OSEAS 1 - Dios Rimashca Shimicunami

Oseaspaj huarmipish huahuacunapish

¹ Uzías, Jotam, Acaz, Ezequías shuti jatun mandajcunami Judá llajtataca mandacurca. Israel llajtataca Joaspaj churi Jeroboammi mandacurca. Chai punllacunapimi Beeripaj churi Oseastaca Mandaj Diosca cashna huillachirca.

² Mandaj Diosca Oseasta punta cutin huillachishpaca cashnami nirca: “Huainayaj huarmipajman ri, chai huarmita cambaj huarmi cachun japi. Chai huarmihuan huahuacunata chari. Chai huahuacunaca huainayashcamanta huacharishca huahuacuna cachun. Cai llajtapi causajcunaca Mandaj Diosmanta anchurishpami, chai shinallataj huainayacuncuna” nircami.

³ Shina nijpi Oseas rishpaca, Diblaimpaj ushushi Gomertami paipaj huarmi cachun japirca. Paica chichushpa, shuj c'ari huahuatami huacharca.

⁴ Mandaj Diosca, cashnami nirca: “Cai huahuataca, Jezreelta shutichi. Jehupaj huahua huahuacunataca ñallami llaquichigrini. Jezreelpi causajcunata huañuchishcamantami llaquichigrini. Chashna rurashpami israelcunata mandanataca tucuchisha.

⁵ Chai punllallatajmi Israelpaj arcotaca, Jezreel pugru pambapi p'aquisha” nircami.

⁶ Gomerca cutinllataj chichushpaca, shuj huarmi huahuatami huacharca. Mandaj Diosca, Oseastaca cashnami nirca: “Israelcunaca ña mana ashtahuan c'uyashcachu nishca cachun, cai huahuataca Lo-ruhamata shutichi. Paicuna millaita rurashcataca mana perdonashachu.

⁷ Shina cashpapish judacunataca llaquishami. Mandaj paicunapaj Taita Dios ñucallatajmi quishpichisha. Paicunataca arcohuan, espadahuan, macanacuihuan, caballopi tiyarishca soldadocunahuanca mana quishpichishachu” nircami.

⁸ Lo-ruhamata raquishca q'uipami, Gomerca cutin chichushpa c'ari huahuata huacharca.

⁹ Taita Diosca: “Cancunaca ña mana ñuca agllashcacunachu canguichij. Ñucapish ña mana cancunapaj Taita Dioschu cani nishca shuti Lo-ammita shutichi” nircami.

¹⁰ Shina cashpapish, israelcunaca mama cuchapi tiyaj t'iyu allpa shinami canga. Pi mana medi tucuipaj, pi mana yupai tucuipajmi canga. Maipimi: “Cancunaca ña mana ñuca agllashcacunachu canguichij” nirca, chaillapitajmi: “Causaj Taita Diospaj huahuacunami canguichij” ninga.

¹¹ Judacunapish, israelcunapish tandanacungami. Shujlla mandajtami churanga. Tucui maipi cashcamantami tandanacunga. Jezreelpaj punllaca jatunmi canga.