PROVERBIOS 14 - Dios Rimashca Shimicunami

¹ Yachaisapa huarmica paipaj huasitaca, allimi shayachin. Ashtahuanpish rumi shungu huarmica, shayachishca huasitapish paipaj maquihuanmi urmachin.

² Ima juchachina illajlla causaj runaca, Mandaj Diosta c'uyajmi. Ashtahuanpish huishtu ñanpi purij runaca p'iñanmi.

³ Rumi shungu runapaj shimimantaca, jatun tucushcamanta llaquipi churaj shimicunami llujshin. Ashtahuanpish yachajcunapaj shimimantaca, ima llaquimantapish huaquichij shimicunami llujshin.

⁴ Yapungapaj huagracuna illajpica, huaquichinacunapish grano illajllami tiyan. Huagracuna tiyajpimi, granocunataca llashaj llashajta tandarin.

⁵ Cashcata huillaj runaca ima cajpipish, mana llullashpa huillanchu. Ashtahuanpish llulla runaca, imata huillashpapish llullantajmi.

⁶ Mana cazushpa asijcunaca alli yachaita yachasha nishpapish, manataj yachai tucunchu. Ashtahuanpish yuyaisapa runapajca, alli yachaita yachanaca jahuallamari.

⁷ Rumi shungu runahuanca, ama ashtahuan purichu. Paimantaca alli yachanata mana japinguichu.

⁸ Alli yuyaiyujpaj yachanaca, alli yuyaihuan causanami. Ashtahuanpish rumi shungu runacunaca, yachai illaj cashcamantami umarishpa causancuna.

⁹ Rumi shungucunaca millaita rurashpapish, mana manchashpami asincuna. Ashtahuanpish alli runacunaca, quiquinllataj nanarishpami, alli tucunata mashcancuna.

¹⁰ Llaquilla cajpipish, cushijlla cajpipish, quiquin shungullami yachan. Chaitaca shujtajcunaca mana yachai tucunchu.

¹¹ Mana manchajcunapaj huasitaca, jatun llaquicunami tucuchinga. Ashtahuanpish alli runacunapaj huasipica, sisashca shinami ricuringa.

¹² Cai pachapi causajcunapaj ñanca, quiquin yuyaipi alli ricurishpapish, huañuiman chayachigrij ñancunallami.

¹³ Asicujpipish shunguca llaquillatajmi, cushicushpa asishca q'uipaca, llaquillatajmi saquirin.

¹⁴ Rumi shungu runaca, paipaj millai causaimantaca, jatun llaquicunatami japingacuna. Ashtahuanpish alli runaca, paipaj causaimantaca cushicungami.

¹⁵ Yachai illaj runaca imata nijpipish, crishpa catinllami. Ashtahuanpish yachajcunaca imata rurangapajpish, alli yuyarinrajmi.

¹⁶ Yachaisapa runaca millaita ruranataca, manchashpa jarcarinmi. Ashtahuanpish ch'ahuanyashca runaca millaita rurashpapish, mana manchashpa jatun tucushpami purin.

¹⁷ Jahualla p'iñarij runaca, imatapish maipish cachun ruranllami. Chashna millai runataca, tucuicunami p'iñancuna.

¹⁸ Yachai illajcunaca, rumi shungu canata japinllami. Ashtahuanpish alli yuyaiyujcunaca, alli yachaihuanmi coronata churarishca shina tucungacuna.

¹⁹ Millai runacunaca, alli shungu cajcunapaj ñaupajpimi cunguringacuna. Mana manchajcunapish cashcata rurajpaj huasi pungupimi cunguringacuna.

²⁰ Huajchaca, paihuan apanacuj runapipish p'iñai tucunmi. Charijllatami achcacuna c'uyan.

²¹ Maijanpish shujtajcunata p'iñashpaca, juchatami ruran. Ashtahuanpish huajchacunata llaquijca, cushicuitami japin.

²² Millaita ruranata yuyajcunaca, ¿manachu pandarincuna? Allita ruranapi yuyaita churajcunaca, pipish c'uyashpa, allita cushcami causancuna.

²³ Tucui yuyaihuan imatapish rurajpica, japinapish tiyanmi. Ashtahuanpish yanga rimarijllacunaca, huajchallatajmi causancuna.

²⁴ Yachaisapacunapajca, charijyashcami coronata churarishcata ricuchin. Ashtahuanpish ch'ahuancunaca, rumi shungu cashcahuanmi cushicuncuna.

²⁵ Imata ricushpapish mana llullashpa huillajca, huañunapi tiyacujtapish quishpichinmi. Ashtahuanpish llullajca, llullashpallami huillan.

²⁶ Mandaj Diosta manchajcunapajca, ima manchai mana tiyanchu. Paicunapaj huahuacunapish, Diospimi shunguta churancuna.

²⁷ Mandaj Diosta manchanaca, causaita cuj yacu shinamari. Paita cazujcunaca, huañuchij linchipi urmanamanta quishpichijmi.

²⁸ Jatun mandajca achcacunata mandaj cashpami, jatun cashca ricurin. Ashtahuanpish mana achcacunata mandajca urmanllami.

²⁹ Utca p'iñarij runaca, rumi shungu canatami jatunyachin. Ashtahuanpish mana utca p'iñarijca, yuyaita japishca, alli runamari.

³⁰ Cushijlla shunguca, aichamanpish causaita cunmi. Ashtahuanpish shujtajcuna shina canata munanaca tullu ungüitapishmi apamun.

³¹ Huajchata llaquijca, paita Ruraj Diostamari cushichin. Ashtahuanpish p'iñashpa llaquichijca, paita ruraj Diostamari llaquichin.

³² Mana manchaj runataca pai millai cashcallatajmi, jatun llaquipi churan. Ashtahuanpish cashcata ruraj runaca, huañucushpapish shunguta churanmi.

³³ Alli yachaica, alli yuyaiyujcunapaj shungullapimi tiyan. Ashtahuanpish rumi shungucunataca, pi mana rijsinchu.

³⁴ Cashcata rurashpa causashcami llajtatapish jatunyachin. Ashtahuanpish juchaca llajtacunataca, jatun llaquipimi churan.

³⁵ Jatun mandajca, paipaj runa alli yuyaiyuj cajpica c'uyanmari. Ashtahuanpish paita pingachij runataca p'iñanmi.