NÚMEROS 33 - Dios Rimashca Shimicunami

Israelcuna Egiptomanta llujshishpa Jordán yacucama maillata rishcami

¹ Israelcuna Egiptomanta llujshimushpa, maillapi carpa huasicunata shayachishpa shamushcaca cashnami: Paicunaca cada aillumi soldadocuna shina cada mirga, mirga Moiseshuan, Aaronhuan mandashca shamurca.

² Moisesca Mandaj Dios mandashca shinami israelcuna maimanta llujshimushcata, maillata shamushcata quillcarca. Paicuna maimanta llujshimushca, maillata shamushcaca cashnami:

³ Israelcunaca Egiptopi caj Ramesés pueblomantaca, huata callari punta quillapi, chai quillapaj chunga pichca punllapimi llujshimurcacuna. Paicunaca Pascua cayandij punllami tucuita rurai tucuj maquihuan llujshichijpi egipciocuna ricucujllapitaj llujshimurcacuna.

⁴ Israelcuna llujshimucui punllaca egipciocunaca Mandaj Dios paicunapaj punta churicunata huañuchishcatami pambacurcacuna. Chashna rurashpami Mandaj Diosca egipciocunapaj dioscunaca yangalla cashcata ricuchirca.

⁵ Israelcunaca Egiptopi caj Ramesés pueblomanta llujshimushpaca, Sucotpimi carpa huasicunata shayachishpa tiyarircacuna.

⁶ Sucotmanta rishpaca, shitashca pambapaj lindecuna c'uchullapi caj Etam pambapimi carpa huasicunata shayachishpa tiyarircacuna.

⁷ Etammanta rishpaca, Baal-zefonmanta inti llujshin ladoman caj Pi-hahirot ladoman muyushpa rishpami, Migdol ch'imbapurapi carpa huasicunata shayachishpa tiyarircacuna.

⁸ Pi-hahirotmanta rishpaca, Puca Cuchata ch'imbashpami, shitashca pambaman chayarcacuna. Etam shuti shitashca pambataca quimsa punllata purishpami, Maraman chayashpa carpa huasicunata shayachishpa tiyarircacuna.

⁹ Maramanta rishpaca, Elimmanmi chayarcacuna. Chaipica chunga ishqui pugyucuna, canchis chunga palmera yuracunami tiyarca. Chaipimi carpa huasicunata shayachishpa tiyarircacuna.

¹⁰ Elimmanta rishpaca, Puca Cucha c'uchupimi carpa huasicunata shayachishpa tiyarircacuna.

¹¹ Puca Cucha c'uchumanta rishpaca, Sin nishca shitashca pambaman chayashpami, carpa huasicunata shayachishpa tiyarircacuna.

¹² Sin nishca shitashca pambamanta rishpaca, Dofcaman chayashpami, carpa huasicunata shayachishpa tiyarircacuna.

¹³ Dofcamanta rishpaca, Alusman chayashpami, carpa huasicunata shayachishpa tiyarircacuna.

¹⁴ Alusmanta rishpaca, Refidimman chayashpami, carpa huasicunata shayachishpa tiyarircacuna. Chaipica yacuca mana tiyarcachu. Chaimi israelcunaca imata mana ubyai tucurcacuna.

¹⁵ Refidimmanta rishpaca, Sinaí shuti shitashca pambaman chayashpami, carpa huasicunata shayachishpa tiyarircacuna.

¹⁶ Sinaí shuti shitashca pambamanta rishpaca, Kibrot-hataavaman chayashpami, carpa huasicunata shayachishpa tiyarircacuna.

¹⁷ Kibrot-hataavamanta rishpaca, Hazerotman chayashpami, carpa huasicunata shayachishpa tiyarircacuna.

¹⁸ Hazerotmanta rishpaca, Ritmaman chayashpami, carpa huasicunata shayachishpa tiyarircacuna.

¹⁹ Ritmamanta rishpaca, Rimón-peres shuti pambaman chayashpami, carpa huasicunata shayachishpa tiyarircacuna.

²⁰ Rimón-peresmanta rishpaca, Libnaman chayashpami, carpa huasicunata shayachishpa tiyarircacuna.

²¹ Libnamanta rishpaca, Rissaman chayashpami, carpa huasicunata shayachishpa tiyarircacuna.

²² Rissamanta rishpaca, Ceelataman chayashpami, carpa huasicunata shayachishpa tiyarircacuna.

²³ Ceelatamanta rishpaca, Sefer urcuman chayashpami, carpa huasicunata shayachishpa tiyarircacuna.

²⁴ Sefer urcumanta rishpaca, Haradaman chayashpami, carpa huasicunata shayachishpa tiyarircacuna.

²⁵ Haradamanta rishpaca, Macelotman chayashpami, carpa huasicunata shayachishpa tiyarircacuna.

²⁶ Macelotmanta rishpaca, Tahatman chayashpami, carpa huasicunata shayachishpa tiyarircacuna.

²⁷ Tahatmanta rishpaca, Taraman chayashpami, carpa huasicunata shayachishpa tiyarircacuna.

²⁸ Taramanta rishpaca, Mitcaman chayashpami, carpa huasicunata shayachishpa tiyarircacuna.

²⁹ Mitcamanta rishpaca, Hasmonaman chayashpami, carpa huasicunata shayachishpa tiyarircacuna.

