OSEAS 2 - Dios Rimashca Shimicunami

Mandaj Diosca pai agllashcacuna paipi mana shunguta churajpipish c'uyashcami

¹ “Cancunapaj huauquicunataca: Ammi nichij. Cancunapaj panicunataca: Ruhama nichij.

² ¡Cancunapaj mamataca p'iñashpa rimaichigari, rimaichigari. Paica ña mana ñuca huarmichu, ñucapish ña mana paipaj cusachu cani! Huainayaj cajta ricuchij ñahuitaca anchuchi nichigari. Huainayaj cajta ricuchij sumajcunatapish pecho urimanta anchuchi nichigari.

³ Mana chashna rurajpica, ñucaca tucuitami quichusha. Lluchullatami saquisha. Huachari punllapi ima shina cashca shinatami saquisha. Shitashca pambata shinami rurasha. Chaquishca allpata shinami saquisha. Yacunaihuan huañuchunmi saquisha.

⁴ Huainayashcamanta huacharishca huahuacuna cashcamanta paipaj huahuacunataca manataj llaquishachu.

⁵ Cambaj mamaca huainayashcahuan causaj huarmimi tucurca. Canta huachajca pingai illajmi. Chashna cashpami paica: Micunata, yacuta, millmata, linota, aceiteta, ima ubyanacunatapish ñucaman cujcunata catishpa rishalla nishpa catishpa ricujlla tucurca.

⁶ Chashna cashcamanta pai purina ñantaca cashacunahuanmi huichcasha. Caspicunahuan muyundijta churashpami jarcachisha. Maita mana puri tucungachu.

⁷ Paita c'uyajcunata catishpa rishpapish mana cati japingachu. Mashcashpapish mana japingachu. Chaimi paica: Ñuca punta cusapajllamantaj tigrashalla. Paihuanca cunantapish yalli ima mana illajmari causacurcani ningami.

⁸ Chai huarmica trigotapish, vinotapish, aceitetapish ñuca cucushcataca mana yuyarircachu. Achca cullquita, achca curita ñuca mirachicushcatapish mana yuyarishpami chaicunataca Baalman curca.

⁹ Chaimanta ñuca trigotapish, ñuca uvatapish cozichana punlla pajtajpica, ñucallatajmi cutin tandasha. Lluchulla aichata taparichun ñuca cushca millmatapish, linotapish quichushami.

¹⁰ Paita c'uyajcunapaj ñaupajpica pai ima shina lluchulla cashcata ricuchishpami pingachisha. Ñuca maquimantaca pi mana quishpichingachu.

¹¹ Cada semana fiestacunatapish, mushuj luna punllacunatapish, samana punllacunatapish, jatun fiesta punllacunatapish rurashpa pai tucui laya cushicunataca tucuitami anchuchisha.

¹² Paipaj uva chagracunatapish, higo yuracunatapish p'itishpami shitasha. Chai huarmica: Caicunaca ñucata c'uyajcuna ñucaman cuna cashcata cushcamari niricurcami. Chaicunapica mapa q'uihuacunatami jundachisha. Chaicunataca purij animalcunami micunga.

¹³ Baal nishca dioscunaman inciensota rupachishcamantaca llaquichishatajmi. Ñucata cungarishpa ashtahuanpish sortijascunahuan, ima aparina sumajcunahuan sumajta allichirishpa paita c'uyajcunata catishpa rishcamantaca llaquichishatajmi” ninmi Mandaj Diosca.

¹⁴ Shina cajpipish ñucapajman tigrana yuyaitami cusha. Shitashca pambamanmi pushasha. Shunguman yaicujtami rimasha.

¹⁵ Chaimantapachami uva chagracunataca paillamantaj cutin cusha. Acor pugru pambatapish, allicunata japina pungu canamanmi tigrachisha. Chaipimi paica, solteraraj cashpa cantashca shina cantanga. Egiptomanta huichiyacui punllapi cantashca shina cantanga.

¹⁶ Mandaj Diosca cashnapishmi nin: “Chai punllacunapica ñucatami Ishi” ninguichij. Baali ninataca ña nunca mana ninguichijchu.

¹⁷ Baal dioscunapaj shuticunata rimanataca paipaj shimimanta anchuchishami. Chaimi chai dioscunapaj shuticunataca, ña nunca manataj rimangacuna.

¹⁸ Chai punllacunapica, paicunapaj allipajmi purij animalcunahuanpish, huairata purij alasyuj animalcunahuanpish, culebracunahuanpish ari ninacushcata rurasha. Cai llajtamantaca arcotapish, espadatapish, macanacuicunatapish anchuchishami. Chashna rurajpica ima manchai illajllami dormingui.

¹⁹ Ñucahuan huiñaita cachunmi cazarasha. Cashcata ruraj cashcahuan, can imallata japina cashcahuan, c'uyaj cashcahuan, llaquij cashcahuanmi cazarasha.

²⁰ Manataj shitangapajmi canhuanca cazarasha. Chaimi Mandaj Diostaj cashcata rijsingui ninmi.

²¹ Mandaj Diosca cashnami nin: “Chai punllacunapi imalla mañashcacunataca cutichishami. Jahua pacha mañashcataca ñucami cutichisha, cai pacha mañashcataca jahua pachami cutichinga.

²² Shinallataj allpaca trigota, uvata, aceitetami p'ucunga. Tucui chai granocunaca Jezreelpajmi canga.

²³ Israelcunataca ñucapaj cachunmi cai llajtapi tarpusha. Lo-ruhamataca llaquishami. Lo-ammitaca: Canca ñuca agllashcami cangui nishami. Paica: Ñuca Taita Diosmi cangui ningami” ninmi nircami.