Romanos 6 - Dios Rimashca Shimicunami

Juchata ama rurangapajca huañushcami nishcami

¹ Shina cajpica ¿imatataj nishun? Mana c'uyaipajta c'uyana yallitaj mirarichunca ¿ashtahuanchu juchallishpa catishun?

² ¡Amataj chashnaca yuyashunchij! Juchata ama rurangapajca huañushcacunami canchij. ¿Maitataj juchallapitajca causashunri?

³ Cristo Jesuspi bautizashcacunaca, tucuicunami paipaj huañuipi bautizashcacuna canchij. Chaitaca ¿manachu yachanguichij?

⁴ Bautizarishcamantami paipaj huañuipi paihuan pambashca canchij. Ima shinami Yayapaj sumaj poderhuan Cristoca huañushcacunapaj chaupimanta causarirca, chashnallataj ñucanchijpish mushuj causaipi causashunchij.

⁵ Pai huañushca shina paihuan shujlla tucushca cashpaca, pai causarishca shinallatajmi causarishun.

⁶ Ñucanchij mauca causaitaca, Cristohuan chacatashca cashcatami yachanchij. Juchapajta ama ashtahuan rurangapaj, juchasapa cuerpota chingachingapajmi chashna chacatarcanchij.

⁷ Cristohuan huañujca, juchamantaca cacharichishcami.

⁸ Cristohuan huañushca cashpaca, paihuan causanatapish crinchijmi.

⁹ Huañushcacunapaj chaupimanta causarishca Cristoca, ña mana huañuna cashcataca yachanchijmi. Huañuica paitaca mana ashtahuan mandai tucunchu.

¹⁰ Cristo huañushpaca tucuicunapaj juchamantami, shuj cutinlla huañurca. Ashtahuanpish causacushpaca, Diospajmi causacun.

¹¹ Shinallataj cancunapish juchata ama rurangapajca, huañushca cashcata yuyaichij. Ashtahuanpish ñucanchij Mandaj Cristo Jesuspi Taita Diospaj causacushcata yuyaichij.

¹² Cancunapaj huañujlla cuerpota, jucha mandachunca ama saquichijchu. Chaimanta aicha munaicunataca ama cazuichijchu.

¹³ Shinallataj cancunapaj cuerpopi caj miembrocunataca, millaita rurachichun juchamanca ama cuichijchu. Ashtahuanpish huañushcacunapaj chaupimanta causarishcataj cashcamantaca, cancunaca Diosman curichij. Cambaj cuerpopaj mienbrocunatapish, cashcata rurachichun Diosman cuichij.

¹⁴ Chaipica, juchaca cancunataca mana ashtahuan mandai tucungachu. Ña mana Mandashca ucupi canguichijchu, ashtahuanpish mana c'uyaipajta c'uyajpaj ucupimi canguichij.

Cashcata rurashpa servijcunami

¹⁵ ¿Imatataj nishun? ¿Ña mana Mandashca ucupichu canchij, ashtahuanpish mana c'uyaipajta c'uyajpaj ucupimi canchij nishpaca juchallicushunllachu? ¡Amataj chashnaca yuyashunchij!

¹⁶ Maijanpaj esclavo tucushpaca, cazungapaj esclavo tucushcataca ¿manachu yachanguichij? Chashnallataj juchapaj esclavo cajpipish huañuimanmi chayachin, ashtahuanpish Diosta cazushcamantaca cashcata rurashpa causajtami ruran.

¹⁷ Ashtahuanpish ñaupaca juchapaj esclavocuna cashca cashpapish, Diosmanta ima shina canata cancunaman yachachishcatami shungumanta cazushcanguichij. Chaimantami Diostaca pagui nini.

¹⁸ Juchamanta cacharichishca cashpami, cashcata rurajcuna tucushcanguichij.

¹⁹ Cancuna mana jahualla yachai tucujpimi, cancuna yachanallata rimagrini: Ñaupaca cancunapaj cuerpopi caj miembrocunataca mapallata, millaillata servingapajmi millaiman curcanguichij. Chai shinallataj cunanca, cancunapaj cuerpopi caj miembrocunataca, jucha illajlla tucungapaj cashcata rurajta servingapaj curichij.

²⁰ Juchapaj esclavocunaraj cashpaca, cashcata ruranahuanca imata mana charircanguichijchu.

²¹ Cancuna cunan pingaricuncunata rurashcamantaca ¿ima allitataj charircanguichij? Chaicunaca huañuimanmi chayachin.

²² Ashtahuanpish cunanca juchamanta cacharichishca, Diospajta rurajcunami canguichij. Chaimanta japinataca, jucha illaj canata, tucuripica huiñai causaitami charinguichij.

²³ Juchaca huañuitami cun. Ashtahuanpish Taita Dios c'uyashpalla cushcaca, ñucanchij Mandaj Cristo Jesuspi huiñai causaimi.