PROVERBIOS 21 - Dios Rimashca Shimicunami

¹ Jatun mandajpaj shungutaca, Mandaj Diosmi paipaj maquipi charicun. Uchilla larcacunapi yacuta chaupij shina, pai munashcatami rurachin.

² Tucuicunallatajmi imata rurashpapish, allitami ruranchij yuyancuna. Shina cajpipish, Mandaj Diosmi shungucunataca ricucun.

³ Mandaj Diosca cashcata rurashpa alli yuyaihuan causajpimi, paiman cushpa rupachishcatapish yalli cushicun.

⁴ Shujtajcunata p'iña ñahuihuan ricunapish, shungupi jatun tucunapish, Diosta mana manchana yuyaipish juchami.

⁵ Imatapish alli yuyarishpa chai yuyai trabajaj runaca causaipaj charintajmi. Ashtahuanpish yuyarishcahuan ucui jahua imatapish rurajcunaca, ashtahuan huajchayashpami catincuna.

⁶ Umashpalla jahuanpi jahuanpi charijyajcunaca, huañuitami mashcancuna. Chai charinacunapish samai shina chingarinllami.

⁷ Mana manchajcunaca cashcata ruranataca, mana munancunachu. Paicuna shuhuashpa charishcallatajmi tucuchinga.

⁸ Millai runapaj causaica, llaqui japinalla huishtu ñan shinami. Ashtahuanpish chuya shungu runacuna rurashcaca allimari.

⁹ Jatun huasipi cashpapish, rimarishpa p'iñachicujlla huarmihuan causanaca jatun llaquimi. Chaipaj randica huasi jahuapi quiquinlla causanarajmi alli.

¹⁰ Diosta mana manchaj runaca, pitapish llaquichinallatami munan. Pita llaquinataca mana yuyancunachu.

¹¹ Mana cazushpa asijcunata macajta ricushpaca, yachai illaj runapish yachaisapami tucun. Yachaisapa runacarin cunajllapitaj, ashtahuanmi yachashpa catin.

¹² Diosta mana manchaj runataca, paipaj juchallatajmi jatun llaquipi churashpa chingachin. Chaitaca cashcata ruraj runaca, quiquin ñahuihuantajmi ricun.

¹³ Huajcha runa caparishpa mañajpi mana uyajtaca, q'uipata pai caparijpipish, pi mana uyangachu.

¹⁴ Imata pacalla camarishcaca yallitaj p'iñarishcatapish allichinllami. Chashna imallatapish ugllachishcaca, mana ricunachicujpipish allipi churanllami.

¹⁵ Cashcata ruraj runaca allita rurashcahuanmi cushicun. Ashtahuanpish chai allica millaita rurajcunapajca, tucuchij llaquimi ricurin.

¹⁶ Alli yuyaihuan causanapaj alli yachaita saquijca, huañushcacunahuanmi tandanacugringa.

¹⁷ Ima shinapish aichapi cushicuj runaca, imapish illajmi causanga. Vinotapish, mishquijllata ashnaj jambicunatapish munajca, manataj charijyangachu.

¹⁸ Cashcata ruraj runapaj randica, Diosta mana manchaj runatami llaqui japinga. Allicunapaj randica, mana cazuj runatami llaqui japinga.

¹⁹ Manchanayajta p'iñarishpa c'amij huarmihuan causanapaj randica, shitashca pambapi quiquinlla causanarajchari alli canman.

²⁰ Yachaisapa runapaj huasipica, sumaj charinacunapish aceitepishmi tiyan. Ashtahuanpish ch'ahuan runaca, yanga tucuchinllami.

²¹ Cashcata ruraj canatapish, llaquij canatapish mana saquijca, cushi causaitapish ima allicunatapish charingami, alli nishcapishmi canga.

²² Yachaisapa runaca, c'ari c'aricunatapish pueblota quichurcallami. Paicuna shunguta churashca jatun pircatapish jahualla urmachircallami.

²³ Maijanpish c'alluta jarcarijca, quiquin causaitami llaquipi yaicunamanta huaquichin.

²⁴ Imata ruranapipish yallitaj jatun tucushpa c'ari tucujtaca, mana cazushpa asirij upa runa nincunami.

²⁵ Q'uilla runaca imatapish charina yuyaihuan huañucunllami. Shina cashpapish maquita mapayachinataca, mana munanchu.

²⁶ Shujcunaca imatapish tucui punlla munashpallami cainan. Ashtahuanpish cashcata ruraj runaca, maquita cacharishpa cungapajpishmi charin.

²⁷ Taita Diosca paita mana manchajcuna, imata cushcataca manataj ricunachinchu. ¡Millai yuyaihuan cushcatacarin maitataj chasquingari!

²⁸ Manapish ricushcata llullashpalla huillaj runaca huañungatajmi. Ashtahuanpish uyashcatataj huillajca, mana llullapi japi tucungachu.

²⁹ Diosta mana manchaj runaca ñahuipica, imata mana rurashcatami ricuchisha nin. Ashtahuanpish alli runaca imapish mana llaquipi churanatami ruran.

³⁰ Ima alli yachaipish, alli yuyaipish, alli cunashcapish Mandaj Diospaj munaitaca mana shujtajyachi tucunchu.

³¹ Macanacui punllaca caballocunatapish allichirishpami llujshirincuna. Ashtahuanpish mishanataca, Mandaj Dios mishachijllapimi mishancuna.