SALMOS 1 - Dios Rimashca Shimicunami

SALMO 1 LIBRO I (Salmos 1–41 ) Cashcata rurajmantapish millaita rurajmantapish

¹ Millaicuna cunashca ñanpi mana purij, juchayujcunapaj ñanpi mana purij, Diosta chanzata rurajcunapaj tiyarinapi mana tiyarijca cushichishcami.

² Paica tutapish punllapish Mandaj Dios mandashca ima nisha nishcata umanarina yuyaillami, chai mandashcata pajtachina yuyaillami.

³ Chai runaca yacu uripi tarpushca yura shinami canga. P'ucuna punllacunapitaj p'ucuj shinami canga. Chai yuramantaca p'angacunapish mana urmanchu. Tucui imata pai rurashcapish allimi llujshinga.

⁴ Ashtahuanpish millaicunaca mana chashnachu, paicunaca huaira apana t'amo shinallami.

⁵ Chaimanta millaicunaca paicuna imalla rurashcata Dios ricuchi punllaca manataj quishpiringacunachu. Juchayujcunaca cashcata rurajcunapaj tandanacuipica, imata mana charingacunachu.

⁶ Cashcata rurajcunapaj causaitaca Mandaj Diosca rijsinmi. Ashtahuanpish millaicunapaj causaica chingaringallami.