SALMOS 106 - Dios Rimashca Shimicunami

SALMO 106 Israelcuna Taita Diosta mana cazushcami

¹ ¡Taita Diosllata alabashunchigari! Mandaj Diostaca alabaichigari. Paica allimari. Paipaj llaquij canaca huiñaipajmari.

² Tucuita rurai tucuj Mandaj Dios rurashcacunataca tucuitatajca ¿pitaj huillai tucungari? Pai munashca shinataj alabanataca ¿pitaj huillai tucungari?

³ Taita Dios mandashcacunapi nishca shina rurajcunaca cushichishcacunami. Tucui paicunapaj causaipi cashcata rurajcunaca cushichishcacunami.

⁴ Mandaj Dioslla ñucata yuyarihuayari. Quiquin agllashcacunapaj allita ruracushpaca ñucatapish yuyaripanguiyari. Paicunapaj quishpichinata apamushpaca ñucapajpish apamupanguiyari.

⁵ Quiquin agllashcacunapaj allita rurashcata ñuca ricungapaj apamupayari. Quiquinpaj agllashcacuna cushicucunpi ñucapish, jatunta cushicungapaj apamupayari. Quiquinpaj cajcunahuan ñucapish sumajyaringapaj apamupayari.

⁶ Ñucanchijca juchallishcanchijmari. Ñucanchij ñaupa yayacuna shinallatajmari juchallishcanchij. Millaitamari rurashcanchij. Mapatamari rurashcanchij.

⁷ Ñucanchij ñaupa yayacunaca, Egiptopica quiquin mancharinacunata rurashcataca mana entendircacunachu. Paicunata yallitaj llaquij cashcatapish mana yuyarircacunachu. Ashtahuanpish paicunaca Puca Cucha c'uchupica, quiquinta c'ariyarcacunami.

⁸ Shina cajpipish paica paipaj shutita c'uyashcamantami paicunataca quishpichirca. Pai tucuita rurai tucuj cashcata tucuicunaman ricuchingapajmi quishpichirca.

⁹ Puca Cuchata sinchita rimajpica chaquirircallami. Chaquishca pambata shina rurashpamari chaita ch'imbachirca.

¹⁰ Chashnami p'iñajcunapaj maquimanta quishpichirca. P'iñajcunapaj maquimantami cacharichirca.

¹¹ Paicunata p'iñajcunataca yacumi millpurca. P'iñajcunaca shujllapish mana saquirircachu.

¹² Chaipimi pai rimashcataca crircacuna. Paita alabashpami cantarcacuna.

¹³ Chashna cashpapish pai imalla rurashcacunataca utcami cungarircacuna. Paipaj munaitaca mana shuyasha nircacunachu.

¹⁴ Shitashca pambapica, quiquin munaillata rurasha nij cacharishcacunami tucurcacuna. Shitashca pambapica Dios imata rurajta ricungapajmi, caita chaita rurachun nircacuna.

¹⁵ Taita Diosca paicuna mañashcatami curca. Ashtahuanpish huañuchij ungüitapish cacharcami.

¹⁶ Paicunapaj carpa huasicunapica Moisesta envidiashpami rimarcacuna. Mandaj Diospaj caj jucha illaj Aarontapish rimarcacunami.

¹⁷ Datantaca allpa pascarishpami millpurca. Abirantapish, paita catijcunatapish allpami taparca.

¹⁸ Chai tandanacushcacunataca ninamari rupachirca. Nina lunyashpamari millaicunataca rupachirca.

¹⁹ Horebpica shuj bizi diostami rurarcacuna. Curita yacuyachishpa bizi diosta rurashca ñaupajpimi cungurircacuna.

²⁰ Sumaj jatun Diosllata yuyarinapaj randica, q'uihuata micuj huagraman rijchajta rurashpami adorarcacuna.

²¹ Paicunata quishpichij Taita Diostaca cungarircacunami. Egiptopi mancharinacunata rurashpa ricuchij Diostaca cungarircacunami.

²² Cam shuti llajtapi mancharinacunata ruraj Diostaca cungarircacunami. Puca Cuchapi mana ricushcata ruraj Diostaca cungarircacunami.

²³ Diosca paicunataca tucuchisha nircami. Pai agllashca Moisés chaupipi shayarishpa mana rogarishca cajpica, tucuchinmanmi carca. Ama tucuitaj chingachichun pai llaquichina cashcata anchuchichunmi chashna rurarca.

