami. Edompica ñuca pargatetami shitasha. Filisteapica ñuca mishashpami cushicusha” nircami.

¹⁰ Muyundij sinchi pircayuj pueblomanca ¿pitaj ñucataca pushangari? Edom llajtacamaca ¿pitaj ñucataca pushangari?

¹¹ ¿Ñucanchijta shitaj Taita Diostaj shina cangui? ¿Manachu ñucanchij soldadocunahuan llujshij cangui?

¹² P'iñajcunata mishangapaj ayudahuai. Gentecunapaj ayudaca yangallami.

¹³ Taita Dioshuanca mancharinacunatami rurashun. Ñucanchijta p'iñajcunataca paimari sarunga.