PROVERBIOS 31 - Dios Rimashca Shimicunami

Jatun mandajta cunashca shimicunami

¹ Cai shimicunaca, jatun mandaj Lemuel, paipaj mama yachachishcata Dios huillachun nijpi, huillashca sumaj shimicunami:

² Ñuca huahualla, ñuca huijsamanta llujshishca huahualla. Ñuca yallitaj c'uyashca churimari cangui.

³ Huarmicunahuan ama cambaj fuerzata tucuchinguichu. Jatun mandajcunata urmachijcunapipish, ama cambaj yuyaita churanguichu.

⁴ Lemuel, canca ama machanguichu. Chaica mana jatun mandajcunapajchu. Mandajcunapish vinota, sidrata mana ubyanllacunachu.

⁵ Ñataj chaicunata ubyashpaca, alli mandanata cungarinmancuna. Llaquichishcacunapaj allita ruranatapish saquinmancuna.

⁶ Sidrataca llaquilla causajcuna ubyachun cuichijlla, vinotapish shaicushca cajcuna ubyachun saquichijlla.

⁷ Chaita ubyashpami huajcha cashcatapish, llaquicunata apacushcatapish cungarishpa ashallatapish samaringacuna.

⁸ Mana rimai tucujmantaca can rimangui. Mana mitsari tucujcunatapish, juchachijpica can mitsangui.

⁹ Cambaj shimihuanca, cashcata mandashpa mitsangui. Huajchacunapaj, imata mana charijcunapajca, alli ricushpa cashcata rurangui.

Allita ruranata yachaj huarmita alli nishca shimicunami

¹⁰ Yuyaisapa yachaj huarmitaca, ¿pitaj jahualla japi tucungari? Chashna alli huarmica achij nicuj sumaj rumicunatapish maihuan yalli valijmari.

¹¹ Cusaca paipimi shunguta churan. Paihuanca ima illaj mana causanchu.

¹² Paica llaquichinapaj randica, cusa cushicunata rurashpami causan.

¹³ Millmatapish, linotapish maipipish randishpami, cushicushpa paipaj maquihuan sumajta ahuan.

¹⁴ Carumanta sumaj micunacunata randishpami, c'atunacunahuan jatun barco shamuj shina chayamun.

¹⁵ Utcata jatarishpami paipaj tucui familiacunaman caran. Pai huiñachishca huarmicunamanpishmi raquin.

¹⁶ Alli allpata ricushpami, paipaj maquihuan ganashca cullquihuan randin. Chai allpapica uvata tarpushpami, alli chagrata ruran.

¹⁷ Imata rurangapajpish, sinchi sinchita chumbillishcami purin. Paipaj rigracunapish, mana shaicuj rigracunami.

¹⁸ Randishcapish, c'atunapish alli llujshichun ricuranmi. Paipaj lamparapish tutaca rupacunllami.

¹⁹ Shuj maquihuanca sijsijta, caishuj maquihuanca puchcana ruedata cuyuchishpa puchcacunllami.

²⁰ Huajchamanpish, ima illajcunamanpish maquita cacharishpami caran.

²¹ Rasujpipish paipaj huahuacuna chirichinataca mana manchanchu. Paipaj tucui familiamari racu churanacunahuan purin.

²² C'atacunatapish paillatajmari ahuan. Churanacunatapish ashtahuan alli linota ahuashpami, morado sumaj churanacunata churarin.

²³ Paipaj cusapish, llajtata mandaj yuyajcunahuan pueblo pungu tandanacuipi tiyarishpaca, tucuicuna rijsinalla runami.

²⁴ Sumaj linsocunata ahuashpami c'atun. C'atushpa randishpa purijmanmari sumaj chumbicunata c'atun.

²⁵ Paipajca imata mana atichij cana, tucuicuna alli nishca canaca, sumaj churanata churarishca shinami. Caya minchatapish paica asinllami.

²⁶ Paica alli yachaihuanmi imatapish shimi llujshin. Llaquij canatami yachachishpa mandan.

²⁷ Huasipi imapish alli cachun ricuranmi. Micunallatapish mana yanga micushpa tiyanchu.

²⁸ Paipaj huahuacuna jatarishpapish, cushicui mamita nincunami. Cusapish cashnami nishpa cushichin:

²⁹ “Achca huarmicunami allita rurancuna. Ashtahuancarin canmari tucuicunata yalli allita ruraj cangui” ninmi.

³⁰ Ñahuilla sumaj cashpaca, inquitanllami. Ricuilla c'uyananqui cashpaca, yangallami. Ashtahuanpish Mandaj Diosta manchaj huarmimari, tucuicuna alli nishca canga.

³¹ Paipaj maquihuan trabajashcamantaca, paimanpish allita cutichichigari. Pai imallata rurashcamantaca, pueblo pungupipish alabaichigari.