PROVERBIOS 2 - Dios Rimashca Shimicunami

Cai shimicunaca allicunata cungami

¹ Ñuca huahualla, ñuca shimicunataca, cambajtaj cashcata yuyangui. Ñuca mandashcacunatapish, shungupi huaquichingui.

² Alli yachaitaca, rinrinta mañachishpa uyangui. Alli yuyaicunataca, tucui shunguhuan munangui.

³ Alli yachaitaca, caparishpa mañangui. Alli yuyaitaca, uyangacama cayangui.

⁴ Cullquita mashcaj shina, pacashca tiyacuj ima sumaj charinacunata mashcaj shina tucui yuyaihuan mashcangui.

⁵ Chashnamari Mandaj Diosta manchanataca yachangui. Taita Diosmanta alli yachaitapish japinguimi.

⁶ Mandaj Diosllamari alli yachaita cun. Paipaj shimimantami alli yachajta, alli yuyaiyujta ruraj shimicuna shamun.

⁷ Paimi allita rurajcunamanca, mana pandachij alli yachaita cun. Mana pandarishpa causajcunataca, paimi escudo shina huaquichin.

⁸ Cashcata rurajcunata cuidajmi, paipajllacunata huaquichijmi.

⁹ Pai yachachishcahuanmi cashcata ruraj canatapish, allita ruraj canatapish, mana pandarij canatapish, tucuipi alli canatapish yachangui.

¹⁰ Cai alli yachaitaca, cambaj shungupi chasquingui. Mishquichij shina ashtahuan yachanata munangui.

¹¹ Chashna rurajpica, cai alli shimicunaca canta huaquichingami. Cai alli yuyaicunaca imamantapish quishpichingami.

¹² Cantaca mapa causanamantapish, millaita rimajcunamantapish huaquichingami.

¹³ Chai runacunaca alli ñanta saquishpami, amsa ñancunata purincuna.

¹⁴ Paicunaca millaita rurashpami cushicuncuna, mapa munaicunata rurashpami huaicashpa asincuna.

¹⁵ Paicunaca huishtu ñantami purincuna, pandatami causancuna.

¹⁶ Cai shimicunallatajmi cantaca, shujtaj huarmicuna mishquijlla shimicunahuan inquitashpa urmachinamanta huaquichinga.

¹⁷ Chai huarmicunaca, chairaj cashpa cazarashca cusata shitashpami, paipaj Diospaj ñaupajpi ari ninacushcata p'aquincuna.

¹⁸ Chai huarmicunapaj huasica, huañuipi urmanallami tiyacun. Paicunapaj ñancunaca, huañushcacunapajman chayachijmi.

¹⁹ Maijanpish chai huarmicunahuan chayarinacushpaca, causaimanca ña mana tigranchu. Alli ñanpica, ña mana chaquita churangachu.

²⁰ Canca allicunapaj ñantami purina cangui. Cashcata rurajcunapaj ñantami catina cangui.

²¹ Allita rurajcunallami cai llajtapica causangacuna. Ima pandata mana rurajcunallami cai allpamantaca mana chingaringacuna.

²² Ashtahuanpish Diosta mana manchajcunaca, cai llajtamanta llujshichishpa cachashcami canga. Mana cazujcunapish, sapimantami aisashpa shitashca cangacuna.