Romanos 8 - Dios Rimashca Shimicunami

Espirituhuan causanami

¹ Cunanca Cristo Jesushuan shujlla cajcunapajca jatun llaquiman cachanaca manataj tiyanchu. Paicunaca aicha munaita mana rurashpa, Espiritupaj munaita rurashpa causajcunami.

² Cristo Jesuspi causaita cuj Espíritu mandashcami, ñucataca juchapajta rurachijmanta, huañuimantapish cacharichirca.

³ Ñucanchijca juchayuj aichapi cajpi mandashca imata mana rurai tucujpimi, Diosca paipaj Churitaca, juchayujcuna shina aichayujta rurashpa cacharca. Ñucanchij juchata anchuchingapajmi, paipaj aichallapitaj juchataca chingachirca.

⁴ Ñucanchijca cashcata ruraichij nij Mandashca nishca shina pajtachijcuna cachunmi chashnaca chingachirca. Chaimantami ñucanchijca, ña mana aicha munaita rurashpa, ashtahuanpish Espiritupaj munaita ruracunchij.

⁵ Aichallamanta cajcunaca, aichapaj cajcunallatami yuyancuna. Ashtahuanpish Espiritumanta cajcunaca, Espiritupaj cajcunallatami yuyancuna.

⁶ Aichapaj munaita yuyanaca huañuimanmi apan. Ashtahuanpish Espiritupajta yuyanaca alli causai, sumaj causaimanmi apan.

⁷ Aicha munashcata ruranaca, Diosta p'iñachinami. Chashnacunaca Dios Mandashcataca mana cazuncunachu, manataj cazui tucuncunapishchu.

⁸ Aicha munashca shina causajcunaca, Diostaca mana cushichi tucuncunachu.

⁹ Ashtahuanpish cancunaca, aicha munashca shinaca ña mana causacunguichijchu. Ashtahuanpish Diospaj Espíritu cancunapi causacujpitajca, Espíritu munashca shinamari causacunguichij. Maijanpish Cristopaj Espirituta mana charijca, mana paipajchu.

¹⁰ Cancunapaj juchamanta cuerpoca huañuna cajpipish, Cristo cancunapi causacujpitajca, espirituca justificashcamantaca causacunmi.

¹¹ Huañushcacunapaj chaupimanta Jesusta causachij Diospaj Espiritumi cancunapi causacun. Cristo Jesusta huañushcacunapaj chaupimanta causachij Diosllatajmi, cancunapi caj paipaj Espirituhuan, cancunapaj huañushca cuerpocunatapish causachinga.

¹² Chashna cajpica huauquicuna, ruranatatajmi charinchij, mana aicha munashcata rurashpa causanatachu charinchij.

¹³ Aicha munaita rurashpa causacushpaca, huañunguichijmi. Ashtahuanpish Espirituhuan aichapaj ruraicunata huañuchishpaca, causanguichijmi.

¹⁴ Diospaj Espíritu pushashca causajcunaca, tucuicunami Diospaj huahuacuna.

¹⁵ Chaimanta manchaihuan cachunllataj huatashcata charij espiritutaca mana chasquircanguichijchu. Ashtahuanpish quiquin huahuata shina ruraj Espiritutamari chasquircanguichij. Paimantami: “¡Ñuca Yayitu!” nishpa caparicunchij.

¹⁶ Chai Espiritullatajmi ñucanchij espiritumanca, Diospaj huahuacunami canguichij nishpa huillacun.

¹⁷ Diospaj huahuacuna cashpaca, herenciata japijcunapishmi canchij. Diospaj herenciata japijcuna cashpaca, Cristohuanmi herenciata japijcuna canchij. Paihuan llaquita apashpaca, paillahuantajmi jatunyachishca cashun.

¹⁸ Shamuj punllapi Dios ñucanchijta jatunyachishpa ricuchina cashcataca allimi yachani. Chaihuan ch'imbapurajpica, cunan punlla llaquicunaca ima mana canchu.

¹⁹ Dios paipaj huahuacunata chashna ricuchina cashcataca, Dios rurashcacunami ricunaihuan chai yuyailla chaparacuncuna.

²⁰ Dios rurashcacunaca, mana paicunallataj yangalla canapi huatashca tucurcacunachu. Ashtahuanpish Diosllatajmi shuyana yuyaillapi huatashca cachun chashna rurarca.

