Romanos 16 - Dios Rimashca Shimicunami

Rijsishcacunata allillachu canguichij nishcami

¹ Ñucanchij pani Febetapish alli chasquipaichij ninimi. Paica, Cencreapi tandanacushca crijcunapajta rurajmi.

² Jucha illajcunata ima shinami chasquinguichij, chai shinallataj paipish Mandaj Jesushuan shujlla cashcamanta alli chasquichij. Paica shujtaj achcacunata, ñucatapish ayudajmi. Chaimanta paipaj ima illashcatapish ayudanguichij.

³ Ñucahuan Cristo Jesuspajta ruraj Priscilatapish, Aquilatapish alli cashca cachun nipaichij.

⁴ Ñuca causaita quishpichisha nicushpallami, paicunaraj ashallamanta mana huañurcacuna. Chaimanta paicunataca mana ñucallachu pagui nini, ashtahuanpish mana judío caj tucui tandanacushca crijcunapishmi pagui nincuna.

⁵ Paicunapaj huasipi tandanacuj crijcunatapish alli cashca cachun nipaichij. Ñuca c'uyashca Epenetotapish alli cashca cachun nipaichij. Paica Acayapi Cristota punta crijmi.

⁶ Mariatapish alli cashca cachun nipaichij. Paica cancunapurapaj, achcata trabajajmi carca.

⁷ Ñucanchij aillupuramanta ñucahuan prezupi tiyaj Andronicota, Juniastapish alli cashca cachun ninmi nipaichij. Paicunaca, apostolcunahuan allita rurajmi carca. Ñucapaj ñaupa crijcunapishmi carca.

⁸ Mandaj Jesuspi shujlla caj ñuca c'uyashca Ampliastapish allillachu cangui nipaichij.

⁹ Cristo Jesuspajta ñucahuan ruraj Urbanota, ñuca c'uyashca Estaquistapish allillachu canguichij nipaichij.

¹⁰ Cristota alli crijtaj cashcata yachashca Apelesta, Aristobulopaj familiatapish allillachu canguichij nipaichij.

¹¹ Ñuca familia Herodionta, Narcisopaj familiatapish allillachu canguichij nipaichij. Paicunapish Mandaj Jesuspi shujllami.

¹² Mandaj Jesuspajta mana shaicushpa trabajaj Trifenata, Trifosatapish allillachu canguichij nipaichij. Mandaj Jesuspajta mana shaicushpa chai yuyailla trabajaj c'uyashca pani Persidatapish allillachu canguichij nipaichij.

¹³ Mandaj Jesús agllashca Rufotapish, paipaj mamatapish allillachu canguichij nipaichij. Paica ñucapajpish mama shinami.

¹⁴ Asincritota, Flegonteta, Hermasta, Patrobasta, Hermesta, paicunahuan caj huauquicunatapish allillachu canguichij nipaichij.

¹⁵ Filologota, Juliata, Nereota, paipaj panitapish, Olimpastapish, tucui paicunahuan caj jucha illajcunatapish allillachu canguichij nipaichij.

¹⁶ Jucha illaj muchahuan caishuj chaishuj allillachu canguichij ninacuichij. Cristopaj tandanacushca crijcunapish allillachu canguichij ninmi.

¹⁷ Ashtahuanca caitami rogani huauquicuna. Cancuna yachashca yachanata ñitcachishpa, pandachishpa ch'icanyachijcunataca alli ricuranguichij. Paicunamantaca anchurichij.

¹⁸ Chashnacunaca, ñucanchijta Mandaj Jesucristopajtaca mana rurancunachu, ashtahuanpish quiquin huijsapajllami yuyarishpa causancuna. Paicunaca, sumaj uyanalla shimicunata rimaj tucushpami, manaraj alli yachajcunapaj shunguta umancuna.

¹⁹ Cancuna cazucushcataca maipipish tucuicuna yachashcamantami, cancunamantaca achcata cushicuni. Ashtahuanpish allitaca yachajcuna, mana allitaca mana yachajcuna caichij ninimi.

²⁰ Sumaj causaita cuj Taita Diosca, Satanastaca cancunapaj chaqui ucupimi saruchun ñalla churanga. Ñucanchijta Mandaj Jesucristopaj mana c'uyaipajta c'uyaj canaca, cancunahuan cashca cachun.

²¹ Ñucahuan trabajaj Timoteo, ñuca aillumanta caj Lucio, Jasón, Sosipaterpishmi cancunataca, allillachu canguichij nincuna.

²² Cai quillcata quillcaj Terciopish, Mandaj Jesuspi shujlla cashcamantaca cancunata allillachu canguichij ninimi.

²³ Ñucata pozachij Gayo, paipaj huasipi tandanacuj crijcunapish allillachu canguichij nincunami. Pueblopaj cullquita huaquichij Erasto, huauqui Cuartopish cancunataca, allillachu canguichij nincunami.

²⁴ Ñucanchijta Mandaj Jesucristopaj mana c'uyaipajta c'uyaj canaca, tucui cancunahuan cashca cachun. Chashna cachun.

Tucuchinapaj Diosta alli nishcami

²⁵ Jesucristomanta alli huillaita ñuca huillashca shinallataj, cancunata sinchiyachij Diostaca allimari cangui ninimi. Huiñaimantami pi mana yachaipaj pacallataca ricuchimushca.

²⁶ Chaitaca huiñaita causaj Dios mandashca shinami, paipaj profetacunaman Quillcacunata quillcachishpa ricuchishca. Crinataj cashcata cazunata tucui mama llajtacunaman yachaj chayachingapajmi chashna ricuchishca.

²⁷ Tucuita yachaj shujlla Diostaca, Jesucristomanta huiñai huiñaita jatunyachishca cachun. Chashna cachun.