PROVERBIOS 3 - Dios Rimashca Shimicunami

Alli yachaita cazuchun cunashcami

¹ Ñuca huahualla, ñuca yachachishcataca, ama cungaringuichu. Ñuca mandashcacunatapish cambaj shungupi huaquichingui.

² Chashna rurashpami, uni huatacunata sumajta causangui.

³ Llaquij canata, mana umaj canataca, amataj saquinguichu. Cungapi aparishca shina, shungupi quillcashca shina chai yuyai puringui.

⁴ Chashna alli cajpimi Taita Diospish, runacunapish c'uyashca, alli nishca tucungui.

⁵ Mandaj Diospi cambaj tucui shunguta churangui. Ama can alli yuyaiyuj cashcallapi shunguta churanguichu.

⁶ Imata rurangapajpish, Diosta yuyaipi charingui. Paimi cantaca alli ñanta pushanga.

⁷ Canllataj yachaisapa cashcataca, ama yuyanguichu. Ashtahuanpish Mandaj Diosta manchashpa, tucui millaimanta anchuringui.

⁸ Paita cazushcami cambaj aichatapish jambinga. Cambaj tullucunatapish samachingami.

⁹ Can imalla charishcacunahuanpish, Mandaj Diosta jatunyachingui. Cambaj chagracunapi punta p'ucushca tucui granocunamantapish paimanraj cungui.

¹⁰ Chashna rurashpami, huaquichinacunapipish tallirijta huaquichingui. Llullu vinotapish yalli yallitami japingui.

¹¹ Ñuca huahualla, Mandaj Dios imamanta llaquichijpica, ama mana alli ninguichu. Imata jarcajpica, ama p'iñaringuichu.

¹² Yayaca paipaj churitaca c'uyashpamari, mana allitaca jarcan. Chashnallataj Mandaj Diospish, pai c'uyashca huahuatamari mana allitaca jarcashpa llaquichin.

¹³ Maijanpish cai alli yachaita yachashpa, alli yuyaita charijca cushicunmi.

¹⁴ Paicunapajca cullquita japishcatapish yallimari. Ashtahuan alli curita japishpa charijyashcatapish yallimari.

¹⁵ Sumaj achij nicuj rumicunata charishcatapish yalli valijmari. Chai yachashcahuanca, munanayaj sumaj charinacunapish mana ch'imbapuraipajmi.

¹⁶ Paipaj alli maquipica, uni causaitami charicun. Lluqui maquipica, tucui laya allicunatapish, alli nishca canatapishmi charicun.

¹⁷ Paipaj ñancunaca, cushicushpa purina ñancunami. Pai cushca causaipish sumajmari.

¹⁸ Chai yachanaca paipi charirijcunapajca, causaita cuj yurami. Paita ña chariracujcunaca cushicunmari.

¹⁹ Mandaj Diosca alli yachaj cashpami, cai pachataca rurarca. Alli yuyaiyuj cashpami, jahua pachatapish sinchita churarca.

²⁰ Tucuita yachaj cashpami, jatun yacucunatapish ishquipi ch'icanchirca. Paimantami jahua pachamantapish tamya urman.

²¹ Ñuca huahualla, caicunataca pajta cambaj ñahuimanta anchuchinguiman. Mandashcatapish, cunashcatapish huaquichingui.

²² Chaimi cambaj almamanca causaita cunga. Cunga uripi ima sumaj ricunata aparishca shinami canga.

²³ Cambaj ñanta ricushpapish, ima manchai illajmi puringui. Chaquillapish imapi mana ñitcaringachu.

²⁴ Dormingapaj siririshpapish, imata mana manchanguichu. Siririshcahuan sumajta dorminguillami.

²⁵ Cungaillapi ima llaqui japinatapish mana sustaringuichu. Diosta mana manchajcunapaj shamuj llaquitapish mana manchanguichu.

²⁶ Mandaj Diosllapimi shunguta churangui. Ima mana allipi cambaj chaqui huashicunamantapish paica huaquichingami.

²⁷ Huajchacuna canta ima allita rurachun mañajpica, ayudai tucushpaca, ama huahuayashpa ayudanguilla.

²⁸ Pi imata mañajpipish maquipi charicushpaca, caya cushatajchari nishpa, ama tigrachishpa cachanguichu.

²⁹ Maijancuna canpi shunguta churashpa causajpipish, ama ima llaquita ruranata yuyaringuichu.

³⁰ Manapish canta p'iñachicujpica, pihuanpish ama canraj p'iñanacuita mashcanguichu.

³¹ Manapish cashcata ruraj runapaj ima charishcacunataca, ama munanguichu. Charijyangapajlla pai imata rurajpipish, ama chaita catinguichu.

³² Mandaj Diosca millaita rurajtaca, manataj ricunachinchu. Ashtahuanpish cashcata rurajcunahuanca, tandallami causan.

³³ Mandaj Diosca paita mana manchajpaj huasipica, llaquitamari churan. Ashtahuanpish cashcata rurajcunapaj huasipica, bendiciangamari.

³⁴ Mana cazushpa asijcunataca, Mandaj Diospish asingami. Ashtahuanpish alli shungucunapajca, c'uyashpa allita cunmi.

³⁵ Yachaisapacunaca, alli nishca canatami japingacuna. Ashtahuanpish rumi shungucunaca, jatun pingai tucunatami japingacuna.