OSEAS 9 - Dios Rimashca Shimicunami

Yallitaj juchallishpa catijpi israelcunata llaquichishcami

¹ Israelcuna ama cushicuichijchu. Shujtaj llajtacuna saltarishpa cushicuj shina saltarishpa ama cushicuichijchu. Cancunapaj Taita Diosmanta anchurishpami shujtaj dioscunahuan huainayashcanguichij. Trigota trillanacunapi huainayashcamanta japishca cullquihuanmi cushicunguichij.

² Trigo parbacunapish illangami, uvata sarunapi uvapish illangami. Llullu vinoca mana pajta tiyangachu.

³ Mandaj Diospaj llajtapica mana saquiringacunachu. Ashtahuanpish Efrainca Egiptoman, Asiriamanmi tigranga. Chaipica mapa micunatami micunga.

⁴ Mandaj Diosman cushpa vinotapish mana tallingacunachu. Animalcunata huañuchishpa Diosman cushcacunatapish mana chasquingachu. Chaicunaca huañuipi micuna shinami tucunga. Chai micunata micujcunaca tucuicunami mapa cangacuna. Chai micunataca paicunallami micui tucun. Chaitaca Mandaj Diospaj huasimanca mana apai tucungacunachu.

⁵ Mandaj Diospajlla jatun tandanacui punllapica ¿imahuanshi imata ruranguichij? Mandaj Diospajlla fiesta punllapica ¿imatashi cunguichij?

⁶ Chingachigrijpi miticushpa ricujpica, Egiptocunami japingacuna. Menfispimi pambangacuna. Paicunapaj cullqui huaquichinacunapica, chinimi jundanga. Paicunapaj causana huasicunapica, cashami huiñanga.

⁷ Llaquichina punllacunaca chayamushcami. Japina cashcata japina punllacunaca chayamushcami. ¡Israelcunaca chai shamuna punlla chayamushcatami entendingacuna! Cancunallataj yallitaj millaita ruraj cashcamantami profetataca sinchi shungumi tucushca nircanguichij. Alli yuyaiyuj runataca yuyai illajmi tucushca nircanguichij. Cancunaca yallitaj p'iñaj cashcamantami chashna nircanguichij.

⁸ Profetaca Efrainpaj chapajmi. Paica ñuca Taita Diospaj c'uchupimi. Profetapaj ñancunapica, lazyana huascatami churanguichij. Taita Diospaj huasipi cajpipish p'iñanguichijmi.

⁹ Chashnami paicunaca yallitaj millaita rurarcacuna. Gabaapi millaita rurashca shinallatajmi rurarcacuna. Taita Diosca cancuna millaita rurashcacunataca mashna cashcatami ricunga. Cancunapaj juchamantaca llaquichingami.

¹⁰ Shitashca pambapi uvata japij shinami israelcunataca japircani. Callaripica cancunapaj ñaupa yayacunaca ñucapajca punta p'ucushca higo shina ricunanquimi carca. Chashna cashpapish Baal-peor diospajmanmi rircacuna. Pingaichishca cangapajmi ñucamantaca anchurircacuna. Chashna tucushpaca, paicunapaj c'uyashca diosta ñuca millanachishca shinallatajmi, paicunapish ñucapajca millanana tucurcacuna.

¹¹ Efraín jatun cashcaca pájaro shinami callpanga. Chaimanta huahuacuna huacharinapish mana tiyangachu. Chichu huarmicunapish mana tiyangachu. Chichunapish mana tiyangachu.

¹² Paicunapaj huahuacuna jatunyajpipish, paicunapuramantaca anchuchishami. Paicunamanta ñuca anchurijpica, ¡aij imachari tucungacuna!

¹³ Efrainca ñuca ricuipica, Tiropi causajcuna shinami causacun. Shuj sumaj llajtapimi causacun. Chashna cashpapish Efrainca paipaj huahuacunataca huañuimanmi pushanga.

¹⁴ Mandaj Dioslla, paicunaman imata cuna cashcataca cuhuailla. Shullujlla huarmicunata, lecheta mana charij huarmicunata rurahuailla.

¹⁵ Tucui laya millaita ruranataca Gilgalpimi rurarcacuna. Ñucapish chaipimi paicunataca p'iñai callarircani. Paicunapaj rurashcacunaca yallitaj millai cajpimi, ñuca huasimantaca llujshichishpa cachasha. Paicunataca ña mana ashtahuan c'uyashachu. Paicunata mandajcunaca tucuicuna mana cazujcunami.

¹⁶ Efraintaca chugrichishcami. Paipaj sapica chaquishcami, ña mana ashtahuan granongachu. Huacharijpipish paicuna munacushca huahuacunataca ñucami huañuchisha.

¹⁷ Paicuna mana uyashcamantami ñuca Taita Diosca cai llajtamanta llujshichinga. Paicunaca maiman chayanata mana charijcuna shinami tucui llajtacunata puringa.