NÚMEROS 8 - Dios Rimashca Shimicunami

Lamparacunapi ninata Aarón japichishcami

¹ Mandaj Dios Moisesta mandashpaca cashnami nirca:

² “Aarontaca cashna nishpa mandai: Canchis lamparacunapi ninata japichishpaca, candeleropi churashpa candelerotaca ñaupaj ladota achijyachichun suniman churachun mandai” nircami.

³ Chaimi Aaronca lamparacunata candeleropi churashpa candelerotaca ñaupaj ladota achijyachichun suniman churarca. Mandaj Dios Moisesta ima shina mandashca shinallatajmi rurarca.

⁴ Chai candelerotaca curita martillohuan labrashpami rurarca. Chaquimanta callarishpa sisacunacamami martillohuan labrashpa rurarca. Ima shinalla ruranata Mandaj Dios Moisesman ricuchishca shinallatajmi candelerotaca rurarca.

Levitacunataca Diospajta ruraj cachun ch'icanchishcami

⁵ Mandaj Diosca Moisestaca cashnami mandarca:

⁶ “Levitacunataca israelcunapuramanta ch'icanchishpa, mapa illajllata rurai.

⁷ Mapa illajlla cachunca cashna rurangui: Mapa illajllata ruraj yacuta paicunapaj jahuata tsirapangui. Paipaj tucui cuerpotapish cuchillohuan rasparichun, churanacunatapish tajshachun mandangui. Chashnami mapa illajlla tucunga.

⁸ Chai q'uipaca shuj huagrata apamuchun. Chaihuan cunapajpish, tucuimanta yalli alli cutata aceitehuan chapushcata apamuchun. Juchamanta cungapajca canpish shuj huagrata japishpa cungui.

⁹ Levitacunataca, Dioshuan tupanacuna carpa huasiman c'uchuyachun mandangui. Tandanacushca tucui israelcunatapish chaillapitaj tandachingui.

¹⁰ Mandaj Diospaj ñaupajman levitacuna ña c'uchuyajpica, israelcuna paicunapaj maquicunata levitacunapaj jahuapi churachun.

¹¹ Israelcuna ofrendata Diosman cushcaca levitacunami. Chaicunataca Aaronmi Mandaj Diosman cunga. Chai levitacunaca Mandaj Diospajta rurashpami causangacuna.

¹² Levitacunaca huagracunapaj uma jahuapi paicunapaj maquicunata churachun. Shuj huagrataca juchamanta Diosman cungui. Caishujtaca levitacunata mapa illajllata rurangapaj Mandaj Diosman cushpa tucui rupachingui.

¹³ Chashna rurashpaca, levitacunataca Aaronpaj, paipaj churicunapaj ñaupajpi shayachishpa Mandaj Diospaj ofrenda cachun cungui.

¹⁴ Chashnami levitacunataca, israelcunapuramanta ch'icanchina cangui. Chaimi levitacunaca ñucapajlla canga.

¹⁵ Mapa illajllata rurashpa can ñucaman cushca q'uipaca, levitacunaca Dioshuan tupanacuna carpa huasipi Diospajta ruranata callarichunlla.

¹⁶ Levitacunaca israelcunapaj punta churicunapaj randi ñucaman cushcata ñuca chasquishcacunami. Paicunataca israelcunapaj punta churicunapaj randimi ñucapaj cachun japircani.

¹⁷ Israelcunapi punta huacharishca c'ari huahuacunaca ñucapajmi. Punta huacharishca churicunapish, punta huacharishca animalcunapish ñucapajmi. Egiptocunapaj punta churicunata huañuchi punllamanta pachami, israelcunapaj punta churicunataca ñucapaj cachun ch'icanchircani.

¹⁸ Levitacunataca israelcunapaj punta huacharishca churicunapaj randimi ñucapaj cachun japircani.

¹⁹ Levitacunata israelcunapuramanta ch'icanchishpaca, Aaronman, paipaj churicunamanmi convidani. Dioshuan tupanacuna carpa huasipi israelcunapaj randi Diospajta rurashpa, Dioshuan alli tucunacuchij cachunpish ñucami churarcani. Diospaj carpa huasiman israelcuna c'uchuyashpapish ama llaqui tucuchunmi chashna rurarcani” nircami.

²⁰ Moisespish, Aaronpish, tandanacushca israelcunapish Mandaj Dios Moisesta ima shina mandashca shinallatajmi levitacunataca imalla ruranacunapi churarca. Chashnami israelcunaca levitacunataca rurarca.

²¹ Levitacunaca mapa illajllami tucurcacuna. Paicunapaj churanacunatapish tajsharcami. Chaipimi Aaronca levitacunataca israelcunapaj ofrenda cachun Mandaj Diospaj ñaupajpi churarca. Paicuna mapa illajlla cachunca juchamanta Diosman cuna cashcatami curca.

²² Chai q'uipami levitacunaca, Mandaj Dioshuan tupanacuna carpa huasipi Aaronpish, paipaj churicunapish imallata ruranata mandashca shina rurashpa Mandaj Diospajta rurai callarircacuna. Mandaj Dios Moisesta levitacunata imallata ruranapi churachun mandashca shinallatajmi paicunataca churarca. Chashnami rurarca.

Levitacuna mashna huatayujmanta mashna huatayujcama Diospajta rurana cashcami

²³ Chai q'uipaca Mandaj Dios Moisesta mandashpaca cashnami nirca:

²⁴ “Levitacunaca ishqui chunga pichca huatayujmanta huichiman cajcuna, Dioshuan tupanacuna carpa huasipi paicuna imalla rurana cashcata ruranaman yaicuchun.

²⁵ Pichca chunga huatayuj ña tucushpaca, chaipi imallata ruraj cashcamanta llujshishpa, chaipi imallata ruraj cashcataca cutinca ama rurachun.

²⁶ Paicunaca Dioshuan tupanacuna carpa huasita cuidajcunahuan imallata rurana cashcata rurachun. Ñaupaman imallata ruraj cashca shinaca ña ama rurachun. Levitacuna Mandaj Diospajta imalla rurana cashcata rurachunca chashna mandangui” nircami.