PROVERBIOS 23 - Dios Rimashca Shimicunami

¹ Jatun amohuan micunapaj tiyarishpaca, pihuan tiyacushcata alli yuyaringui.

² Micunaihuan huañucushpapish, ch'ucata tigrachishpa millpungui.

³ Chai amopaj sumaj micunacunataca, ama caitapish chaitapish micunata yuyanguichu. Ñataj inquitangapajlla chashna ruracunman.

⁴ Ama charij tucuna yuyailla caichu. Chaita saquishpa alli yuyaita japiyari.

⁵ ¿Maitataj yangalla caj charinacunapica, cambaj yuyaita churanguiyari? Chaicunaca alas jundajpi águila jatarishpa, jahuata rij shina ñapish chingaringallamari.

⁶ Mitsa runahuanca, ama micuj tiyaringuichu. Paipaj sumaj micunatapish amataj munanguichu.

⁷ Paica micunaman cayashpapish, shungupi millaita yuyashpallami cayanga. Micuilla ubyailla nishpapish, mana shunguhuantaj chashna ningachu.

⁸ Micushca q'uipaca shungu tigraj shinami tucuimanta tigrachina tucungui. Can sumajta pagui nishcapish yangallamari canga.

⁹ Rumi shungu runataca, ama imata rimanguichu. Can cushca alli yuyaicunataca, yangata rurashpa asingallami.

¹⁰ Ñaupaman cambaj allpa muyundijpi churashca rumicunataca, ama caishujpaj allpaman tanganguichu. Yaya mama illaj huahuacunatapish allpata ama quichunguichu.

¹¹ Paicunata mitsaj, tucuita rurai tucuj Diosmari paicunamanta shayarishpa cantaca llaquichinga.

¹² Ñuca yachachishcapi cambaj yuyaita churai. Alli yachajta ruraj cai shimicunataca, rinrinta mañachishpa uyayari.

¹³ Huahuacuna imamantapish alli tucuchun llaquichinataca, pajta saquinguiman. Anguhuan llaquichijllapica, mana huañungachu.

¹⁴ Anguhuan llaquichishpa yachachishpamari, paipaj alma Seolman rinamantaca quishpichingui.

¹⁵ Ñuca huahualla, ñuca yachachishcata shungupitaj yachaisapa cajpica, ñuca shungupish cushicungamari.

¹⁶ Cambaj shimihuan allita rimajpica, ñuca shungupish jatuntamari cushicunga.

¹⁷ Juchasapacuna imallata charishcataca, shungullapipish amataj munanguichu. Ashtahuanpish cambaj tucui causaipi Mandaj Diosllata manchangui.

¹⁸ Chashna rurashpami canca alli causangui. Can imata shuyacushcatapish, mana yanga shuyashpalla saquiringuichu.

¹⁹ Ñuca huahualla, ñucata uyashpa yachaisapa cayari. Caticushca alli ñantaca, chai yuyai catinguilla.

²⁰ Vinollata ubyajcunahuanpish, aichallata micujcunahuanpish pajta tandanacunguiman.

²¹ Machajcunapish, yalli micujcunapish huajchayanllami. Yalli dormishpami, llachapallata churarincuna.

²² Cambaj yaya cunashcata cazungui. Cambaj mama ña yuyajyajpipish, ama millashpa p'iñangui.

²³ Mana llullaj shimitapish, alli yachaitapish, alli yuyaitapish yachachishcataca randishpa ama tigra c'atungui.

²⁴ Cashcata rurajpaj yayaca, jatuntami cushicunga. Yachaisapa churiyujpish, paihuan cushicungami.

²⁵ Achij punllata ricuchij cambaj yayapish, cambaj mamapish, cushicuna huahua cayari.

²⁶ Ñuca huahualla, cambaj shungutaca ñucaman cuhuayari. Cambaj ñahuihuanca ñuca ima shina causajta chaparaiyari.

²⁷ Huainayashpa causaj huarmihuan cashpapish, cusayuj shujtaj huarmihuan cashpapish juchapi urmanaca, mana llujshi tucuipaj jatun jutcupi urmashca shinami.

²⁸ Chai huarmicunaca shuhua shina chapashpami, millaita rurachincuna. Paicunamantami achca c'aricuna cazuj canata saquincuna.

²⁹ ¿Pitaj nanaihuan aij nishpa purin? ¿Pitaj p'iñanacushpa purin? ¿Pitaj yanga macashpa chugrichishca purin? ¿Pitaj huacaihuan purin? ¿Pitaj verde ñahui purin?

³⁰ Machanata manataj saquijcuna, chagrushca ubyanacunata mashcashpa machagrijcunamari chashna llaquinayajta purincuna.

³¹ Vasopi achij nicuj pucajlla vino tiyacujpipish, cambaj ñahuitaca ama chaipi churanguichu. Cungataca mishquijllami millpuringa.

³² Ashtahuanpish q'uipataca culebra canishca shinami llaquichinga.

³³ Cambaj ñahuipica, mana ricushcami ricuringa. Shungumantapish millai shimicunami llujshinga.

³⁴ Mama cuchapi siricushca shinami cangui. Jatun barcopaj caspi puntapi tiyacushca shinapishmi cangui.

³⁵ Dormicushcamanta rijcharishpaca: “Chugrichishcacunamari, manamari nanarcachu. Macashcacunamari mana yuyarinica. ¿Maipitaj ashtahuan machagrini?” nishpami jataringui.