PROVERBIOS 8 - Dios Rimashca Shimicunami

Alli yachaica huiñaitami tiyan

¹ Alli yachai cayacujtaca, alli yuyai caparicujtaca ¿manachu uyanguichij imatagari?

² Ñan c'uchu jatun patacunapi, ñancuna tupanacuncunapi shayarishpami caparicun.

³ Puebloman yaicuna pungucunapipish, pungucuna ñaupaj pambacunapipishmi sinchita caparishpa cashna huillacun:

⁴ Tucui runacuna uyaichij, cancunatami caparicuni. Cai shimicunataca tucuicunamanmi huillagrini.

⁵ Yachai illajcuna, alli yuyaita japichij. Rumi shungucunapish, alli yuyaita japichij.

⁶ Ñucata uyaichij, tucuita yalli alli shimicunatami rimagrini. Ñuca shimihuanca allitamari yachachigrini.

⁷ Ñucaca imatapish cashcatatajmi yachachini. Ñuca shimihuan llullashpa pandata yachachinataca manataj munanichu.

⁸ Ñuca shimihuan yachachishca yuyaicunapica ima millai, ima panda mana tiyanchu.

⁹ Entendijcunapajca, tucui cai shimicunaca allimi. Alli yachaita japishcacunapajca, yuyaita japinalla shimicunami.

¹⁰ Cullquita chasquinapaj randica, ñuca yachachishcata chasquichij. Ashtahuan alli curipaj randica, alli yachanata japichij.

¹¹ Alli yachaica achij nicuj, sumaj rumicunata charishcatapish yallimari. Tucuimanta yalli munashca sumaj charinacunapish mana ch'imbapuraipajmi.

¹² Ñuca cai alli yachaica, alli yuyaihuanmi tandalla tiyani. Chaimantami cunanatapish alli yachaihuan cunani.

¹³ Mandaj Diosta manchanaca tucui mana allita p'iñanamari. Quiquinlla alli cashcahuan jatun tucujcunata, millaita rurashpa purijcunata, millaita rimajcunataca p'iñanimi.

¹⁴ Ñucami cunangapajpish, alli yuyaita cuni. Alli yuyaipish, tucuita rurai tucujpish ñucallatajmi cani.

¹⁵ Ñucamantami jatun mandajcunapish, llajtacunata mandacuncuna. Ñucamantami mandajcunapish imatapish cashcata rurashpa allichincuna.

¹⁶ Tucui cai pachapi tiyaj mandajcunallatajmi ñucamanta mandacuncuna. Jatun mandaj churashca mandajcunapish, ñucallamantatajmi mandancuna.

¹⁷ Ñucata c'uyajcunataca, ñucapish c'uyanimi. Tutamantaman mashcajcunallami ñucataca japincuna.

¹⁸ Charijyanapish, alli nishca canapish ñucahuanmi. Mana tucurij charinacunapish, cashcata ruranapishmi ñucahuan tiyacun.

¹⁹ Ñucaca ashtahuan alli, chuya curitapish yalli allimari cani. Ñucamanta japinaca ima mapa illaj cullquita japishcatapish yalli sumajmari.

²⁰ Ñucaca cashcata rurashpa, alli yuyaihuan causana ñancunallatami pushasha.

²¹ Ñucata c'uyajcunataca paicuna japina cashcata japichuntajmi chashna alli pushasha. Allicunatapish maipi mana huaquichi tucuipajtami cusha.

²² Mandaj Diosca imata manaraj rurai callarishpami, ñucataca ña huiñai huiñaita charirca.

²³ Cai pacha manaraj tiyajpimi, tucui ima callarijpajpish, ñucami mandanata charircani.

²⁴ Mama cuchapish, allpa ucumanta llujshicuj yacucunapish manaraj tiyajpimari, ñucamanraj causaita cuhuarca.

²⁵ Urcucunatapish, lomacunatapish manaraj rurashpamari, ñucamanca ña causaita cuhuarca.

²⁶ Ima chagra tiyachun allpa manaraj allichishca cajpi, cai pachapi manaraj chaquishca allpa tiyajpimi, ña tiyarcani.

²⁷ Mandaj Dios jahua pachatapish, mama cucha yacucuna maillata tiyanatapish churacujpica, ñucaca paihuanmi carcani.

²⁸ P'uyuta huairapi churacujpi, mama cucha yacu tiyanatapish sinchita churacujpi,

²⁹ mama cucha yacuta pai churashcamanta, ama maiman llujshichun mandacujpi, cai pachatapish huasita alli shayachij shina sinchita churacujpica, paihuanmi carcani.

³⁰ Tucui chaicunatami Mandaj Dioshuan allichircani. Maiman mana anchushpami, punllanta paita cushichircani. Paipaj ñaupajllapimi carcani.

³¹ Pai tucuita rurashpa, cai pachapi causajcunata churashcamantami achcata cushicuni. Cai pachapica runacunahuanmi cushicuni.

³² Chaimanta cunanca ñucata uyahuaichij, huahuacuna. Ñuca ñanta catijcunaca cushicushpami causancuna.

³³ Ñuca cunashcata alli uyashpa, yachaj caichij. Caitaca ama yanga cashcata yuyashpa saquichijchu.

³⁴ Ñuca yachachishcata yachana munaihuantaj punllanta ñuca huasi pungu pilar huashapi shuyashpa chasquijca cushicunmi.

³⁵ Ñucata japijca causaita japingami. Mandaj Dios c'uyashcapishmi tucunga.

³⁶ Ashtahuanpish ñucata p'iñajca, quiquin causaitami llaquipi churan. Ñucata p'iñajcunaca huañuitami munancuna.