NÚMEROS 6 - Dios Rimashca Shimicunami

Nazareo tucujcunata mandashcami

¹ Mandaj Dios Moisesta mandashpaca cashnami nirca:

² “Israelcunataca cashna ni: C'ari cashpapish huarmi cashpapish, nazareo tucushpa Mandaj Diospajta rurangapaj ch'icanyarishpaca,

³ vinota, sidrata ama ubyachun. Vinomanta rurashca vinagretapish, sidramanta rurashca vinagretapish, uvata capishcatapish ama ubyachun. Cunanlla pallashca uvatapish, chaquichishca uvatapish ama micuchun.

⁴ Nazareo tucushpaca, chai punllacuna tucuringacama uvamanta imata rurashcacunatapish, muyullatapish, mirga carallatapish ama micuchun.

⁵ Nazareo tucushpaca Mandaj Diospajta rurangapaj ch'icanyarishca punllacuna pajtangacama paipaj uma ajchata ama rutuchichun. Mandaj Diospajlla ch'icanyarishca cashcamanta uma ajcha huiñachun saquichunlla.

⁶ Mandaj Diospajta rurangapaj ch'icanyarishca punllacunapica, huañushcapajmanca ama c'uchuyachun.

⁷ Diospajta rurangapaj ch'icanyarishcataca paipaj ajchami ricuchinga. Chaita ama mapayachingapajca, quiquin yaya cajpipish, mama cajpipish, huauqui cajpipish, pani cajpipish huañushcamanca ama c'uchuyachun.

⁸ Mandaj Diospajta rurangapaj ch'icanyarishpa nazareo tucushca punllacuna pajtangacama Mandaj Diospajlla cachun.

⁹ Cungaimanta maijanpish paipaj c'uchupi huañujpica, Diospajta rurangapaj ch'icanyarishpa nazareo tucushcapaj uma ajchaca mapayangami. Chashna tucushpaca, canchis punllacama maillarishpa, canchis punllapica ajchata rutuchichun.

¹⁰ Pusaj punllapica ishqui urpita cashpa, mana cashpaca ishqui palomata cashpa Dioshuan tupanacuna carpa huasi punguman curapajman apamuchun.

¹¹ Chaicunataca curami shujtaca juchamanta Diosman cunga, caishujtaca Diosman cushpa tucui rupachinga. Chashna rurashpami, huañushcapi tuparishpa mapayashcataca chuyayachinga. Chai punllamantami paipaj ajchataca Diospajlla cachun cutin huiñachinga.

¹² Nazareo tucushpa Diospajta rurana punllacunataca cutinllataj callarichun. Mana yuyashcapi juchayuj tucushcamanta shuj huatayuj c'ari ovejata apamushpa juchamanta Mandaj Diosman cuchun. Ñaupaman Diospajta ruracushca punllacunapi mapayashcamantaca, chai punllacunataca ama yupachun.

¹³ Nazareo tucushpa Diospajlla ch'icanyarishca punllacunata pajtachishpaca, nazareoca cai mandashcacunata rurachun. Dioshuan tupanacuna carpa huasi punguman shamushpa,

¹⁴ Mandaj Diosman cushpa tucui rupachingapajca ima mana tucushca shuj huatayuj c'ari ovejata cuchun. Juchamanta cunapajpish ima mana tucushca shuj huatayuj huarmi ovejata cuchun. Sumaj causaimanta cunapajpish ima mana tucushca shuj carnerota cuchun.

¹⁵ Chai jahuapish, tucuimanta yalli alli cutata aceitehuan chapushpa levadura illajlla tandacunata shuj canastapi apamuchun. Levadura illajllata rurashpa aceitehuan jahuata llihuishca tortillacunatapish apamuchun. Chaicunahuanca Diosman cuna granocunatapish, Diosman cushpa tallina vinotapish apamuchun.

¹⁶ Tucui chaicunataca curami juchamanta Diosman cunatapish, Diosman cushpa tucui rupachinatapish Mandaj Diosman cunga.

¹⁷ Mandaj Dioshuan alli cangapaj cushca carnerotaca, levadura illajlla canasta tandacunahuan Mandaj Diosman cuchun. Granocunatapish, tallina vinotapish chashnallataj Mandaj Diosman cuchun.

¹⁸ Nazareo tucushpa pajtachijca Diospajta rurangapaj ch'icanyarishcata ricuchij ajchataca Dioshuan tupanacuna carpa huasi pungupi rutuchichun. Diospajlla cashca ajchata rutuchishcata japishpaca, sumaj causaimanta Diosman cushcata rupachicun ninapi rupachichun.

¹⁹ Chai q'uipaca carneropaj changa aicha yanushcata, canastamanta levadura illajlla shuj tandata, levadura illajlla shuj tortillata cura japishpa nazareopaj maqui jahuapi churachun. Diospajlla huiñachishca ajchata rutuchishca q'uipa chashna rurachun.

²⁰ Chaicunataca Mandaj Diospaj ñaupajpi huichi ricuchishpa cuyuchishpa Diosman cura cuchun. Tucui chaicunaca Diospajlla ch'icanchishca cashcamanta curapaj saquirichun. Mandaj Diospaj ñaupajpi huichi ricuchishpa cushca pecho aichapish, changa aichapish curapajllataj saquirichun. Chai q'uipaca nazareoca vinota ubyachunlla.

²¹ Nazareo tucushpa Diospajlla ch'icanyarishpa Diospajllata rurashpa pajtachina tucushcamanta pajtachijca, cai mandashcapi tucui imalla nicushcata rurachun. Chai jahuapish imata ashtahuan Diosman cui tucushpaca cuchunlla. Chaitaca nazareo tucushpa Diospajllata rurangapaj ch'icanyarishcacunata mandashcapi nicushca shinataj pajtachichun nishpa mandangui” nircami.

Curacuna israelcunata alli cashca cachun nishpaca ima shinalla ninami

²² Mandaj Dios Moisesta mandashpaca cashnami nirca:

²³ “Aarontapish, paipaj churicunatapish cashna mandai: Israelcunata alli cashca cachun nicushpaca cashna ningui ni:

²⁴ Mandaj Diosca cancunata alli cashca cachun nichun. Mandaj Diosca cancunata huaquichichun.

²⁵ Mandaj Dios cancunataca paipaj ñahuihuan lamyachichun. Mandaj Dios cancunataca llaquichun.

²⁶ Mandaj Dios cancunata c'uyaj ñahuihuan ricuchun, sumaj causaita cancunapi churachun ningui nircami.

²⁷ Israelcunata curacuna ñuca shutipi chashna nijpica, ñucapish paicunataca alli cashca cachun nishami” nircami.