Romanos 3 - Dios Rimashca Shimicunami

¹ ¿Judío cashcamantaca ima allitataj charin? Circuncisionta rurashca cajca ¿ima allitataj japin?

² Chaica tucui imapajpish allimari. Puntaca judiocunamanrajmi, Taita Diosca paipaj Shimitaca curca.

³ Maijan paicuna mana crijpica ¿imashi tucunga? Pai mana crishcallahuanca ¿Taita Dios pajtachij cashcataca anchuchingachu?

⁴ ¡Manataj chashnachu! Tucui gentecuna llulla cajpipish, Taita Diosca mana llullachu. Cashnami quillcashca tiyacun: “Quiquin cashcata ruraj cashcataca cambaj shimicunami ricuchin. Quiquinta juchachijpipish mishanguillami” ninmi.

⁵ (Maijan rimarij shinallami rimagrini.) Ñucanchij cashcata mana rurashcallatajmi, Taita Diosca cashcata ruraj cashcataca ricuchin. Chashna cajpica ¿imatataj nishun? Taita Diosca cashcata mana ruraj cashpachu ¿llaquichinga?

⁶ ¡Manataj chashnachu! Taita Diosca cashcata mana ruraj cashpaca, cai pachapi causajcunataca ¿ima shinataj, paicuna imalla rurashcata ricuchishpa llaquichingari?

⁷ Ashtahuanpish llullashpa, ñuca huillashcaca Taita Diospaj mana llullapajca alli nishca canapaj cajpica ¿ima nishpataj ñucaca juchayujta shina juchachishcaraj cani?

⁸ “Allicuna shamuchunca, millaita rurashunchij” nicun nishpami, maijancunaca ñucanchijtaca yanga juchachicuncuna. ¿Ima nishpataj mana paicuna nishca shina ninchij? Ñucanchijta chashna yachachicushcatataj shina nijcunataca cashcatataj rurashpami llaquichishca canga.

Cashcata rurajca shujllapish mana tiyanchu

⁹ Shinashpaca ¿ima nishuntaj? ¿Ñucanchijca mana judiocunata yalli allichu canchij? ¡Manataj chashnachu! Judiocunapish, mana judiocunapish tucuicunami jucha ucupi nishpami ña ricuchircanchij.

¹⁰ Cashnami quillcashca tiyacun: “Cashcata rurajca mana tiyanchu, shujllapish mana tiyanchu.

¹¹ Entendijpish mana tiyanchu, Diosta mashcajpish mana tiyanchu.

¹² Tucuicunami paimanta anchushpa, yanga tucurcacuna. Allita rurajca manataj tiyanchu, shujllapish mana tiyanchu.

¹³ Paicunapaj tungurica, pambashca jutcuta pascashca shinami. Paicunapaj c'alluhuanmi umancuna. Paicunapaj shimi ucupica, culebracunapaj venenomi tiyan.

¹⁴ Paicunapaj shimipica, imapish tucushca cachun nishpa rimana jayajhuan jundami.

¹⁵ Paicunapaj chaquicunaca, yahuarta jichanamanca utcami callpancuna.

¹⁶ Paicuna purishca ñancunapica, chingachishpa llaquichishcallami tiyan.

¹⁷ Sumajta causana ñantaca mana rijsircacunachu.

¹⁸ Paicunapaj causaipica, Diostaca manataj manchancunachu” ninmi.

¹⁹ Ashtahuanpish Mandashca ucupi cajcunataca, tucui ima shina cana cashcata Mandashcallataj yachachicushcatami yachanchij. Tucui cai pachapi causajcunata ima shina cashcata Dios ricuchicuipica, tucuicunallataj shimi mana llujshishpa upalla cachunmi chashna yachachicun.

²⁰ Diospaj ñaupajpica, pi cashpapish Mandashcapi nishca ruraicunamantaca cashcata rurajmi cangui nishcaca mana cangachu. Mandashcaca juchayuj cashcallatami ricuchicun.

Crijllapimi justifican

²¹ Ashtahuanpish cunanca Mandashcata saquishpa, Diosca justificana cashcatami ricuchishca. Chaitaca Mandashcapish, profetacunapishmi cashna huillashca:

²² Jesucristopi crijpimi, tucui paipi crijtaca Diosca justifican. Paipajca tucuicuna chai shinallatajmi.

²³ Tucuicuna juchallishcamantami, Diospaj sumajmantaca anchuchishca carcacuna.

²⁴ Ashtahuanpish Diosca mana c'uyaipajta c'uyaihuanmi cashcata rurajta rurarca. Cristo Jesús cacharichijpimi cashcata ruraj tucurcanchij.

²⁵ Jesustami paipaj yahuarpi crijpi juchacunata anchuchij cachun churarca. Diosca mana p'iñarij cashpami, ñaupa juchacunata perdonashpa, mana juchallishcata shina ruraj cashcata ricuchingapaj chashna rurarca.

²⁶ Chashna cashcata rurajta ruraj cashcataca cunan punllacunapi rurashpami ricuchisha nishca. Chaimi Jesusta crijpica pai ima shinami cashcata ruraj chai shinallatataj ruran.

²⁷ ¿Jatun tucunaca maipitagari? Chaica chingachishcamari saquirin. ¿Maijan mandashcataj chaitaca chingachin? ¿Mandashcapi nishcacunata rurashcamantachu chingachin? Mana chaimantachu, ashtahuanpish crichun mandashcata crishcamantami chashna tucun.

²⁸ Chaica cashnamari: Mandashcapi nishca ruranacunata mana pajtachijpipish, crishcallamantami maijantapish justifican.

²⁹ ¿Diosca judiocunapajlla Dioschu? ¿Manachu mana judiocunapajpish Dios? Ari, mana judiocunapajpish Diostajmari.

³⁰ Pai Diosca shujllami. Circuncisionta rurashca cajpipish, crishcamantami paica justificanga. Mana circuncisionta rurashcacunatapish crishcamantami justificanga.

³¹ Shina cajpica ¿crishcamantaca Mandashcatachu yangata ruranchij? ¡Manataj chashnachu! Ashtahuanpish Mandashcataca, maipi alli canapimi ruranchij.