Romanos 7 - Dios Rimashca Shimicunami

Cazarashcacunahuan ch'imbapurashcami

¹ Huauquicuna, (Mandashcata yachajcunatami rimani). Mandashcaca, maijanpish causacujllapi mandacushcataca yachanguichijmari.

² Cazarashca huarmica cusa causacujpirajca, mandashcapi nishca shinaca cusapi huatashcami. Ashtahuanpish cusa huañujpica, cusapi huataj mandashcamantaca cacharirishcami saquirin.

³ Cusa causacujpiraj shujtaj c'arihuan cazarajca, huainayajmi nishcami canga. Ashtahuanpish paipaj cusa huañujpica, chai mandashcamantaca cacharirishcami. Chaipica shujtaj c'arihuan cazarashpapish, mana huainayajchu canga.

⁴ Chashnallataj ñuca huauquicunalla, cancunaca Cristopaj cuerpomantaca, Mandashcata ama rurangapajca huañushcami carcanguichij. Huañushcacunapaj chaupimanta causarijpaj cashcamanta, Diospajca alli granota p'ucuna yuyailla causashunchij.

⁵ Aicha munaipiraj causacujpica, Mandashcami rijchachij shina ñucanchij cuerpopi caj miembrocunataca, millaita rurachishpa huañuiman apaj granota p'ucuchicurca.

⁶ Ashtahuanpish cunanca huatashcata charicuj Mandashcapajta ama rurangapajca, huañushcami canchij. Chaimantami quillcashca mauca Mandashcaca ña mana mandacun. Cunanca Espíritu cushca mushuj causaihuanmi servicunchij.

Ñucapi causacuj juchami mandasha ninlla nishcami

⁷ Shina cajpica ¿imatataj nishun? ¿Mandashcaca juchachu? ¡Manataj chashnachu! Ashtahuanpish Mandashca mana tiyashca cajpica, imalla jucha cashcataca mana yachaimanchu carcani. “Shujtajpajta ama munangui” nishpa Mandashca mana yachachishca cajpica, shujtajpajta munana jucha cashcataca mana yachaimanchu carcani.

⁸ Ashtahuanpish juchaca mandashcahuan tucushpami, ñucapica shujtajpajta munanata callarichirca. Mandashca illajllaca, juchaca huañushcami.

⁹ Mandashca manaraj tiyajpica ñucaca causacurcanimi. Ashtahuanpish mandashca shamujpica juchaca causarircami, ñucaca huañurcanimi.

¹⁰ Causaiman pushaj mandashcallatajmi, ñucataca huañuiman chayachicushca carca.

¹¹ Juchaca mandashcahuan tucushpami, ñucataca umarca. Chai Mandashcami huañuchirca.

¹² Mandashcaca jucha illajtajmi. Chai Mandashcapi imalla nishcacunapish jucha illajmi, cashcata rurajmi, allimi.

¹³ Shina cajpica ¿chai alli cashcachu ñucataca huañuchij tucurca? ¡Manataj chashnachu! Ashtahuanpish juchallatajmi jucha cashcata ricuchingapajca, chai alli mandashcahuan tucushpa ñucataca huañuchirca. Chashnami juchaca, yallitaj millaiman chayachicuj cashcata Diosca mandashcahuan ricuchin.

¹⁴ Mandashcaca Espiritumanta cashcatami yachanchij. Ashtahuanpish ñucaca ñuca munaita ruracuj cashcamanta juchaman c'atushcami cani.

¹⁵ Imata ruracushcatapish mana entendinichu. Rurasha nishcataca mana ruranichu, ashtahuanpish p'iñacushcatarajmi rurani.

¹⁶ Mana rurasha nicushcataraj rurashpami, Mandashcataca alli cashcata entendini.

¹⁷ Ñuca mana rurasha nicushcataca, mana ñucallatajchu rurani, ashtahuanpish ñucapi tiyaj juchami chaitaca rurachicun.

¹⁸ Ñuca aichapica, ima alli mana causashcatami yachani. Chaimantami allita rurana munai ñucapi tiyajpipish, mana rurai tucuni.

¹⁹ Allita ruranata ñuca munacushcataca mana ruranichu. Ashtahuanpish mana munacushca millaitarajmari rurani.

²⁰ Ñuca mana munacushcataraj rurashpaca ña mana ñucachu rurani, ashtahuanpish ñucapi tiyaj juchami chaitaca rurachicun.

²¹ Chashna cajpimi allita ñuca rurasha nicushpapish mana rurashpaca, mandashcapi nishca shinaca millaita ruranaca ñucallapitaj tiyashcata yachani.

²² Ñuca ucu yuyaipica, Dios mandashcallahuanmi cushicuni.

²³ Ashtahuanpish ñuca cuerpopi caj miembrocunapica, shujtaj mandashcatami ricuni. Paimi ñuca yuyaita mandajhuan macanacucun. Chaica ñuca cuerpopi caj miembrocunatami juchapaj mandashcata rurachun huatashpa apacun.

²⁴ ¡Aij, ñuca huajchalla! ¿Pitaj ñucataca, cai huañuj cuerpomantaca cacharichingari?

²⁵ ¡Ñucanchij Mandaj Jesucristomantaca, Taita Diostami pagui nini! Ñuca yuyaihuanca Dios mandashcatami rurani. Shina cajpipish aichamari juchapajta rurachinlla.