OSEAS 14 - Dios Rimashca Shimicunami

Mandaj Diospajman cutirichij nishpa israelcunata mandashcami

¹ ¡Israel, Mandaj cambaj Taita Diospajman cutiriyari. Canca cambaj juchallamantatajmi urmashcangui!

² Mandaj Diospajman cutirishpa cashna nishpa rogarichij: “Millaita ñucanchij rurashcataca tucuita anchuchi. Ñucanchij rogarishcataca c'uyaihuan chasquipai. Chaipica ñucanchij shimihuan cantashcatami quiquinmanca cushun.

³ Asiriocuna quishpichinatapish mana yuyanchijchu. Caballocunapi tiyarishpa mishashpa quishpirinatapish mana yuyanchijchu. Ñucanchij maquihuan rurashca dioscunatapish ña nunca: Caimi ñucanchij dios mana nishunchu. Yaya mama illaj tucushca ñucanchijca quiquinpimi llaquij cashcataca chasquinchij” nishpa mañanguichij.

⁴ “Israelcuna chashna mañajpica Taita Diosca cancuna c'ariyashcataca ñucami alliyachisha. Mana c'uyaipajtami c'uyasha. Ñuca p'iñarinaca, paicunamantaca anchunmi.

⁵ Ñucaca israelcunapajca shulla shinami casha. Paicunaca lirio shinami sisanga. Paicunaca Líbano yuracunapaj sapicuna shinami ucujta ringa.

⁶ Paicunapaj ramacunaca yallitajmi suniyanga. Olivo shina sumajmi canga. Líbano urcu shina mishquiman ashnacujmi canga.

⁷ Paicunapaj llandu ucupi tiyanamanmi tigrangacuna. Trigo shinami cutin huiñangacuna. Uva shinami sisangacuna. Líbano vino shina mishquiman ashnacujmi cangacuna.

⁸ Efrainca: Rurashca dioscunaca ñucapajca imapaj mana valinchu ningami. Chashna nijpica ñucaca pai mañashcataca uyashami, ricushami”. Ñucaca paipajca verdijlla pino yura shinami casha. Ñucapimi p'ucushca granotaca japinga.

⁹ Caita entendingapajca ¿pitaj yachaisapari? Caicunata yachangapajca ¿pitaj alli yuyaiyugri? Mandaj Diospaj ñancunaca mana huishtuchu. Chai ñancunataca cashcata rurajcunallami puringa. Ashtahuanpish paita c'ariyajcunaca chai ñanllapitajmi ñitcarishpa urmangacuna.