NÚMEROS 3 - Dios Rimashca Shimicunami

Levitacuna imallata ruranami

¹ Mandaj Dios Sinaí urcupi Moiseshuan parlanacui punllapica, Aaronpaj huahua huahuacunapish, Moisespaj huahua huahuacunapish caicunami carca:

² Aaronpaj churicunapaj shuticunaca caicunami carca: Punta churica Nadab. Q'uipa churicunaca Abiú, Eleazar, Itamarmi carca.

³ Aaronpaj churicunaca chaicunami carca. Paicunataca curacuna cachun aceitehuan churashpami, Diospajta ruraj curacuna cachun ch'icanchirca.

⁴ Nadabhuan, Abiuhuanca Mandaj Diosman Sinaí shitashca pambapi manapish rupachina ninahuan Mandaj Diosman cushpa rupachicushcamantami, paipaj ñaupajpi huañurca. Paicunaca huahuacunata mana charircacunachu. Chaimi Eleazarhuan, Itamarllahuan Diospajta rurana cashcataca, paicunapaj yaya Aarón yachachishca shinallataj rurajcuna carca.

⁵ Mandaj Dios Moisesta mandashpaca cashnami nirca:

⁶ “Leví aillutaca, Aarón imallata rurachun nishcata rurachun, paipaj ñaupajman pushamui.

⁷ Paicunaca Dioshuan tupanacuna carpa huasipi, tucui israelcunamanta imallata rurana cashcata Aarón mandashca shina rurachun. Diospajlla huasipi imalla rurana cashcataca paicuna rurachun.

⁸ Dioshuan tupanacuna carpa huasipi Diospajta ruranapaj tucui imalla charinacunata cuidachun. Israelcunamanta imallata rurana cashcatapish paicuna rurachun. Paicunaca Diospaj carpa huasipi imalla rurana cashcata rurachun.

⁹ Levitacunaca israelcunapuramanta ch'icanchishca cashcamanta Aaronpish, paipaj churicunapish imallata rurachun nishcata rurachun churangui.

¹⁰ Curacuna rurana cashcata rurachunca, Aaronta, paipaj churicunallata churangui. Pi shujtaj chaita ruranaman c'uchuyashpaca huañungami” nircami.

Levitacunaca Diospajllami

¹¹ Mandaj Dios Moisesta mandashpaca cashnami nirca:

¹² “Israelcunapurapi paicunapaj tucui punta churicunaca ñucapajmi. Tucui israelcunapaj punta churicunata ñuca japinapaj randica, tucui levitacunatami ñucapaj cachun japircani.

¹³ Punta huacharishcacunaca tucuicunami ñucapaj. Egiptocunapaj punta churicunata huañuchi punllamanta pachami, israelcunapaj punta churicunataca ñucapaj cachun ch'icanchircani. Israelpica punta huacharishca churicunapish, punta huacharishca animalcunapish ñucapajmi. Mandaj Dios ñucami chashna nini” nircami.

Levitacunata quillcashpa yupashcami

¹⁴ Mandaj Diosca Sinaí shuti shitashca pambapi Moisesta mandashpaca cashnami nirca:

¹⁵ “Levipaj huahua huahuacunataca cada yayamanta mirarimushcacunapaj cada huasi familiata yupashpa shuj quillata charij c'ari huahuacunamanta huichiman tucui c'aricunapaj shuticunata quillcai” nircami.

¹⁶ Chaimi Moisesca, Mandaj Dios mandashca shinallataj shuticunata quillcarca.

¹⁷ Levipaj churicunaca: Gersón, Coat, Merari shuticunami carca.

¹⁸ Gersonpaj churicunamanta mirarishcacunaca: Libnitacuna, simeitacunami carca.

¹⁹ Coatpaj churicunamanta mirarishcacunaca: Amramitacuna, izharitacuna, hebronitacuna, uzielitacunami carca.

²⁰ Meraripaj churicunamanta mirarishcacunaca: Mahlicuna, musicunami carca. Paicunapaj cada yayamanta ima shina mirarimushca Levipaj cada familiacunaca tucui chaicunami carca.

²¹ Gersonmanta mirarishcacunaca: Libnitacuna, simeitacunami. Gersonmanta mirarishcacunaca chaicunami carca.

²² Paicunatapish shuj quillata charij c'ari huahuacunamanta huichiman, tucui c'aricunapaj shuticunata quillcashpa yupajpica, 7.500mi carca.

²³ Gersonpaj familiacunaca, Diospaj carpa huasi huasha ladoman inti huashicun ladoman carpa huasicunata shayachishpami tiyarijcuna carca.

²⁴ Gersonpaj huahua huahuacunata pushajca Laelpaj churi Eliasafmi carca.

²⁵ Gersonpaj huahua huahuacunaca Dioshuan tupanacuna carpa huasipica: Diospaj carpa huasita, chai huasi c'atata, chai huasiman yaicuna punguta jarcachishca linsota,

²⁶ Diospaj huasi canlla lado muyundijta jarcachishca linsota, Diospaj huasi canllaman yaicuna punguta jarcachishca linsota, altarta, tucui chaicunapi imalla ruranapaj caj huascacunatapish cuidajcunami carca.

²⁷ Coatmanta mirarishcacunaca: Amramitacuna, izharitacuna, hebronitacuna, uzielitacunami. Coatmanta mirarishcacunaca chaicunami carca.