²¹ Chaimantami Dios rurashcacunapish, ismunapaj huatashcamantaca cacharichishca canga. Diospaj huahuacunata cacharichishpa jatunyachishcapi cachunmi, chashnaca ruranga.

²² Huachana nanaihuan huarmi aij nicuj shinami, Dios rurashca tucuicunaca shuj shinalla cunancama aij nicujta yachanchij.

²³ Mana chaicunallachu aij nicun. Ashtahuanpish ñucanchijpishmari Espirituta ñaupachishpa cushcata charijcuna cashpapish, ñucanchij shungu ucupica aij nicunchij. Ñucanchij cuerpota quishpichishpa, ñuca huahuacunatajmi canguichij nishca canatami chashna shuyacunchij.

²⁴ Chashna shuyana yuyailla cachunmi, quishpichishca canchij. Ashtahuanpish shuyacushcata ña ricushpaca, mana ashtahuan shuyanachu. Ña shuyacushcata ricushpaca ¿imapajtaj ashtahuan shuyanga?

²⁵ Chaimantami ñucanchijca manaraj ricushcataca, mana p'iñarishpalla chai yuyailla shuyacunchij.

²⁶ Chashnallatajmi mana rurai tucushcapica, Espirituca ñucanchijtaca ayudacun. Ñucanchijca, Dios munashca shina, imata mañanataca mana yachanchijchu. Ashtahuanpish Espiritullatajmi ñucanchijmantaca, mana rimai tucushca shimicunahuan aij nishpa mañaracun.

²⁷ Ashtahuanpish shungucuna yuyashcata callarishpa ricuj Diosca, paipaj Espíritu imata yuyacushcataca yachanmi. Espiritumi, Dios munashca shina jucha illajcunamantaca mañaracun.

Cristohuanca mishajcunatapish yalli jahualla mishajcunami canchij

²⁸ Diosta c'uyajcunapajca tucui ima llaquicunaca, paicunapaj allipajllataj shamuj cashcatami yachanchij. Chaicunaca, Dios imapaj cayashca shina cajcunapajllami.

²⁹ Diosca pai agllasha nishcacunataca, paipaj Churiman rijchajta rurangapajmi ñaupaman ch'icanchirca. Achca huauquicunapurapi Cristoca, punta Churi cachunmi chashnaca rurarca.

³⁰ Chai ch'icanchishcacunatami cayarca. Chai cayashcacunataca justificarcami, justificashcacunataca jatunyachircapishmi.

³¹ Shina cajpica ¿imatataj caimantaca nishun? Dios ñucanchijhuan cajpica ¿pitaj ñucanchijtaca imata ni tucungari?

³² Diosca paipaj quiquin Churitapish mana mitsashpami, tucui ñucanchijmanta curca. ¿Manachu chashnallataj tucui imatapish paillahuantaj ñucanchijman cunga?

³³ Dios agllashcacunataca ¿pitaj juchachingari? Diosmari justificajca.

³⁴ ¿Pitaj jatun llaquimanca cachangari? Cristomari ña huañurca, causarircapishmari. Paica, Yayapaj alli ladopi ñucanchijmanta mañaracunpishmari.

³⁵ Cristopaj c'uyaimantaca ¿pitaj anchuchingari? ¿Llaquicunachu, jatun manchaichu, catirashpa llaquichishcachu, yaricaichu, churana illaichu, huañunalla llaquicunachu, mana cashpaca espadachu anchuchinga?

³⁶ Cashnami quillcashca tiyacun: “Quiquinta catishcamantaca, punllantami huañuchishun nishca canchij. Huañuchinapajmi nishca ovejacunata shinami ñucanchijtaca charicuncuna” ninmi.

³⁷ Chashna cajpica cai tucui llaquicunataca, ñucanchijta c'uyaj Cristohuanca mishajcunatapish yalli jahualla mishajcunami canchij.

³⁸ Chaimanta caitaca allitajmi yachani: Huañuipish, causaipish, angelcunapish, punta mandajcunapish, poderyujcunapish, cunan punllacunapish, shamuj punllacunapish,

³⁹ jahuajman cajcunapish, ucujman cajcunapish, Dios rurashca ima shujtajcunapish ñucanchij Mandaj Cristo Jesuspi Diospaj c'uyaimantaca manataj anchuchi tucungacunachu.