OSEAS 13 - Dios Rimashca Shimicunami

Efraincunataca tucuitajmi chingachisha nishcami

¹ Efraín rimajpica, jatun manchaimi tiyarca. Paica Israelpica alli nishcami carca. Ashtahuanpish Baalta adorashpa juchallishpami huañurca.

² Paicunaca ashtahuan ashtahuan chai juchallatataj cunancama rurashpa catishpami, cullquita yacuyachishpa imamanpish rijchaj dioscunata rurancuna. Quiquin yuyaimantami imamanpish rijchaj dioscunata rurancuna. ¡Tucui chaicunaca imatapish ruranata yachaj rurashcallami! Chashna rurashpaca chai dioscunaman animalcunata huañuchishpa cujcunataca chai bizicunata muchaichij nircacunami.

³ Chaimantami tutamantapi caj p'uyu shinalla chingaringa. Tutamantapi caj shulla shinallami chingaringa. Trillashca ujshata jatun acapana apashca shinami chingaringa. Huasimanta llujshicuj cushni shinallami chingaringa.

⁴ Ashtahuanpish ñucaca: “Egiptomanta llujshichimui pachamanta Mandaj cancunapaj Taita Diosmi cani. Manapish dioscunataca caimi dios ama” ninguichij. Shujtajtaca caimi quishpichij ama ninguichij. Ashtahuanpish ñucallata: “Quishpichijmi cangui” ninguichij.

⁵ Shitashca pambapipish, chaquishca allpapipish ñucami cancunataca cuidarcani.

⁶ Ña paicunapaj micunata mana nijta micucushpaca, paicunapaj shungupica jatun tucurcacunami. Chashna cashpami ñucataca cungarircacuna.

⁷ Chaimantami ñucaca paicunapajca león shina casha. Leopardo shinami ñanpi chapasha.

⁸ Huahuacunata chingachishpa mama oso p'iñarishpa puricuj shinami israelcunataca llaquichisha. Paicunapaj corazontaca llujshichishpami shitasha. Sacha animal shinami mirga mirgata rurasha. León shinami millpusha.

⁹ Israel, canca chingarircanguimari. Canta ayudanaca ñucapimari.

¹⁰ Cambaj pueblocunata quishpichichun cambaj jatun mandajca ¿maipitagari? “Shuj jatun mandajta cuhuai, pushajcunata cuhuai” nircanguica. Chai juezcunaca ¿maipitagari?

¹¹ Mandajta cui nishpa p'iñachijpimi, jatun mandajta curcani. Canllataj ñucata p'iñachijpimi paitaca quichurcani.

¹² Efraín millaita rurashcaca huatashcami tiyacun. Paipaj juchacunaca huaquichishcami tiyacun.

¹³ Paicunataca huachacuj huarmipaj nanai shinami japinga. Huacharina pajtajpi mana llujshinalla tucushca juillu illaj huahua shinami cangacuna.

¹⁴ Seolpaj maquimantami quishpichisha. Huañunamantami quishpichisha. Chaipica huañui, ñucami canta huañuchijca cani. Seol canta chingachijca ñucami cani. Llaquij canaca ñuca ñahuimantaca anchunmi nishami.

¹⁵ Huauquicunapurapica pai miraricujpipish inti llujshin ladomanta huaira shamushpa, shitashca pambamanta Mandaj Diospaj huaira jatarishpami pajchashpa llujshicuj yacutaca chaquichinga. Pajchashpa llujshicuj jatun yacucunaca chaquiringami. Paicunapaj achca valij sumaj charinacunatapish quichushpami apanga.

¹⁶ Samariaca llaquichishca canapajmi tucunga. Paicunallataj Taita Diosta c'ariyashcamantami chashna canga. Espadapimi huañungacuna. Paicunapaj huahuacunataca pambapimi huajtangacuna. Chichu huarmicunatapish huijsatami lliquingacuna.