PROVERBIOS 28 - Dios Rimashca Shimicunami

Allihuan mana allihuan ch'imbapurashpa yachachishca yuyaita japinacunami

¹ Diosta mana manchaj runaca, pi mana catijpipish, miticunaman callpanllami. Ashtahuanpish cashcata ruraj runaca, león shina ima manchaita mana charinchu.

² Llajtapi causajcuna mana cazushcamantami, mandajcunaca huasha huasha yaicuncuna. Ashtahuanpish yuyaisapa, yachaisapa mandajtaca pi mana cuyuchinchu.

³ Huajcha runallataj caishuj huajchacunata imatapish quichujca, tucui chagracunata llaquichij jatun tamya shinami.

⁴ Mandashcata shitajcunaca, Diosta mana manchajcunatarajmi alli nincuna. Ashtahuanpish mandashcata pajtachijcunaca, paicunata jarcancunami.

⁵ Millai shungu runacunaca cashcata ruranataca mana yachancunachu. Ashtahuanpish Mandaj Dios yuyailla causajcunaca, chaita ruranataca tucuitami yachan.

⁶ Charij cashca jahua millaita rurashpa purij canapaj randica, huajcha cashpapish ima pandata mana rurashpa causanamari alli.

⁷ Mandashcata pajtachij churica, alli yuyaiyujmari. Ashtahuanpish micucujllacunahuan tandanacujca, yayatamari pingachin.

⁸ Huahua cullquita japishpa jahuanpi jahuanpi charijyajcunaca, huajchacunata llaquijcuna japichunllami huaquichincuna.

⁹ Mandashcata mana uyasha nijtaca, pai mañashcatapish Diosca manataj uyanachinchu.

¹⁰ Alli runacunata umashpa millai ñanpi churajcunaca paicunallataj allashca jutcupimi urmangacuna. Ashtahuanpish ima pandata mana rurajcunaca, allitami japingacuna.

¹¹ Charij runaca jatun yachajmi cani yuyanmi. Ashtahuanpish huajcha runalla cashpapish, yuyaisapa cashpaca, pai imata yuyacujtaca ricunllami.

¹² Cashcata rurajcunapaj cushicuna tiyajpica, tucuicunami jatunta cushicuncuna. Ashtahuanpish Diosta mana manchajcuna mandanapi tiyarijpica miticugrincunami.

¹³ Juchacunata pacaj runaca, mana alli causai tucungachu. Ashtahuanpish tucuita huillashpa, chai juchacunata saquijca, Taita Dios llaquishcami canga.

¹⁴ Diosta manchashpa causaj runaca cushicunmi. Ashtahuanpish sinchi shungu tucushpa mana cazuj runaca jatun llaquipimi urmanga.

¹⁵ Diosta mana manchaj mandajca, huajchacunapajca manchananata huacaricuj león shina, yaricaihuan huañucuj oso shinami.

¹⁶ Yuyaita mana japij mandajca, paiman imatapish cuchunllami mañan. Ashtahuanpish charij tucuna yuyailla canata mana munaj mandajca, unita mandacungallami.

¹⁷ Huañuchij runaca huañuna punllacama miticushpallami purin. Chai runataca huañunamanta pi mana jarcaipajmi.

¹⁸ Ima pandata mana rurashpa causajca, llaquimanta quishpiringallami. Ashtahuanpish millaita rurashpa causaj runaca ima llaquipipish urmangallami.

¹⁹ Allpapi chagrata rurashpa causajca, micungapajpish pajtatami charin. Ashtahuanpish q'uillacunata catijca, huajchallami causanga.

²⁰ Shunguta churaipaj alli runaca, achca allicunatami japinga. Ashtahuanpish utca charij tucuna yuyailla purijtaca imatapish juchachinllacunami.

²¹ Ñahuita ricushpalla cacharinaca, mana allichu. Maijanpish chaita ricushpaca, amulli tandaraicullapish mana cazunllami.

²² Mitsa runaca utca charijyanallatami munan. Chashna cashpapish huajcha tucunataca mana yachanchu.

²³ Pi ima pandata ruracujpipish, alli nij tucuj runapaj randica, jarcashpa rimaj runarajmi q'uipataca c'uyashca canga.

²⁴ Yaya mamapajta imatapish shuhuashca jahua, ima millaita mana ruracunichu nijca, huañuchijpurallatajmi.

²⁵ Imatapish p'iña p'iña quichusha nij runaca, macanacuillatami callarichin. Ashtahuanpish Mandaj Diospi shunguta churajmanca allicunata cungatajmi.

²⁶ Quiquin yuyashcallapi shunguta churaj runaca rumi shungu runami. Ashtahuanpish alli yachaihuan causajca, ima llaquimantapish quishpiringami.

²⁷ Huajchaman carajca, mana huajcha causangachu. Ashtahuanpish ñahuita shujman churajca, llaqui tucushca alli canman nishcallami causan.

²⁸ Diosta mana manchajcuna mandanata japijpica, manchashpa miticuncunami. Ashtahuanpish paicuna chingarijpica, cashcata rurajcunaca mirarinmi.