PROVERBIOS 4 - Dios Rimashca Shimicunami

Alli causachun cunashcami

¹ Huahuacuna, cancunapaj yaya yachachishcata uyaichij. Tucui yuyaihuan uyashpami, alli yuyaiyuj canataca yachanguichij.

² Ñucaca allitami yachachini. Ñuca mandashcataca ama mana yachashpa saquirichijchu.

³ Ñucapish cancuna shinallataj huambrami carcani. Ñuca yaya mamapajca, ñucalla huahua tiyashca shina, yallitaj c'uyashcami carcani.

⁴ Chaimantami ñuca yayaca cashna yachachij carca: “Ñuca cushca yuyaicunataca cambaj shungupi charingui. Ñuca mandashcacunata cazushpami, sumajta causangui.

⁵ Ñuca yachachishcacunataca amataj cungaringuichu, amataj saquinguichu. Chashnami alli yachaitapish, alli yuyaitapish ashtahuan japingui.

⁶ Can mana saquijpica, cantapish huaquichingami. Can c'uyajpica, cantapish allipimi charinga.

⁷ Tucui imata rurangapajpish alli yachaitaraj mashcangui. Cambaj ima charinacunamanta puntaca, alli yuyaitaraj japingui.

⁸ Cai yachashcata can jatunyachijpica, cantapish jatunyachingami. Paipi can ugllarijpica, cantapish alli nishcatami ruranga.

⁹ Cambaj umapipish, sumaj ricunatami churachinga. Sumaj ricurina coronatami cunga” nishpami yachachij carca.

¹⁰ Ñuca huahualla uyayari, ñuca cushca yuyaicunataca chasquiyari. Chaimari canmanca uni huatacama causaita cunga.

¹¹ Ñucaca allita yachana ñanpimi cantaca churani. Allita rurashpa causana ñantami pushacuni.

¹² Cai ñanpica can purinataca ima mana jarcangachu. Callpashpa purishpapish, mana ñitcaringuichu.

¹³ Ñuca cunashcataca alli charishpa, chai yuyai cangui. Chaitaca huaquichinguitaj, chaimari canmanca causaita cunga.

¹⁴ Diosta mana manchajcunapaj ñanpica, ama yaicunguichu. Millaicunapaj ñantaca amataj catinguichu.

¹⁵ Chai ñanmanca ama yaicuichu, saquilla. Chaimanta anchurishpa shujman tucuilla.

¹⁶ Paicunaca ima millaita mana rurashpaca, mana dormincunachu. Pita mana urmachishpaca, dormitapish mana japincunachu.

¹⁷ Millaita rurashcallahuanmi micuncuna, vinotapish shuhuashcallatami ubyancuna.

¹⁸ Ashtahuanpish cashcata rurajcunapaj causaica, pacarijpi achijlla inti llujshishpa, chaupi punllayajpi ashtahuan achijlla tucuj shinami.

¹⁹ Diosta mana manchajcunapaj ñanca amsa tuta shinami, imapi tsagnaricushcatapish mana yachancunachu.

²⁰ Ñuca huahualla, ñuca shimicunataca yuyaipi uyayari. Ñuca yuyaicunataca rinrinta mañachishpa uyayari.

²¹ Cambaj ñahuicunatapish ama anchuchinguichu. Cambaj ucu shungupi huaquichishpa charingui.

²² Cai shimicunata japijmanca causaita cunmi, aichatapish jambinmi.

²³ Tucuimanta yallica cambaj shunguta huaquichingui. Shungupi yuyashcami causaipica ricurin.

²⁴ Cambaj shimihuanca ama millaita rimanguichu. Llullaj canatapish jarcarishpa causangui.

²⁵ Cambaj ñahuihuanpish allita ricungui, ñaupajman charicushcata chapangui.

²⁶ Cambaj chaquihuan maipi sarucushcata alli ricungui. Tucui imata rurashcapish, alli cachun ricungui.

²⁷ Alli ñanmantaca, alli maquimanpish, lluqui maquimanpish ama anchuringuichu. Mana allimantaca cambaj chaquita anchuchilla.