NÚMEROS 4 - Dios Rimashca Shimicunami

Levitacuna imallata rurana cashcami

¹ Mandaj Diosca Moisestapish, Aarontapish mandashpaca cashnami nirca:

² “Levipaj churicunamanta caj Coatpaj huahua huahuacunataca, cada yayamanta ima shina mirarimushca shinallatataj cada familiata yupai.

³ Paicunataca quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi rurana cashcata rurai tucuipajcunallata quillcangui.

⁴ Dioshuan tupanacuna carpa huasipi caj Diospajlla ch'icanchishca ucupi cajcunata Coatpaj huahua huahuacuna imallata cuidanaca caicunami:

⁵ Israelcuna causacushcamanta shujtaj ladoman rina tucujpica, Aaronhuan, paipaj churicunahuan shamushpa, Diospaj carpa huasita jarcachishca linsota pascashpa, chaihuanca Dioshuan ari ninacushca quillcata huaquichina arcata pilluchichun.

⁶ Chai jahuataca, tejoncunapaj cara tapahuan tapachishpa, chai jahuataca jatun azul linsohuan tucuita pilluchishpa, arcata apana caspicunata churachichun.

⁷ Diospaj ñaupajpi tandata punllanta churana meza jahuataca azul linsota tendichun. Chai jahuapica platocunata, cucharacunata, copacunata, Diosman cushpa vinota tallina tasacunata churachun. Taita Diosman punllata cuna tandaca chaillapitaj cachun.

⁸ Chai jahuataca, amsa puca linsohuan pilluchishpa, tejoncunapaj cara tapahuan tapachichun. Chai q'uipaca, mezata apana caspicunata churachichun.

⁹ Achijyachij candelerota, lamparacunata, mecha rupashca ushpata anchuchinacunata, platillocunata, aceiteta churanapaj tucui imalla cajcunataca azul linsota japishpa pilluchichun.

¹⁰ Chaicunataca tucui imalla charinacunandij tejoncunapaj cara tapahuan tapachishpa, apana caspicuna jahuapi churachun.

¹¹ Curimanta rurashca altar jahuataca shuj azul linsohuan pilluchishpa, tejoncunapaj cara tapahuan tapachishpa, altarta apana caspicunata churachichun.

¹² Chai q'uipaca, Diospajlla ucupi Diospajta ruranapaj imalla charinacunata shuj azul linsopi pilluchishpa, chai jahuataca tejoncunapaj cara tapahuan tapachishpa, apana caspicuna jahuapi churachun.

¹³ Altarmanta ushpata anchuchishpa, chai jahuataca morado linsohuan pilluchichun.

¹⁴ Chai jahuapica Diosman cunapaj imalla minishtirishcacunataca: Palacunata, garfio nishca quimsa puntayujcunata, braserocunata, tasacunata, altarpi imallata ruranapaj caj tucuicunata churashpa, chai jahuataca tejoncunapaj cara tapahuan tapachishpa, altarta apana caspicunata churachichun.

¹⁵ Israelcuna shujtajman rina tucujpica Diospajlla ch'icanchishca huasita, chai ucupi tucui imalla charinacunata Aarón, paipaj churicunandij ña tucui pilluchijpica, Coatpaj huahua huahuacuna chaicunata apanaman c'uchuyachun. Ashtahuanpish Diospajlla cajtaca imata ama tuparichun. Diospajlla cajta tuparishpaca huañungami. Dioshuan tupanacuna carpa huasipi imalla cajcunata Coatpaj huahua huahuacuna apanaca chaicunami.

¹⁶ Aarón curapaj churi Eleazarca: Lamparacunapi churana aceiteta, mishquijllata ashnacuj inciensota, punllanta Diosman cunata, Diospajlla cachun ch'icanchina aceiteta ricuj cachun. Diospaj carpa huasitapish, chaipi imalla tiyajcunatapish, Diospajlla ucutapish, chaipi imalla tiyajcunatapish pai cuidachun” nircami.

¹⁷ Mandaj Diosca Moisestapish, Aarontapish mandashpaca cashnami nirca:

¹⁸ “Coatpaj aillu familiacunataca, levitacunapuramanta chingarichun ñataj saquinguichijman.

¹⁹ Diospajlla cajcunaman paicuna c'uchuyashpa ama huañuchunca caita ruranguichij: Aarón, cambaj churicunahuan tucushpa levitacunata pushashpa cada quiquin imallata rurana cashcapi, imallata apana cashcapi churanguichij.

²⁰ Paicunaca Diospajlla cajcunata pilluchicujpi ricunaman ama yaicuchun. Chaiman yaicushpaca huañungacunami” nircami.

²¹ Mandaj Dios Moisesta mandashpaca cashnami nirca:

²² “Gersonpaj huahua huahuacunatapish, cada yayamanta ima shina mirarimushca shinallatataj cada familiata yupai.

²³ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi rurana cashcata rurai tucuipajcunallata quillcangui.

