Romanos 2 - Dios Rimashca Shimicunami

Taita Diosca ima shina rurashcata ricuchishpatajmi llaquichinga

¹ Chaimanta canca, pi cashpapish shujtajta juchachishpaca, canpish juchachicushca shinallataj ruraj cashcamantaca, ñucaca allimi cani mana ni tucunguichu. Cambaj llaquipajllatajmi chashna juchachingui.

² Ashtahuanpish chashna millaita rurashpa catijcunataca, mana llullapi nishca shinataj ima shina rurashcata ricuchishpa Taita Dios llaquichina cashcataca yachanchijmi.

³ Canpish chashna rurajcunata juchachishpa, chai shinallataj millaita ruraj cashpaca ¿Ima shina rurashcata ricuchishpa Taita Dios llaquichinamantaca miticushami yuyanguichu?

⁴ ¿Paica alli canata, mana utca p'iñarij canata, millaita rurajpipish mana utca llaquichij canata achcata charij cashcatachu yanganchingui? Mana cashpaca, paica paipaj alli cashcahuan cutirinaman pushacushcatachu mana yachashca shina tucungui.

⁵ Ashtahuanpish cambaj rumiyashca, mana cutirisha nij shungumantami, Taita Dios p'iñarishpa ima shina rurashcatataj ricuchishpa llaquichina punllapaj cambajllataj huaquichicungui.

⁶ Chaipimi paica cada quiquin ima shina rurashca shinallataj caicunata cunga:

⁷ Taita Dios allicunata cuj cashcata yachashpa, chaita shuyashpa allicunata rurajman, huiñai causaita charishcamanta allita rurajtaca huiñaita paihuan causachunmi saquinga.

⁸ Ashtahuanpish mana llullata mana cazushpa c'ariyajcunata, millaita ruranallata cazujcunataca Taita Diosca jatunta p'iñarishpami llaquichinga.

⁹ Millaita rurajcunataca, puntaca judiocunata, griegocunatapish tucuicunatami jatun llaqui, jatun manchaipish japinga.

¹⁰ Ashtahuanpish tucui allita rurajcunamanca, puntaca judiocunaman, griegocunamanpish sumaj canata, alli nishca canata, sumaj causaitapishmi cunga.

¹¹ Taita Diospajca pita ñahuita ricushpalla alli ninaca mana tiyanchu.

¹² Mandashcata mana charishcamanta tucui juchallijcunaca, Mandashcapi nishca shina ricuchishpa mana llaquichishca cashpapish chingaringacunami. Shinallataj Mandashcata charishpapish juchallijcunaca, Mandashcapi nishca shinallatajmi ricuchishpa llaquichishca cangacuna.

¹³ Mandashcata uyajcunallaca, Taita Diospaj ñaupajpica cashcata rurajmi cangui nishcaca mana cai tucuncunachu. Ashtahuanpish Mandashcapi nishcata cazujcunami cashcata rurajcunami canguichij nishca cai tucuncuna.

¹⁴ Mandashcata mana charij mana judiocunaca, Mandashca rurachun nishcataca paicunallapitaj tiyajpimi rurancuna. Paicunaca Mandashcata mana charishpapish paicunallatajmi Mandashca libroca tucun.

¹⁵ Chaimi Mandashca rurangui nishcaca, paicunapaj shungupi quillcashca cashcata ricuchincuna. Paicunapaj yuyaillatajmi yuyachishpa ima shina cashcata ricuchishpa juchachin, mana cashpaca allimi nin.

¹⁶ Chaicunataca imalla rurashcata Taita Dios ricuchishpa llaquichina punllapica, alli huillaipi huillashca shinallatajmi, pacalla rurashcacunataca tucuicunapajta Jesucristota ricuchichinga.

Judiocunapish Mandashcapish

¹⁷ Canca judiomi cani, Mandashcahuanmi cani, Taita Dioshuanpish allimi cani nishpami jatun tucungui.

¹⁸ Taita Diospaj munaitapish rijsinguimi, Mandashcamanta yachachishca cashcamantaca, allicunallata agllanatapish yachanguimi.

¹⁹ Mana ricujcunata pushajtajmi cani, amsapi cajcunata achijyachijpishmi cani,

²⁰ mana yachajcunata yachachij, huahuacuna shinata yachachijmi cani. Ima shina yachanatapish, mana llullatapish Mandashcapimi charini niricunguimi.

²¹ Canca shujtajta yachachicushpaca ¿manachu canllataj yachachiricungui? Canca mana shuhuanachu nishpa yachachishca jahuachu ¿shuhuangui?

²² Canca mana huainayanachu nishca jahuachu ¿huainayangui? Canca rurashcalla dioscunata p'iñashca jahuachu ¿chai huasicunamanta chai dioscunata shuhuangui?

²³ Canca Mandashcapi jatun tucucushca jahuachu ¿Mandashcata p'aquishpa Taita Diosta pingachingui?

²⁴ Cashnami quillcashca tiyacun: “Cancunamantami Taita Diospaj shutitaca, mana judiocunapurapica p'iñashpa c'amincuna” ninmi.

²⁵ Mandashcata pajtachijpajca, circuncisionta rurashcapish allitajmari. Ashtahuanpish Mandashcata p'aquij cashpaca, canca mana circuncisionta rurachishca shinallatajmi cangui.

²⁶ Chaimanta circuncisionta mana rurashca cashpapish, Mandashcapi pajtachingui nishcata pajtachijpica ¿manachu circuncisionta rurashca shinallataj canga?

²⁷ Aichapi circuncisionta mana rurashca cashpapish, Mandashcata allitaj pajtachijca, canca Quillcashca Mandashcata charishpapish, circuncisionta rurashca cashpapish, Mandashcata p'aquijpica, pairajmi cantaca mana allichu cangui nishpa llaquichinga.

²⁸ Ñahui ricuillapi judioca, mana judiotajchu. Aichallapi circuncisionta rurashcapish, mana rurashca shinallatajmi.

²⁹ Ashtahuanpish shungumantataj judiomi, judiotajca, circuncisiontapish shungupimi rurachishca. Chaitaca Espiritumi ruran, mana quillcashca Mandashcachu ruran. Chashna cajtaca mana runacunachu alli nin, ashtahuanpish Taita Diosmi alli nin.