³⁰ Hasmonamanta rishpaca, Moserotman chayashpami, carpa huasicunata shayachishpa tiyarircacuna.

³¹ Moserotmanta rishpaca, Bene-jaacanman chayashpami, carpa huasicunata shayachishpa tiyarircacuna.

³² Bene-jaacanmanta rishpaca, Gidgad urcuman chayashpami, carpa huasicunata shayachishpa tiyarircacuna.

³³ Gidgad urcumanta rishpaca, Jotbataman chayashpami, carpa huasicunata shayachishpa tiyarircacuna.

³⁴ Jotbatamanta rishpaca, Abronaman chayashpami, carpa huasicunata shayachishpa tiyarircacuna.

³⁵ Abronamanta rishpaca, Ezión-geberman chayashpami, carpa huasicunata shayachishpa tiyarircacuna.

³⁶ Ezión-gebermanta rishpaca, Zin nishca shitashca pambapi caj Cades puebloman chayashpami, carpa huasicunata shayachishpa tiyarircacuna.

³⁷ Cadesmanta rishpaca, Edom llajtapaj lindepi caj Hor shuti urcuman chayashpami, carpa huasicunata shayachishpa tiyarircacuna.

³⁸ Chaipimi Aarón curaca, Mandaj Dios mandajpi Hor shuti urcuman huichiyashpa chaipi huañurca. Chai punllacamaca israelcuna Egiptomanta llujshimushcaca, ñami chuscu chunga huatacuna tucugrirca. Huatapaj pichca quilla, chai quillapaj punta punllapimi huañurca.

³⁹ Aaronca, 123 huatacunayuj cashpami, Hor shuti urcupi huañurca.

⁴⁰ Canaanpi caj Neguevpica, Arad shuti pueblomi tiyarca. Chai pueblopi cashpami cananeocunata jatun mandajca israelcuna shamucun nijta uyarca.

⁴¹ Hor shuti urcumanta rishpaca, Zalmonaman chayashpami, carpa huasicunata shayachishpa tiyarircacuna.

⁴² Zalmonamanta rishpaca, Punonman chayashpami, carpa huasicunata shayachishpa tiyarircacuna.

⁴³ Punonmanta rishpaca, Obotman chayashpami, carpa huasicunata shayachishpa tiyarircacuna.

⁴⁴ Obotmanta rishpaca, Moab llajtapaj linde c'uchupi caj Ije-abarimman chayashpami, carpa huasicunata shayachishpa tiyarircacuna.

⁴⁵ Ije-abarimmanta rishpaca, Dibón-gadman chayashpami, carpa huasicunata shayachishpa tiyarircacuna.

⁴⁶ Dibón-gadmanta rishpaca, Almón-diblataimman chayashpami, carpa huasicunata shayachishpa tiyarircacuna.

⁴⁷ Almón-diblataimmanta rishpaca, Nebo urcumanta inti llujshin ladoman caj Abarim urcucunaman chayashpami, carpa huasicunata shayachishpa tiyarircacuna.

⁴⁸ Abarim urcucunamanta rishpaca, Jericó urcumanta inti llujshin ladoman caj Jordán yacu c'uchupi caj Moab pambaman chayashpami, carpa huasicunata shayachishpa tiyarircacuna.

⁴⁹ Jordán yacu c'uchupi caj Moab pambapica, israelcunaca Bet-jesimot pueblomanta callarishpaca, Abel-sitim pueblocamami carpa huasicunata shayachishpa tiyarircacuna. Chashna shamunataca chaipimi tucuchirca.

Canaán llajtaman yaicushpa imallata rurachun mandashcami

⁵⁰ Mandaj Diosca Jericomanta inti llujshin ladoman caj Jordán yacu c'uchupi caj Moab pambapi Moisesta mandashpaca cashnami nirca:

⁵¹ “Israelcunataca cashna ni: Jordán yacuta ch'imbashpa Canaanman ña yaicushpaca,

⁵² chai llajtapi causajcunataca, cancunapaj ñaupajmantaca tucuita anchuchinguichij. Rumimanta rurashca dioscunatapish, fierrota yacuyachishpa imamanpish rijchaj paicunapaj dioscunatapish tucuita ñutunguichij. Lomacunapi rurashca paicunapaj altarcunatapish tucuita ñutunguichij.

⁵³ Chai llajtapi causajcunata anchuchishpa chaipica cancuna causanguichij. Chai llajta cancuna quiquinpaj cachun ñucami cancunaman curcani.

⁵⁴ Chai llajtataca sorteashpa, cada familia ima shina cashca shinallataj japinguichij. Achca cajmanca achcata cunguichij. Ashalla cajmanca ashallata cunguichij. Sorteajpi maipimi urman, chaitataj cunguichij. Cancunapaj yayacunamanta mirarishca aillucuna ima shina cashca shinallataj japinguichij.

⁵⁵ Chai llajtapi causajcunata cancunapaj ñaupajmanta tucuita mana anchuchijpica, cancuna mana anchuchijpi saquirijcunaca, cancunapajca ñahuipi ujsha yaicushpa tujsicuj shina, cancunapaj huijsa quinricunapi casha tujsicuj shinami canga. Chashna rurashpaca cancunaman cushca llajtapi cancuna causai callarijpica llaquichingami.

⁵⁶ Paicunata ima shina rurasha nishca shinallatajmi cancunatapish rurasha”.