Romanos 4 - Dios Rimashca Shimicunami

Abraham ima shina crij cashcata ricuchishcami

¹ Shinashpaca aichamanta ñucanchij yaya Abrahammantaca ¿imatataj nishun? Paica ¿imatataj japirca?

² Abrahamca, ima allicunata rurashcamanta justificashca cashca cashpaca, jatun tucunmanmi carca. Ashtahuanpish Diospaj ñaupajpica, mana chashna tucunmanchu carca.

³ Quillcachishcapica ¿imatataj nin? Abrahamca Diostami crirca. Chaimantami justificashpa chasquirca ninmi.

⁴ Trabajajmanca cuna cashcataca c'uyashcallamanta mana cunchu, ashtahuanpish cuna cashcamantatajmi cun.

⁵ Diosta mana manchaj cajpipish, justificaj Diospi crijpica, imata mana rurajpipish, pai crishcamantami justificashpa chasquin.

⁶ Chaimantami ima allicunata mana rurashca cajpipish, Dios justificashpa chasquijpi, cushicuj runamanta David rimashpaca,

⁷ cashna nin: “Millaita rurashcacunata Dios perdonajpi, chai juchacunatapish tapachishcacunaca cushijllacunami.

⁸ Maijanpaj juchata Jatun Dios mana imata nishpa saquijpica cushijllami” ninmi.

⁹ Chai cushijlla canaca ¿circuncisionta rurashcacunapajllachu, mana cashpaca circuncisionta mana rurashcacunapajpishchu? Abrahamtaca crijllapimi, justificashpa chasquirca nishpami ña nircanchij.

¹⁰ ¿Ima shina cajpitaj chasquirca? ¿Circuncisionta rurashcatachu, mana cashpaca manaraj circuncisionta rurashcatachu chasquirca? Manaraj circuncisionta rurashca cajpimi chasquirca, q'uipatami circuncisionta rurachirca.

¹¹ Abrahamtaca circuncisionta manaraj rurashca cajpimi, Diosca justificashpa chasquirca. Chai q'uipami crijpi justificashcata ricuchij sello shina cachun, Diosca circuncisionta rurachun nijpi Abrahamca chasquirca. Chashnami Abrahamca, circuncisionta mana rurashca crijcunapajpish yaya tucurca. Paicunapish crijllapi justificashpa chasquina cashcata ricuchingapajmi, Diosca chashna rurarca.

¹² Abrahamca circuncisionta rurashcacunapaj yayami. Paica mana chaicunapajllachu yaya. Ashtahuanpish mana circuncisionta rurashca cashpapish, Abraham crishca shina crishpa pai causashca shina causajcunapajpishmi yaya.

Dios cusha nishcaca crijpimi pajtan nishcami

¹³ Abrahamman, paipaj huahua huahuacunamanca cai pachata japij cachunmi, Diosca cusha nirca. Chaitaca Mandashcapi nishcata pajtachijpimi cusha mana nircachu. Ashtahuanpish crijpi justificashcamantami chashna nirca.

¹⁴ Mandashcata pajtachijcunalla japina cashcata japijcuna cajpica, crishcapish yangallami canman, Dios convidashallami nishcapish mana convidashcallachu canman.

¹⁵ Mandashcaca Diospaj p'iñaitami apamun. Ashtahuanpish Mandashca mana tiyanpica, Mandashcata p'aquinapish mana tiyanchu.

¹⁶ Chaimanta Dios cusha nishcataca, mana c'uyaipajta c'uyashpa cushca cachunmi, crijllapi pajtachin. Chaica Abrahampaj tucui huahua huahuacunapaj chashnataj cachunmi chashnaca pajtachin. Mana Mandashcata pajtachijcunapajllachu, ashtahuanpish Abraham crishca shina crijcunapajpishmi chashna pajtachin. Chaimantami Abrahamca tucui ñucanchijpaj yaya.

¹⁷ Cashnami quillcashca tiyacun: “Cantaca, achca mama llajtacunapaj yaya cachunmi churarcani” ninmi. Chashna nishca shinallatajmi, pai crishca Diospaj ñaupajpica tucuicunapaj yaya. Diosca huañushcacunaman causaita cujpish, ima manaraj tiyajtapish tiyachun nijmi.

¹⁸ Taita Diosca Abrahammanca cushami nijpica mana pajtaipaj, mana cripaj cajpipish Abrahamca crircallami. Chaita pai crishcamantami achca mama llajtacunapaj yaya tucurca. Chaipimi: “Cambaj huahua huahuacunaca, achcacunami tucunga” nishca shinaca pajtarca.

¹⁹ Abrahamca (patsaj huatayuj shina cashpa paipaj aichapish ña huañushca shina cashpapish), paipaj huarmi Sarapish ña mana huachaipaj cajpipish, Taita Diosca ruranataj cashcata crircallami.

²⁰ Dios cusha nishcataca, chaichu cunga mana cunga nishpaca mana crij shinaca mana yuyarcachu. Ashtahuanpish pai crishcapi sinchiyashpami, Diostaca jatunyachirca.

²¹ Diosca pai cusha nishcataca, tucuita pajtachi tucuj poderyuj cashcatami tucui shunguhuan crirca.

²² Chashna cajpimi Abrahamtaca, pai crishcamantaca justificashpa chasquirca.

²³ Justificashcami carca nishpaca, mana paillamanta quillcashcachu.

²⁴ Ashtahuanpish chai shinallataj ñucanchijtapish crijllapi justificashpa chasquinamantami nin. Chaimantami huañushcacunapaj chaupimanta ñucanchij Mandaj Jesusta causachij Taita Diospi crijpica, ñucanchijtapish justificashpa chasquin.

²⁵ Paitaca ñucanchij juchacunamantami curca. Ñucanchijta justificangapajmi causachirca.