PROVERBIOS 13 - Dios Rimashca Shimicunami

¹ Yachaisapa churica, yaya cunashcata cazunmi. Ashtahuanpish chanzata ruraj churica, mashnata jarcajpipish manataj uyanchu.

² Maijanpish allita rimashpaca, allicunallatatajmi japin. Ashtahuanpish mana cazujcunaca llaquitami japingacuna.

³ Maijanpish shimi cacharishca canata huaquichirijca, quiquin causaitami huaquichin. Ashtahuanpish shimi cacharishca runaca, jatun llaquitami japinga.

⁴ Q'uilla runaca imata charisha nishpapish, manataj japinchu. Ashtahuanpish tucui yuyaihuan trabajajcunaca charijyancunatajmi.

⁵ Cashcata rurajcunaca llullaj canataca, manataj munancunachu. Ashtahuanpish Diosta mana manchaj runaca, paillatajmi p'iñai tucushpa pingai tucun.

⁶ Ima pandata mana rurashpa causaj runataca, cashcata rurashcamari huaquichin. Ashtahuanpish juchata ruraj runataca, Diosta mana manchashpa causashcami llaquiman apan.

⁷ Maijancunaca imata mana charijcunapish charijcunaman rijchajcunami. Maijancunaca charij cashpapish, huajchacunaman rijchajmi.

⁸ Charij runaca imamanta huañuchisha nijpica, cullquihuanmi quishpirincuna. Ashtahuanpish huajcha runataca, pi mana huañuchisha nishpa manchachinchu.

⁹ Cashcata rurajcunapaj luzca, ashtahuan achijllami tucunga. Ashtahuanpish mana manchajcunapaj lámpara ninaca huañungami.

¹⁰ Jatun tucushcacunaca p'iñanacunllami. Ashtahuanpish cunashcata chasquijcunaca, alli yachajcunami tucun.

¹¹ Yanga ruranacunahuan charijyajcunaca, japishcahuanmi tucuchincuna. Ashtahuanpish trabajashpa japijcunaca mirachincunami.

¹² Shuyacushca utca pajtashcaca, causaita cuj yura shinami. Ashtahuanpish mana utca pajtajpica, shungu p'aquirishpami llaquirincuna.

¹³ Imalla rurai nishcata mana cazushpa p'iñajcunaca, chaillamantatajmi jatun llaquita apangacuna. Ashtahuanpish mandashcata cazushpa causaj runaca, allitamari chasquinga.

¹⁴ Yachaj runa mandashca shimicunaca, causaita cuj yacu shinamari. Huañuna linchipi urmanamanta quishpichijmari.

¹⁵ Alli yuyaita japishpaca, c'uyaipi churanmi. Ashtahuanpish mana cazujcunaca, llaquitami causancuna.

¹⁶ Alli yuyaiyuj runaca alli yachaihuanmi imatapish ruran. Ashtahuanpish rumi shungu runaca, yachai illaj cashcatami ricuchin.

¹⁷ Ima huillanatapish mana alli huillajca, llaquichishpami saquin. Ashtahuanpish cashcatataj huillajca, cushichishpami saquin.

¹⁸ Cunashcata mana munajca p'iñashcapish, huajchapishmi tucunga. Ashtahuanpish alli tucuchun rimashcata chasquij runaca, alli nishcami tucun.

¹⁹ Munashcataj pajtashpaca shunguta cushichinmi. Ashtahuanpish rumi shungucunaca, millai ruranata saquinataca mana munancunachu.

²⁰ Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman.

²¹ Juchasapacunataca llaquicunallami chaqui huashapi catiracun. Ashtahuanpish cashcata rurajcunaca, allicunatami chasquincuna.

²² Allita rurashpa causaj runaca, imalla charishcacunataca huahuacunapajpish saquincunami. Ashtahuanpish juchasapacuna charishcacunaca, cashcata rurajcunapajmi huaquichishca tiyacun.

²³ Huajchacunapaj chagraca micunapaj pajtatami p'ucun. Ashtahuanpish yachai illaimantami, ima tandanallatapish mana charincuna.

²⁴ Ima cajpipish, alli tucuchun mana llaquichijca, quiquin churillatatajmi p'iñan. Ashtahuanpish c'uyashpatajca, uchillamantapachami llaquichishpa yachachin.

²⁵ Cashcata rurajca micunatapish pajtatami charincuna. Ashtahuanpish Diosta mana manchajcunaca, chushaj huijsami puringacuna.