OSEAS 8 - Dios Rimashca Shimicunami

Rurashcalla dioscunata israelcuna adorajpi sinchita rimashcami

¹ Ñucahuan ari ninacushcata p'aquishcamanta, ñuca mandashcacunata mana cazushpa c'ariyashcamantami Mandaj Diospaj huasi jahuamanca shuj águila shamucun. Chaitaca trompetapi tocashpa huillayari.

² Israelcunaca: “Ñuca Taita Dioslla, cunantajca ñucanchij Taita Dios cashcatami entendinchij” nishpami caparingacuna.

³ Israelca allita ruranatami yanganchirca. Paita p'iñajmi catirashpa llaquichinga.

⁴ Paicunata mandachun jatun mandajcunatami churarcacuna. Manapish ñuca agllashcacunatami churarcacuna. Mandajcunatami churarcacuna. Ashtahuanpish ñucaca mana yacharcanichu. Paicunapaj cullquita, curitaca rurashcalla dioscunatami rurarcacuna. Paicuna chingaringapajllatajmi rurarcacuna.

⁵ Samariacuna, cancunapaj bizi diosmari ñucamantaca caruyachirca. Chaimi paicunahuanca nina sindirij shina p'iñarircani. Cancunapaj juchacunataca mana chuyayachipajmari.

⁶ Israelcuna, chai bizi diosca mana diostajchu. Chaitaca imatapish ruranata yachaj rurashcallami. Chaimanta Samariapaj bizi diosca mirga mirgata rurashpa chingachishcami canga.

⁷ Huairatami tarpurcacuna, huairandij tamyatami tandangacuna. Cozicha punllaca mana tiyangachu. Espigapipish ima grano mana tiyangachu. Granojpipish caru llajta runacunami micungacuna.

⁸ ¡Israelcunataca millpungami! Ñallami mana munashca mangata shitashca shina shujtaj llajtacunapi causagringacuna.

⁹ Israelcunaca Asiriamanmi huichiyarcacuna. Sacha burro callpaj shinami callpanga. Efrainca c'uyajcunatami alquilarca.

¹⁰ Llajtacunapura alquilachinacushca cajpipish, cunanca ñucami tandachisha. Jatun mandajpish, q'uipa mandajcunapishmi asha huatacunata llaquichingacuna.

¹¹ Efrainca juchallingapajmi achca altarcunata rurarca. Juchallingapajllami altarcunataca charirca.

¹² Ñuca mandashcacunataca achcatamari quillcarcani. Chaicunataca mana paicunaman cushcata shinami charircacuna.

¹³ Ñucaman cushpa rupachinacunatapish, aichata cushpami rupachincuna. Aichataca micuncunami. Mandaj Diosca chaitaca mana munarcachu. Cunanca paicuna millaita rurashcataca callarishpa yuyarishpami, paicuna juchallishcamantaca llaquichisha. Egiptomanmi tigrachishpa cachasha.

¹⁴ Israelcunaca paicunata Ruraj Taita Diostami cungarircacuna. Shujtaj dioscunapaj huasicunatami shayachircacuna. Judaca sinchi pircayuj pueblocunatami mirachirca. Chai pueblocunamanca ñucaca ninatami cachasha. Paicunapaj mandana huasicunataca rupachishpami tucuchisha.