NÚMEROS 9 - Dios Rimashca Shimicunami

Pascuata rurachun mandashcami

¹ Mandaj Diosca Sinaí shuti shitashca pambapimi Moiseshuan rimarca. Egiptomanta israelcuna llujshimushca, ña ishqui huata, chai huatapaj punta quillapimi cashna nirca:

² “Israelcunaca Pascua micuitaca ñuca mandashca punllapitaj rurachun.

³ Pascua micuitaca cai quillapaj chunga chuscu punllapi, ña tutayacuita ñuca mandashca shinallataj ruranguichij. Chaitaca imallata rurana cashca shinataj, cancunaman cushca mandashcacunapi nishca shinataj ruranguichij” nircami.

⁴ Shina nijpica, Moisesca israelcunataca Pascua micuita rurachunmi mandarca.

⁵ Chaimi israelcunaca Sinaí shuti shitashca pambapi cashpa huata callari punta quilla, chai quillapaj chunga chuscu punllapi ña tutayacuita Pascua micuita rurarca. Mandaj Dios Moisesta imallata rurachun nishpa mandashca shinallatajmi tucuita rurarca. Chashnami rurarca.

⁶ Chaipica huaquincunami huañushcapi tuparishcacuna chaipi carca. Paicunaca chai punllapica Pascua micuita mana micui tucurcacunachu. Chaimi Moisespaj, Aaronpaj ñaupajman chai punllallataj shamushpa,

⁷ cashna nircacuna: –Ñucanchijmari huañushcapi tuparishcamanta mapa canchij. ¿Chaillamantachu caishuj israelcunahuan tandalla, Mandaj Dios mandashca punllapitaj paiman cunataca mana cushpa jarcashca cashun?– nircacunami.

⁸ Chaimi Moisesca: –Shuyaichij, Mandaj Dios cancunamanta imata nishcata uyasha– nirca.

⁹ Mandaj Diosca Moisestaca cashnami nirca:

¹⁰ Israelcunata mandashpa cashna ni: Cancuna cashpapish, mana cashpaca cancunapaj huahua huahuacuna cashpapish huañushcapi tuparishcamanta mapa cashpa, mana cashpaca caruman rishcamanta chai punllapitaj Pascua micuita mana rurashca cashpaca, Mandaj Diosta yuyarishpa Pascua micuitaca ruranatajmi can.

¹¹ Paicunaca huata callaripaj cati quillapi, chai quillapaj chunga chuscu punllapi ña tutayacuita levadura illajlla tandacunahuan, jayaj q'uihuacunahuan micushpa chai Pascua micuitaca rurachuncuna.

¹² Diosman cushpa huañuchishca animalpaj aichataca cayandij punllapajca, imata ama saquichun. Chai animalpajtaca shuj tullullatapish ama p'aquichun. Pascua micuitaca ima shina rurachun nishca shinataj rurachun.

¹³ Maijanpish manapish mapayashca cashpa, mana cashpaca maimanpish mana rishca cashpa chaillapitaj cashca jahua Pascua micuita mana rurajtaca, israelcunapuramanta anchuchishca cachun. Mandaj Dios mandashca punllapitaj Mandaj Diosman cuna cashcata mana cushpa juchallishcamantaca, chai juchamantaca llaquita apangatajmi.

¹⁴ “Cancunahuan causacuj mana israelcuna Mandaj Diosta yuyarishpa Pascua micuita rurashpaca, Pascua micuita ima shinalla rurana cashca shinataj rurachun. Cancunaman cushca mandashcapi ima shinalla ruranata mandashca shinataj rurachun. Israelcuna cashpapish, mana israelcuna cashpapish Pascua micuita ima shinalla ruranataca chai mandashcallatatajmi charinguichij” nircami.

Diospaj carpa huasi jahuapi p'uyu cashcami

¹⁵ Diospaj carpa huasita ña shayachijpica, chai punllatajmi Dios chaipi cashcata ricuchij chai huasi jahuataca p'uyu taparca. Tutayajpica, Diospaj carpa huasi jahuapica nina lunyacujtajllami cayandij tutamantacama carca.

¹⁶ Chashnami carpa huasitaca punllaca p'uyu tapaj carca. Tutaca, nina lunyacujtajlla caj carca.

¹⁷ Diospaj carpa huasi jahuamanta p'uyu rijpica, israelcunapish rijllacunami carca. Chai p'uyu maipi shayarijpica, israelcunapish chaipimi paicunapaj carpa huasicunata shayachishpa tiyarijcuna carca.

¹⁸ Israelcunaca Mandaj Dios shujtajman rinami canguichij nijpica, rijcunallami carca. Mandaj Dios maipi tiyarichun nijpica, chaipimi tiyarijcuna carca. Diospaj carpa huasi jahuamanta p'uyu mana rijpica, chaillapitaj causacujllacunami carca.

¹⁹ Mandaj Diospaj carpa huasi jahuapi achca punllacunata p'uyu tiyacujllapica, israelcunaca Dios mandashcata cazushpa mana mai shujtajpi tiyarigrijcunachu carca.

²⁰ Diospaj carpa huasi jahuapi p'uyu asha punllacunallata cajpica, israelcunapish Mandaj Dios mandashca shinallataj asha punllacunallatami chaipi caj carca. Mandaj Dios richun nijpica, rijcunallami carca.

²¹ Huaquinpica Diospaj carpa huasi jahuapi caj p'uyu chishimanta cayandij tutamantacamalla cashpa chai tutamanta p'uyu ña ri callarijpica, paicunapish rijllacunami carca. Mana cashpaca Diospaj carpa huasi jahuapi caj p'uyu shuj punllallata cainashpa ña tutayajpi ri callarijpica, rijllacunami carca.

²² Diospaj carpa huasi jahuapi caj p'uyu ishqui punllata chaipi cajpica chaitami chaipi cajcuna carca. Shuj quillata, mana cashpaca shuj huatata chai jahuapi cajpica, israelcunapish mana maiman rishpa chaillapitaj causacujllacunami carca. P'uyu ña rijpica, paicunapish rijllacunami carca.

²³ Mandaj Dios maipi tiyarichun mandajpica, chaipimi carpa huasicunata shayachishpa tiyarijcuna carca. Mandaj Dios shujtajman richij nishpa mandajpica, rijcunallami carca. Chashnami israelcunaca Mandaj Dios mandashcata pajtachijcuna carca. Mandaj Dios Moisesta ima shina mandachun nishca shinallatajmi rurarcacuna.