PROVERBIOS 1 - Dios Rimashca Shimicunami

Cai shimicunaca alli causanata yachachijmi

¹ Cai yuyachij shimicunaca Davidpaj churi, israelcunata jatun mandaj Salomón quillcashcami.

² Cai shimicunaca imapipish alli yachachishcata yachachun yuyaita pascajmi. Alli yuyaiyujta ruraj yuyaicunata ricuchijmi.

³ Alli yuyaiyuj cachun cunashcata chasquishpa, cashcata ruraj canata, alli yuyaiyuj tucunata, allita ruraj canatapish yachachijmi.

⁴ Shinallataj yachai illajcunata, q'uipa huiñaicunatapish alli yuyaita japishpa, alli yuyaihuan causanatami yachachin.

⁵ Yachaisapa runa caita uyashpaca, ashtahuan yachajmi tucunga. Yuyaisapa runapish cunashcata chasquingami.

⁶ Shinallataj yuyaita cuj shimicunata, yachaisapacuna rimashcatapish, yuyaita japina shimicunatapish, pi mana yachai tucuipajcunatapish yachangacunami.

⁷ Alli yachaj cangapaj callarica, Mandaj Diosta manchanami. Chashna cajpipish ch'ahuanyashcacunaca, alli yachaita yachachishcatapish p'iñancunami.

Alli yachaj cunashcami

⁸ Ñuca huahualla, alli causanata cambaj yaya yachachishcataca alli uyayari. Cambaj mama yachachishcatapish ama mana uyasha nichu.

⁹ Chai shimicunaca sumaj coronata cambaj umapi churachishca shinami canga, sumaj huallcata cungapi aparishca shinami canga.

¹⁰ Ñuca huahualla, juchasapacuna inquitajpipish, amataj uyanguichu.

¹¹ Cantaca cashnami ningacuna: “Jacu ñucanchijhuan. Pipish alli puricujta japishcahuan huañuchingapaj chapashun.

¹² Seol shina causajta millpushunllami. Jatun jutcupi huashicuchishca shinami chingachishun.

¹³ Paicunapaj tucui laya sumaj charinacunata shuhuashpa, ñucanchij huasicunapi jundachishpa achca charijcunami tucushun.

¹⁴ Canpish alli charijmi tucungui, ñucanchijhuan jaculla. Ñucanchij japishcacunatapish tucuicuna shujllapimi charishun” ningacunami.

¹⁵ Chashna nijpipish ñuca huahualla, paicunahuanca amataj tandanacunguichu. Paicuna shina purinataca amataj yuyanguichu.

¹⁶ Paicunaca mana allita ruranamanca, callpashpami rincuna. Huañuchinamanpish utcami llujshirincuna.

¹⁷ Pajarocunaca ricunallapi linchita churajpica, mana yaicunchu.

¹⁸ Ashtahuanpish chai runacunaca paicunallataj huañunapajmi trampata churancuna. Paicunapaj llaquipajllatajmi linchita churancuna.

¹⁹ Utca charijyasha nijcunataca, chaillataj causaita quichunllami.

Yachaica tucuicunatami cayacun

²⁰ Alli yachaica ñancunapi purijcunata caparicunmi. Plaza pambacunapi tandanacujcunatapish cayacunmi.

²¹ Puebloman chayamujcunamanpish, pueblopi jatun tandanacuicunapipish tucuicunamanmi cashna caparishpa paipaj yuyaicunataca huillacun:

²² “Yachai illajcuna, ¿maicamataj yachai illajllataj causashun ninguichij? Chanzata rurajcuna, ¿maicamataj chanzata rurashpa cushicunguichigari? Ch'ahuanyashcacuna, ¿maicamataj yachanataca p'iñanguichigari?

²³ Ñuca jarcashcata uyashpa cutirichigari. Chaita rurajpica, ñuca Espiritutaca cancunapi churashami. Ñuca shimicunata yachachishami.

²⁴ Cancunaca mashna cutin cayajpipish, pi mana shamurcanguichijchu. Maquihuan cayajpipish, tigrarishpallapish mana ricurcanguichijchu.

²⁵ Ashtahuanpish ñuca imallata cunashcataca p'iñarcanguichijmi, jarcajpipish manataj uyashun nircanguichijchu.

²⁶ Cancunata jatun llaqui japi punllaca, ñucapish asishami. Cancuna manchashca jatun llaqui japijpica, chanzata rurashami.

²⁷ Cancuna manchashca llaquicunallatajmi tucuchingapaj shamunga. Jatun acapana shinami chayamunga, jatun llaqui, jatun manchaimi cancunataca japinga.

²⁸ Chashna tucushpaca ñucata cayangacunami, ashtahuanpish ñucaca manataj cutichishachu. Utcata jatarishpa mashcashpapish, ñucataca manataj japingacunachu.

²⁹ Alli yachaitami p'iñarcacuna. Mandaj Diosta cazunatami manataj munarcacuna.

³⁰ Ñuca cunashcatapish mana chasquircacunachu. Imata jarcajpipish, manataj cazurcacunachu.

³¹ Paicunapaj causaipi imatami tarpurcacuna, chaillatatajmi micungacuna. Paicuna munashca shina rurashcallamantatajmi amijta micungacuna.

³² Upacunataca paicunapaj panda causaillatajmi huañuiman chayachin. Rumi shungucuna cushicushpa causashcaca, chingarinaman apanllami.

³³ Ashtahuanpish ñuca yachachishcata cazushpaca, imata mana manchashpami causanga. Ima llaqui japinata mana manchashpa, sumajtami causancuna” ninmi.