Romanos 1 - Dios Rimashca Shimicunami

Allillachu canguichij nishcami

¹ Jesucristopajta ruraj, apóstol cachun cayashca, Taita Diospaj alli huillaita huillachun ch'icanchishca Pablomi cani.

² Chaitaca paipaj profetacunaman jucha illaj Quillcacunata quillcachishpami, ñaupaman cusha nirca.

³ Chai alli huillaica Taita Diospaj Churi, ñucanchijta Mandaj Jesucristomantami huillan. Paica aichamantaca, Davidpaj huahua huahuamantami carca.

⁴ Huañushcacunapaj chaupimanta pai causarishcamantami, jucha illajta ruraj Espíritu huillashca shinaca, poderyuj Diospaj Churi cashcata ricuchishca.

⁵ Paimantami mana c'uyaipajta c'uyaj canata, apóstol canatapish chasquircanchij. Chaimanta paipaj shutita c'uyashpami, tucui mama llajtacuna Jesucristota crichun huillacunchij.

⁶ Cancunapish Jesucristopi crijcunaca pai agllashcacunapura cachun cayashcacunami canguichij.

⁷ Romapi tucui cajcuna, Dios c'uyashpa jucha illaj cachun cayashcacuna: Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninimi.

Pabloca Romamanmi risha nishca

⁸ Tucuimanta yallica cancuna crishca, tucui cai pachapi huasha huasha uyaricushcamantami, Jesucristomanta ñuca Taita Diostaca pagui nicunilla.

⁹ Paipaj Churipaj alli huillaita huillashpa, tucui ñuca yuyaihuan servicushca Taita Diosmi mana shaicushpa, cancunamanta paita ñuca mañacushcataca yachan.

¹⁰ Cunantajca ima shinapish Taita Diospaj munai cajpica, cancunapajman alli shamungapajmi mañacunilla.

¹¹ Espíritu cushca rurai tucunacunata cancunaman huillangapajmi cancunapajman rina yuyailla cani. Cancuna sinchiyashca cachunmi chai yuyailla cani.

¹² Cancunapish ñucapish crishcata caishujmanta chaishujmanta yuyaita cunacushpa cushicungapajmi shamunata munani.

¹³ Huauquicuna, tauca cutin cancunapajman risha nicujpipish, imapish jarcajpi, caicama mana shamushcata yachachunmi munani. Caishuj mana judiocunapurapi charishca shinallataj, cancunapurapipish alli rurashcataca grano p'ucushcata shina charingapajmi shamusha nicuni.

¹⁴ Griegocunaman, mana griegocunamanpish, yachaisapacunaman, imata mana yachajcunamanpish debimi cani.

¹⁵ Chaimantami ñucaca Romapi caj cancunamanpish, alli huillaita huillanaihuan cashpa utca shamusha nini.

Alli huillaica quishpichi tucujmi

¹⁶ Ñucaca alli huillaimantaca mana pingarinichu. Alli huillaica tucuita rurai tucuj Diosmanta cashcamantami, puntaca judiocunata, griegocunatapish maijanpish crijpica, tucuicunata quishpichin.

¹⁷ Taita Diosca crijllapi justificaj cashcatami alli huillaica ricuchin. Crishcallapi catichun. Cashnami quillcashca tiyacun: “Crijpi justificashcamantami causanga” ninmi.

Tucuicunami juchayuj

¹⁸ Taita Diosta mana manchashpa, manapish rurana cashcata rurajcunaca, paicunapaj mana allita rurashcahuanmi mana llullatapish jarcancuna. Paicunata Taita Dios p'iñarishpa llaquichinaca, jahua pachamantami ricurin.

¹⁹ Taita Diosmanta yachaipajllacunatapish, Taita Diosllataj ricuchijpimi rijsincuna.

²⁰ Mana ricuipaj Taita Dios tiyashcataca, pai rurashcacunata ricushpa yachanallami. Huiñaipaj poderyujtaca, cai pachata rurashca punllamanta ricushpa, yuyaita japinallami. Chaimanta mana yachashcanchijchu nishpa pi mana ni tucuncunachu.

²¹ Taita Diosta chashna rijsishpapish, Taita Diosta jatunyachina shinatajca mana jatunyachircacunachu, mana pagui nircacunallapishchu. Chaipaj randica, paicunapaj yuyaicunapipish yangallatami yuyarircacuna. Chaimantami paicunapaj rumi shungucunapish amsayachishca carca.

²² Yachaisapacunami canchij yuyashpapish, ch'ahuancunami tucurcacuna.

²³ Chaimi mana huañuj Taita Diostaca, huañujlla runacunaman, pajarocunaman, chuscu chaquiyujcunaman, huijsahuan llucajcunaman rijchajta rurashpa adorarcacuna.

²⁴ Chaimantami Taita Diosca, paicunapaj shungu munashca shina aicha munaicunata rurachun mapapi saquirca. Chaimi caishuj chaishuj, paicunapaj cuerpocunallatataj pinganayajta rurashpa llaquichirinacurcacuna.

²⁵ Taita Diostaj cajta adoranapaj randica, manapish dioscunatami adorarcacuna. Tucuita callarichij Taita Dios, paillata tucuicuna huiñaita adorashca cana Taita Diosta adoranapaj randica, Taita Dios rurashcacunallatami adorarcacuna. Chashna cachun.

²⁶ Chashna mana allicuna cajpimi, Taita Diosca paicunataca pinganayaj millai munaicunapi saquirca. Chaimi paicunapaj huarmicunapish huarmi canata saquishpa, paicunapurallataj mana rurana cashca millaita rurarcacuna.

²⁷ Shinallatajmi c'aricunapish huarmihuan ruranata saquishpa, caishuj chaishuj millaita ruranaihuan huañucurcacuna. Chashna cashpami c'aripurallataj pinganayaj, manapish rurana cashcata rurashcamantaca paicunapaj aichallapitaj llaquita apanataca chasquincuna.

²⁸ Paicunallataj Taita Diosmantaca imata mana yachashun nijpimi, manapish rurana cashcata rurachun Taita Diosca paicunapaj ch'ahuanyashca yuyaillapitaj saquirca.

²⁹ Paicunaca cashcata mana ruraj canahuan, huainayanahuan, shujtajcunata llaquichinahuan, quiquinpajlla charina munaihuan, millaita ruranahuan jundacunami. Chaimi shujtajpaj charishcata munancuna, huañuchincuna, macanacuncuna, umancuna, shujtajcunata llaquichincuna.

³⁰ Huashalla parlajcuna, yangamanta juchachijcuna, Taita Diosta p'iñajcuna, yanganchishpa c'amijcuna, jatun tucushcacuna, yanga jatun tucujcuna, millaita ruranata yuyarinacujcuna, yaya mamatapish mana cazujcunami.

³¹ Ch'ahuancuna, mana pajtachijcuna, c'uyai illajllacuna, mana alli tucusha nijcuna, llaquij cana illajcunapishmi.

³² Chaicunaca, Taita Diosca ima shina rurashcata ricuchishpa llaquichina cashcatapish yachashca jahua millaita rurajcunami. Chaicunata rurana yuyailla rurashpa causajcunaca huañunapajtaj nishcacunami. Chaicunaca mana millaita ruranllacunachu, ashtahuanpish millaita rurana yuyailla rurajcunahuan cushicujcunami.