SALMOS 107 - Dios Rimashca Shimicunami

SALMO 107 LIBRO V (Salmos 107–150 ) Taita Diosmi llaquimanta llujshichin

¹ Mandaj Diosta alabaichij. Paica allimari. Pai llaquij canaca huiñaipajmari.

² Mandaj Dios quishpichishcacuna, p'iñajcunapaj maquimanta pai llujshichishcacuna,

³ llajtacunamanta tandanacushcacuna, inti llujshin ladomanta, inti huashicun ladomanta, janaj ladomanta, ura ladomanta tandanacushcacuna chashna nichigari.

⁴ Shitashca pambapi, chingarishcacunami purircacuna. Shitashca pambapimi ñanta mashcashpa purircacuna. Maipi causana pueblotapish mana japircacunachu.

⁵ Paicunaca yaricaihuan, yacunaihuan huañucujmi carcacuna. Causana cashcataca mana yuyashpami puricurcacuna.

⁶ Chashna llaquipi cashpamari, Mandaj Diostaca c'uyaillata mañarcacuna. Chaimi chai llaquicunamanta llujshichirca.

⁷ Paimi paicunataca alli ñanta pusharca. Causanalla puebloman chayangacamami pusharca.

⁸ Mandaj Dios llaquij cashcataca alabaichigari. Huañujlla runacunapaj mancharinacunata pai rurashcata alabaichigari.

⁹ Paica ima illajlla cajman cujmi. Yaricaihuan cajman pajtata carajmi.

¹⁰ Maijancunaca amsapimi causarcacuna. Huañunalla amsapimi causarcacuna. Cadenacunahuan huatashca, llaquinayajtami prezu causacurcacuna.

¹¹ Mandaj Dios rimashcacunata c'ariyashcamanta, jahua pacha Taita Dios cunashcata c'ariyashcamantami chashna carcacuna.

¹² Chaimantami sinchi trabajocunahuan paicunapaj shungutaca cumurichirca. Urmajpipish pi jatarichij mana tiyarcachu.

¹³ Llaquipi cashpami Mandaj Diostaca c'uyaillata mañarcacuna. Chaimi chai llaquicunamanta llujshichirca.

¹⁴ Amsamantami llujshichirca. Huañunalla amsamantami llujshichirca. Huatashcacunatapish p'itircami.

¹⁵ Mandaj Dios llaquij cashcataca alabaichigari. Huañujlla runacunapaj mancharinacunata pai rurashcata alabaichigari.

¹⁶ Bronce pungucunatapish p'aquircami. Fierro aldabacunatapish ñuturcami.

¹⁷ Yuyai illajcunaca llaquichishcacunami tucurcacuna. Paicuna c'ariyaj ñanpi purishcamantami llaquichishca tucurcacuna. Paicuna millaita rurashcamantami chashna tucurcacuna.

¹⁸ Micunacunatapish mana millpui tucurcachu. Huañuipish pungullapimi carca.

¹⁹ Llaquihuan cashpami, Mandaj Diostaca c'uyaillata mañarcacuna. Chaimi chai llaquicunamanta llujshichirca.

²⁰ Pai rimashca shimillahuan paicunata alliyachishpami, huañuimanta llujshichirca.

²¹ Mandaj Dios llaquij cashcataca alabaichigari. Huañujlla runacunapaj mancharinacunata pai rurashcataca alabaichigari.

²² Animalcunata huañuchishpa cushpa pagui nichigari. Pai imalla rurashcacunataca jatun cushicuihuan huillaichigari.

²³ Mama cuchapi barcopi caiman chaiman purijcunami, achca yacu jahuata c'atushpa randishpa, caiman chaiman purijcunami,

²⁴ paicunami Mandaj Dios mancharinacunata rurashcataca ricurcacuna. Yacu ucupi mancharicunata rurashcacunatami ricurcacuna.

²⁵ Pai rimashpaca jatun huairatami jatarichirca. Mama cuchataca caiman chaimanmi cuyuchirca.

²⁶ Chai yacuca jahuajta shitashpami cutin allpaman siquiyajta pambarca. Paicuna millaita rurashcahuanmi yacuyacuj shina tucuncuna.

²⁷ Chujchuncunami, machashca shinami batsaj nincuna. Paicuna alli yachaj cashcapish yangallami tucurca.

²⁸ Llaquipi cashpami, Mandaj Diostaca c'uyaillajta mañancuna. Chaimi chai llaquicunamanta llujshichirca.

²⁹ Paimi huairandij tamyatapish parachirca. Paimi caiman chaiman cuyuricuj yacutapish casijllata saquirca.

³⁰ Yacu casijlla tucushca q'uipaca, cushicuncunami. Chashnami Taita Diosca barcocuna shayarina, paicuna chayashun nicushcaman chayachin.

³¹ Mandaj Dios llaquij cashcataca alabaichigari. Huañujlla runacunapaj mancharinacunata pai rurashcataca alabaichigari.

³² Tucuicuna tandanacushcapi paita jatunyachichigari. Cunaj yuyajcuna tandanacushcapi paitaca alabaichigari.

³³ Paica jatun yacutapish shitashca pambata shina chaquichinllami. Pugyucunatapish chaquichinllami.

³⁴ Alli granota p'ucuj allpacunatapish mana p'ucuj cachi allpata ruranllami. Chaipi causajcuna millaicuna cajpimi chashna ruran.

³⁵ Shitashca pambacunapipish yacu cuchata ruranllami. Chaquishca allpatapish jatun yacu llujshicujta ruranllami.

³⁶ Yaricaihuan cajcunataca chaipimi churan. Chaipimi paicunaca pueblocunata rurashpa causancuna.

³⁷ Allpacunapica tarpuncunami. Uvacunatami tarpuncuna. Alli granocunatami p'ucun.

³⁸ Taita Diosca paicunataca alli ninmi, yallitaj achcatami mirachin. Paicunapaj animalcunatapish mana ashallayachinchu.

³⁹ Chashna cashpapish ashallayarcacunami, llaquichishcami carcacuna. Millaicuna yallitaj llaquichijpi muspachijpimi chashna tucurcacuna.

⁴⁰ Llaquichij mandajcunataca mana ricunachinchu. Paicunataca chingarishca, ñanpish illaj puricujlla cachunmi churan.

⁴¹ Ashtahuanpish huajchacunataca, ima illaj canamantami jatarichin. Oveja canllata shinami achca familiata ruran.

⁴² Cashcata rurajcunaca chaita ricushpaca cushicushca cachun. Tucui millaicunaca, shimicunata huichcashca cachun.

⁴³ Maijanpish yachaisapa cashpa chaicunata huaquichijca, Mandaj Dios llaquij cashcatami entendinga.