OSEAS 6 - Dios Rimashca Shimicunami

Mandaj Diospajman israelcuna tucui shunguhuan cutirishcami

¹ Shamuichij, Mandaj Diosman cutirishunchij. Paimi ñucanchijtaca mirga mirgata rurarca. Paillatajmi jambinga. Paillatajmi chugrichirca. Paillatajmi alliyachinga.

² Ishqui punlla q'uipaca causaita cungami. Quimsa punllapica jatarichingami. Paipaj ñaupajpimi causashun.

³ Mandaj Diosta rijsishunchij. Paitaca rijsingacamataj fuerzarishpa mashcashunchij. Paica pacaripi mana uniyashpa inti llujshij shinami shamunga. Punta tamya, q'uipa tamya allpaman shamuj shinami ñucanchijpajmanca shamunga.

⁴ Efraín cantaca ¿imatataj rurashari? Judá cantaca ¿imatataj rurashari? Cancunapaj c'uyaica tutamanta p'uyu ricurishpa chingarij shinallamari chingarin. Tutamanta garhua urmashpa chingarij shinallamari chingarin.

⁵ Chaimantami ñuca cancunata tucuchinataca profetacunata huillachircani. Ñuca shimimanta llujshishca shimicunapi nishca shinallatajmi huañuchichircani. Ñuca cachashca llaquicunaca rayo shinami canga.

⁶ Animalcunata cushpa huañuchinapaj randica, llaquij cachunmi munani. Animalcunata cushpa tucui rupachinapaj randica, ñucataca Taita Diostaj cashcata entendichunmi munani.

⁷ Ashtahuanpish paicunaca, Adán shinallatajmi ari ninacushcata p'aquirca. Chashna juchallishpami ñucata llaquichirca.

⁸ Galaad puebloca millaita rurajcunapaj pueblomi. Yahuarhuan tucui mapayashcami.

⁹ Siquemman rina ñanpi shuhuacuna tandanacushca chapashpa maijanta huañuchij shinami, tandanacushca curacunapish huañuchincuna. Chashna rurashpami paicunaca yallitaj millananata rurancuna.

¹⁰ Israelpica yallitaj millaitami ricuni. Efrainca huainayarcami. Israelca chashnami mapayarca.

¹¹ Judá, ñuca agllashcacunata prezumanta tigrachimui punllapica cancuna tarpushcata cancuna cozichanapish ñami allichishca.