²⁴ Gersonpaj huahua huahuacunaca caicunapi Diospajta rurajcuna cachun:

²⁵ Diospaj carpa huasita jarcachishca linsocunata, Diospaj carpa huasita c'atashca linsocunata, chai jahuata c'atashca tejoncunapaj caracunata, Dioshuan tupanacuna carpa huasi punguta jarcachishca linsota,

²⁶ Diospajlla huasi canllata jarcachishca linsocunata, chai huasi canlla muyundijman yaicuna punguta jarcachishca linsota, chai huasi canllapi tiyaj altarta, huatana huascacunata, chaipi tucui imalla ministirishcacunata, tucui paicunapaj imalla rurana cashcata rurachun.

²⁷ Gersonpaj huahua huahuacunaca Diospajta imallata ruranapica Aaronpish, paipaj churicunapish ima shinalla mandashca shina rurachuncuna. Paicuna imallata rurachun nishca shina, imallata apachun nishca shina rurachuncuna. Chaimanta cancunami ima shinalla ruranata yachachishpa paicunamanca mingana canguichij.

²⁸ Gersonpaj huahua huahuacunaca, Dioshuan tupanacuna carpa huasipica tucui chaicunata rurachuncuna. Paicunaca Aarón curapaj churi Itamar ima shina yachachishpa mandashca shina rurachuncuna.

²⁹ Meraripaj huahua huahuacunatapish, cada yayamanta ima shina mirarimushca shinallatataj cada familiata yupai.

³⁰ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi rurana cashcata rurai tucuipajcunata quillcangui.

³¹ Dioshuan tupanacuna carpa huasipi paicuna imallata ruranaca caicuna cachun: Diospaj carpa huasi tablacunata, quinriman churana caspicunata, pilarcunata, chai pilarcunata shayachina basacunata,

³² Diospaj carpa huasi canlla muyundij pilarcunata, chai pilarcunata shayachina basacunata, ishtacacunata, chaicunata huatana huascacunata, chaipi tucui imalla tiyajcunata, tucui imalla ministirishcacunata apanaca chaicunami. Paicuna imallata apana cashcataca, cada quiquinman shutipi shutipi ricuchishpa mingangui.

³³ Meraripaj huahua huahuacunaca, Dioshuan tupanacuna carpa huasipica tucui chaicunata apajcuna cachun. Paicunapish Aarón curapaj churi Itamar ima shina yachachishpa mandashca shina rurachuncuna” nircami.

³⁴ Moisespish, Aaronpish, tandanacushca israelcunata pushajcunahuan tucushpami, Coatpaj huahua huahuacunataca, cada yayamanta ima shina mirarimushca shinallatataj cada familiata yuparca.

³⁵ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi ruranacunata rurai tucuipajcunallatami quillcarca.

³⁶ Cada familiata quillcashcata tandachishpa yupajpica, 2.750mi carca.

³⁷ Dioshuan tupanacuna carpa huasipi Diospajta ruraj Coatpaj huahua huahuacunata quillcashcaca tucui chaicunami. Paicunataca Mandaj Dios Moisesta mandashca shinallatajmi Moiseshuan, Aaronhuan quillcarca.

³⁸ Gersonpaj huahua huahuacunatapish, cada yayamanta ima shina mirarimushca shinallatatajmi cada familiata yuparca.

³⁹ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi ruranata rurai tucuipajcunallatami quillcarca.

⁴⁰ Paicunapaj yayacunamanta ima shina mirarimushca shinallatataj, cada familiata quillcashcata tandachishpa yupajpica, 2.630mi carca.

⁴¹ Dioshuan tupanacuna carpa huasipi Diospajta ruranapaj caj Gersonpaj huahua huahuacunata quillcashcaca tucui chaicunami. Mandaj Dios Moisesta mandashca shinallatajmi paicunatapish Moiseshuan, Aaronhuan quillcarca.

⁴² Meraripaj huahua huahuacunatapish, cada yayamanta ima shina mirarimushca shinallatatajmi cada familiata yuparca.

⁴³ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi rurana cashcata rurai tucuipajcunallatami quillcarca.

⁴⁴ Cada familiata quillcashcata tandachishpa yupajpica, 3.200mi carca.

⁴⁵ Dioshuan tupanacuna carpa huasipi Diospajta ruranapaj caj Miraripaj huahua huahuacunata quillcashcaca tucui chaicunami. Mandaj Dios Moisesta mandashca shinallatajmi paicunatapish Moiseshuan Aaronhuan quillcarca.

⁴⁶ Moisespish, Aaronpish israelcunata pushajcunahuan tucushpami, tucui levitacunataca cada yayamanta ima shina mirarimushca shinallatataj cada familiata quillcarca.

⁴⁷ Quimsa chunga huatata charijmanta huichiman, pichca chunga huatacama charijcunata Dioshuan tupanacuna carpa huasipi rurana cashcata rurai tucuipajcunallata, Diospaj carpa huasita apai tucuipajcunallata,

⁴⁸ quillcashpa yupashcaca, 8.580mi carca.

⁴⁹ Mandaj Dios Moisesta ima shina mandashca shinallatajmi, levitacunataca cada quiquin imallata ruraj cashcapi, imallata apana cashcapi quillcarca. Chai yupanataca Mandaj Dios ima shina mandashca shinallatajmi rurarca.