²⁸ Paicunatapish shuj quillata charij c'ari huahuacunamanta huichiman tucui c'aricunapaj shuticunata quillcashpa yupajpica, 8.600mi carca. Paicunaca Diospajlla huasita cuidajcunami carca.

²⁹ Coatpaj churicunapaj huahua huahuacunaca, Diospaj carpa huasi ura ladoman paicunapaj carpa huasicunata shayachishpami tiyarijcuna carca.

³⁰ Coatpaj huahua huahuacunata pushajca Uzielpaj churi Elizafanmi carca.

³¹ Paicuna cuidanaca: Diospaj arca, meza, candelero, altarcuna, Diospajlla carpa huasi ucupi Diospajta ruranapaj imalla charinacuna, chai ucupi jarcachishca linso, linsota huarcunapaj imalla minishtirishcacunami carca.

³² Levitacunata pushajca, Aarón curapaj churi Eleazarmi carca. Diospajlla huasita cuidajcunata mandajpish paillatajmi carca.

³³ Meraripaj huahua huahuacunaca: Mahlita nishcacuna, Musita nishcacunami. Miraripaj huahua huahuacunaca chaicunami carca.

³⁴ Paicunatapish shuj quillata charij c'ari huahuacunamanta huichiman tucui c'aricunapaj shuticunata quillcashpa yupajpica, 6.200mi carca.

³⁵ Paicunapaj ñaupa yayacunamanta mirarimushca cada familiata pushajca Abihailpaj churi Zurielmi carca. Paicunaca Diospaj carpa huasi janaj ladoman paicunapaj carpa huasicunata shayachishpami tiyarijcuna carca.

³⁶ Meraripaj huahua huahuacuna cuidanaca: Diospaj carpa huasi tablacuna, quinriman churashca caspicuna, pilarcuna, chai pilarcunata shayachina basacuna, chaipi imallata ruranapaj cajcuna,

³⁷ Diospaj carpa huasi canlla muyundij pilarcuna, chai pilarcunata shayachina basacuna, ishtacacuna, tucui chaicunapi imalla ruranapaj caj huascacunapishmi carca.

³⁸ Diospajlla huasi ñaupaj ladoman, Dioshuan tupanacuna carpa huasi ñaupaj lado, inti llujshin ladomanca Moisés, Aarón, Aaronpaj huahua huahuacunami paicunapaj carpa huasicunata shayachishpa tiyarijcuna carca. Paicunaca Diospajlla huasitami israelcunapaj randi chaipi cuidajcuna carca. Shujtajcuna chaiman yaicushpaca, huañunami carca.

³⁹ Moiseshuan, Aaronhuanca Mandaj Dios mandashca shinallatajmi levitacunataca cada familiata ch'ican ch'icanta shuj quillata charij c'ari huahuacunamanta huichiman tucui c'aricunapaj shuticunata quillcarca. Tucuicunata tandachishpa yupajpica, 22.000mi carca.

Diosca, israelcunapuramanta punta huacharishca c'ari huahuacunapaj randica levitacunata japishcami

⁴⁰ Mandaj Diosca Moisestaca cashnami nirca: “Israelcunapaj punta churicunataca shuj quillata charij huahuacunamanta callarishpa tucui c'aricunata yupashpa paicunapaj shuticunata quillcai.

⁴¹ Chai q'uipaca israelcunapaj punta churicunapaj randica levitacunata ñucapajlla cachun ch'icanchingui. Israelcunapaj animalcuna punta huachashca c'ari animalcunapaj randipish, levitacunapaj animalcunata ñucapaj cachun ch'icanchingui. Mandaj Dios ñucami chashna nini” nircami.

⁴² Moisesca, Mandaj Dios mandashca shinallatajmi israelcunapaj punta churicunataca tucuicunata yuparca.

⁴³ Punta huacharishca c'ari huahuacunata shuj quillata charij huahuacunamanta huichiman tucuicunapaj shuticunata quillcashpa yupajpica, 22.273mi carca.

⁴⁴ Chai q'uipaca Mandaj Diosca Moisestaca cashnami mandarca:

⁴⁵ “Israelcunapaj punta churicunapaj randica, levitacunata ñucapaj cachun japingui. Israelcunapaj animalcunapaj randipish, levitacunapaj animalcunata ñucapaj cachun japingui. Levitacunaca tucuicunami ñucapaj canga. Mandaj Dios ñucami chashna nini.

⁴⁶ Israelcunapaj punta churicunaca levitacunataca, 273huan yallimi. Chai yallishcacunata israelcuna llujshichichunca,

⁴⁷ cada huahuamanta pichca siclo cullquita japingui. Chaitaca Diospaj carpa huasipi tiyaj cullquita pezanapi pezashpa japingui. (Shuj siclo cullquica ishqui chunga geratami charin).

⁴⁸ Yallishca churicunata llujshichingapaj japishca cullquitaca Aaronman, paipaj churicunaman cungui” nircami.

⁴⁹ Chaimi Moisesca, levitacunata yallishca israelcunapaj punta churicunata llujshichingapaj cullquita cujpi japirca.

⁵⁰ Israelcunapaj punta churicunamanta chasquishca cullquica, 1.365 siclomi carca. Chai cullquitaca, Diospaj carpa huasipi tiyaj cullquita pezanapi pezashpami japirca.

⁵¹ Israelcunapaj punta churicunata llujshichingapaj cushca cullquita japishpaca, Moisesca Mandaj Dios nishca shinallatajmi Aaronman, paipaj churicunaman curca. Mandaj Dios mandashca shinallatajmi tucuita rurarca.