OSEAS 3 - Dios Rimashca Shimicunami

Oseaspish, huainayaj huarmipish

¹ Mandaj Diosca cutinllatajmi ñucataca cashna nirca: “Shujtaj c'arihuan c'uyanacushpa, huainayashpa causacuj cambaj huarmita c'uyagri. Israelcunaca chai shinallatajmi Mandaj Diosta saquishpa shujtaj dioscunata adorashpa, pasas tortillata chai dioscunaman cushpa micucuncuna. Chashna cajpipish Mandaj Diosca c'uyanmi” nircami.

² Shina nijpimi chai huarmitaca ñucapaj cachun chunga pichca siclo cullquihuan, shuj homer chaupi cebadahuan randircani.

³ Ñucaca paitaca: “Canca achca huatacunacamami ñucapajlla cangui, ama huainayangui, shujtaj c'ariman ama curingui, ñucapish canhuanca chai shinallatajmi casha” nircanimi.

⁴ Israelcunaca achca huatacunatami jatun mandaj illajlla, mandaj illajlla, animalta cushpa huañuchina illajlla, rumimanta rurashca dios illajlla, churarina efod illajlla, terafín nishca dioscuna illajlla causangacuna.

⁵ Chai q'uipami israelcunaca Mandaj paicunapaj Taita Diosta, paicunata jatun mandaj Davidta mashcangacuna. Tucuri punllacunapica Mandaj Diostami manchangacuna. Pai cushcacunatami chasquingacuna.