SALMOS 103 - Dios Rimashca Shimicunami

SALMO 103 Taita Diospaj allicunamanta alabashcami

David rurashca Salmomi.

¹ Ñuca almalla, Mandaj Diostaca allimari cangui niyari. Paipaj jucha illaj shutitaca ñuca tucui cashcahuanmi alli nini.

² Ñuca almalla, Mandaj Diostaca allimari cangui niyari. Pai ñucapaj imalla allicunata rurashcataca, shujllatapish amataj cungarichu.

³ Paica tucui millaita can rurashcata perdonajmi. Paica tucui cambaj ima nanaitapish alliyachijmi.

⁴ Paica jutcumanta cambaj causaita quishpichijmi. Paica cuj cana, llaquij cana coronata churachijmi.

⁵ Paica cambaj shimi jundata mana nijta carajmi. Chashna rurashpaca águila shina fuerzayujtami ruran.

⁶ Mandaj Diosmi cashcata ruraj. Paica llaquichishca causajcunapajpish cashcata rurajmi.

⁷ Paipaj ñancunataca Moisesmanmi ricuchirca. Israelcunamanca pai rurana cashcatami rurashpa ricuchirca.

⁸ Mandaj Diosca, llaquij, mana maipish cachun llaquichijmi. Mana utca p'iñarij, jatunta c'uyajmi.

⁹ Paica mana ñucanchijtaca rimacujllachu. P'iñarishcataca mana huiñaipaj charicunllachu.

¹⁰ Ñucanchij millaita rurashcamantaca, llaquichina shinatajca mana llaquichircachu. Ñucanchij juchacunamantaca cuna cashca shinaca mana cushcachu.

¹¹ Paita manchajcunapajca, cai pachamanta jahua pachacamami, pai llaquij cashcataca jatunyachirca.

¹² Inti llujshinmanta, inti huashicuncamaca yallitaj carumari. Chai shinallatajmari ñucanchij mana cazushcacunatapish caruyachirca.

¹³ Yaya paipaj huahuacunata ima shina llaquij shinallatajmi, Mandaj Diospish paita manchajcunataca llaquin.

¹⁴ Paica ñucanchij imamanta rurashca cashcataca yachanmi. Ñutu allpamanta ñucanchij cashcatapish yuyaipimi.

¹⁵ Runapaj causaica q'uihua shinallamari. Q'uihua chagrapi sisashca shina,

¹⁶ huaira p'ucujpica chaquirinllami. Pai maipi cashcataca mana yuyarinchu.

¹⁷ Ashtahuanpish Mandaj Dios llaquij cashcaca paita manchajcunapajca huiñaimanta huiñaicamami. Pai cashcata ruranapish huahua huahuacunapajmi.

¹⁸ Mandaj Dios mandashcacunata pajtachingapaj yuyaipi cajcunata paihuan ari ninacushcatapish chai yuyailla ruracujcunapaj jahuapimi paipaj c'uyaica.

¹⁹ Mandaj Diosca pai mandashpa tiyanataca, jahua pachapimi churarca. Pai mandanaca tucuicunatami cazuchicun.

²⁰ Cancuna Mandaj Diospaj angelcuna, paita allimari cangui nichigari. Cancunaca pai imata nishcata pajtachingapaj fuerzasapacuna cashcamanta, pai mandashcata cazushpa paipaj shimi nishcata rurajcunami canguichij.

²¹ Tucui cancuna Mandaj Diospaj angelcuna, allimari cangui nichigari. Cancunaca paipajta rurajcuna, paipaj munaita rurajcunamari canguichij.

²² ¡Cancuna Mandaj Dios tucui imalla rurashcacuna paitaca allimari cangui nichigari. Tucui paipaj mandacuncuna paitaca allimari cangui nichigari! ¡Ñuca almalla, Mandaj Diostaca allimari cangui niyari!