SALMOS 10 - Dios Rimashca Shimicunami

SALMO 10 Millaicunata Dios chingachichun mañashcami

¹ Mandaj Dioslla, ¿ima nishpataj ñucamanta carupi canguiyari? Ñuca llaquihuan cai punllacunapica ¿ima nishpataj miticunguiyari?

² Millai runaca huajcha runataca, jatun tucushpa llaquichina yuyailla tucushpami llaquichin. Huajcha runa urmachun nishpa churashca urmanapica paillatajmi urmanga.

³ Millai runaca paipaj shungu munashcata rurashpami cushicun. Yallitaj charinallata munajtami alli nin, Mandaj Diostaca p'iñanmi.

⁴ Uma alzashca millai runaca, Diostaca mana mashcanchu. Paipaj yuyaipica Diosca manataj tiyashcatami yuyan.

⁵ Paipaj tucui causaica huishtu ñan shinami. Imalla rurashcata ricuchishpa can llaquichinapish yallitaj carupi cashcatami yuyan. Tucui paita p'iñajcunatapish chanzatami ruran.

⁶ Paipaj shungupica: “Ñucataca pi mana urmachingachu, ima llaquipish manataj japingachu” ninmi.

⁷ Paica imapish tucushca canman nishcahuan, umanahuan, llullanahuan jundami. Paipaj c'alluca rimashpa llaquichinahuan, millaita rimanahuan jundami.

⁸ Uchilla llajtaman chayanllacunapi, paca tucushpami chapancuna. Ima mana allita mana ruraj runatapish, pacallapi japishpami huañuchin. Mana mitsari tucuipajtaca paipaj ñahuica chaparacunmi.

⁹ León paipaj jutcumanta pacalla chapaj shinami chapan. Huajcha runata japingapajmi chashna chapan. Japishpaca paipaj linchimanmi apamun.

¹⁰ Mana mitsari tucujcunaca león japigrijpi cumurishpa paipaj sinchi sillucunapi japi tucuj shinami millaipaj maquipi japi tucun.

¹¹ Millai runapaj shunguca: “Diosca cungarinllami. Diospaj ñahuica tapashcami, nunca mana ricucunchu” ninmi.

¹² Jatun Mandaj Dioslla, jatariyari. Cambaj maquita alzayari. Huajchacunataca ama cungarichu.

¹³ Millai runaca ¿Ima nishpataj Diostaca yangachin? Paipaj shungupica Diostaca: “Canca imalla rurashcata tapunataca mana charinguichu” ninmi.

¹⁴ Mana allita rurajtaca, canllataj ricunguimi. Paitapish cambaj maquihuan chai shinallataj llaquichingapajmi ricuracungui. Mana mitsari tucujcunaca cantami mashcan. Yaya mama illajcunamantaca Canmi shayaringui.

¹⁵ Millaita rurajtaca paipaj rigratapish p'aquiyari. Millaita rurajtaca pai rurashcacuna chingaringacama catirashpa llaquichiyari.

¹⁶ Mandaj Diosca huiñaimanta huiñai huiñaita Jatun Mandajmi. Mandaj Diosta mana manchaj llajtacunaca Diospaj allpamantaca chingaringami.

¹⁷ Mandaj Dioslla, mana jatun tucushcacuna mañashcataca uyanguimi. Paicuna mañashcata cushpami cushichingui.

¹⁸ Yaya mama illajlla huahuacunatapish, llaquita apacujcunatapish cashcata rurashpami mitsangui. Allpamanta rurashca runacuna, ama ashtahuan llaquichishpa catichunmi chashna rurangui.