SALMOS 100 - Dios Rimashca Shimicunami

SALMO 100 Pagui nichun cunashcami

Diosta pagui nishpa alabana Salmomi.

¹ Taita Diostaca cushicushpa cantaichij. Tucui cai pachapi causajcuna cantaichij.

² Mandaj Diospajtaca, cushicuihuan ruraichigari. Paipaj ñaupajmanca cushicuihuan shamuichigari.

³ Mandaj Diosca Diostaj cashcata yuyarichigari. Paimari ñucanchijtaca rurarca. Mana ñucanchijllataj rurarircanchijchu. Ñucanchijca paipajcunamari canchij, paipaj michina pambacunapi caj ovejacunami canchij.

⁴ Paipaj punguta yaicucushpaca, pagui nishpa cantashcahuan yaicuichigari. Paipaj huasi canllaman yaicushpaca alabashpa cantaichigari. Paipaj shutitaca alabaichigari, alli nichigari.

⁵ Mandaj Diosca allimi, paipaj llaquij canaca huiñai huiñaipajmi. Pai imata nishcata pajtachinataca huahua huahuacunapaj ruracungallami.