²⁴ Paicunaca munanajlla sumaj llajtamanmi mana rishun nircacuna. Pai cusha nishcataca mana crircacunachu.

²⁵ Ashtahuanpish paicunapaj carpa huasicunapimi huashalla parlanacurcacuna. Mandaj Dios rimashcataca mana uyarcacunachu.

²⁶ Chaimantami paicunata llaquichingapaj maquita alzarca. Shitashca pambapi paicunata huañuchingapajmi maquita alzarca.

²⁷ Paicunapaj huahua huahuacunapish mana cazujpica, chashnallataj tucui llajtacunata urajta janajta cachanata ricuchishpami chashna rurarca.

²⁸ Paicunaca Baal-peor nishca diospajmanpishmi chashnallataj tandanacurcacuna. Huañushca dioscunaman cushcacunatami micurcacuna.

²⁹ Paicunaca chashna rurashcacunahuanmi Taita Diostaca yallitaj p'iñachircacuna. Chaimantami paicunapurapica achcacunata huañuchirca.

³⁰ Finees runami jatarishcahuan rishpa, Taita Dios mandashca shina rurashpa chai llaquitaca parachirca.

³¹ Taita Dios mandashca shina pai rurashcataca, huahua huahuacunamanmi parlacungalla. Huiñaicamami parlacungalla.

³² Meriba yacu c'uchupipish, Diostaca yallitajmi p'iñachircacuna. Paicuna chashna rurashcamantami Moisespish Diospi mana alli saquirirca.

³³ Paicuna paipaj shunguta yallitaj llaquichijpimi, Moisesca imata rimacushcata mana yachashpa rimarirca.

³⁴ Mandaj Dios tucuita chingachinguichij nishca gentecunatapish mana tucuita chingachircacunachu.

³⁵ Ashtahuanpish Taita Dios ama chagruringuichij nishca llajta gentecunahuanmi chagrurircacuna. Paicuna rurashca shina ruranatami yacharcacuna.

³⁶ Chaicunapaj rurashcalla dioscunapajtami rurarcacuna. Chaimi jatun llaqui tucurcacuna.

³⁷ Paicunapaj churicunatapish, ushushicunatapish supaicunaman cushpami huañuchijcuna carca.

³⁸ Canaán llajtapi causajcunapaj manapish dioscunaman paicunapaj churicunata, ushushicunata cushpami imamanta mana huañuipajcunapaj yahuarta jicharcacuna. Chai yahuarhuanmi chai llajtaca mapayarca.

³⁹ Chai llajtacunapaj millai ruranacunata rurashpami mapayarcacuna. Chai ruranacunahuanmi huainayarcacuna.

⁴⁰ Chaimantami Mandaj Diosca, paipaj cajcunahuanca nina sindirij shina yallitaj p'iñarirca. Paipaj cajcunataca millanachircami.

⁴¹ Paicunataca shujtaj llajtacunapaj maquipimi churarca. Paicunataca paicunata p'iñajcunami mandarcacuna.

⁴² Paicunata p'iñajcunami paicunataca llaquichircacuna. Paicunapaj maquipimi llaquichishca causarcacuna.

⁴³ Achca cutinmi paicunataca cacharichirca. Ashtahuanpish paicunaca Taita Dios cunashcataca mana cazurcacunachu. Chaimi paicunaca millaita rurashcamanta cumurichishca tucurcacuna.

⁴⁴ Chashna cajpipish paicuna llaquita apacujpica Taita Diosca ricurcami. Paicuna mañashcata uyarcami.

⁴⁵ Paicunahuan ari ninacushcatapish paica yuyarircami. Pai yallitaj llaquij cashca shinallatajmi paicunataca llaquirca.

⁴⁶ Tucui paicunata prezu charicujcunamanpish paillatajmi paicunata llaquina yuyaitami curca.

⁴⁷ Mandaj Dios, ñucanchij Taita Dioslla quishpichihuayari. Quiquinpaj jucha illaj shutita alabangapaj tucui llajtacunamanta tandachihuayari. Quiquinta alabashpa cushicungapaj tandachihuayari.

⁴⁸ Mandaj Diosca alli nishca cachun. Israelcunapaj Taita Diosca huiñaimanta huiñaicama alli nishca cachun. Chaitaca tucuicuna: “Chashna cachun” nichigari. Mandaj Diostaca alabaichigari.