NÚMEROS 26 - Dios Rimashca Shimicunami

Israelcuna mashna cashcata Moabpi yupashcami

¹ Huañuchij llaquita cachashca q'uipami, Mandaj Diosca Moisestapish, Aarón curapaj churi Eleazartapish mandashpaca cashna nirca:

² “Tandanacushca israelcunata yupashpa quillcai. Paicunataca paicunapaj yayamanta ima shina mirarimushca shinallatataj, ishqui chunga huatayujmanta huichiman macanacunaman llujshi tucuipaj israelcunallata tucuicunata quillcashpa yupaichij” nircami.

³ Moisespish Eleazar curapish Mandaj Dios imallata nishcatami israelcunaman huillarca. Jericó ch'imbapurapi caj, Jordán yacu c'uchu uri Moab pambapi israelcunaman huillashpaca cashnami nirca:

⁴ “Mandaj Dios Moisesta ima shina mandashca shinallataj, ishqui chunga huatayujmanta huichiman caj israelcunata quillcashpa yupai” nircami. Egiptomanta llujshimushca israelcunaca caicunami carca:

⁵ Israelpaj punta churica, Rubenmi carca. Rubenpaj churicunamanta mirarishcacunaca Enocmanta mirarishca enoquitas nishca familiacuna, Falumanta mirarishca faluititas nishca familiacuna,

⁶ Hezronmanta mirarishca hezronitas nishca familiacuna, Carmimanta mirarishca carmitas nishca familiacunami carca.

⁷ Rubenmanta mirarishca familiacunaca tucui chaicunami. Paicunapaj shuticunata quillcashpa yupajpica 43.730mi carca.

⁸ Falupaj churicunamanta mirarishcacunaca eliabita nishcacunami.

⁹ Eliabpaj churicunaca: Nemuel, Datán, Abiram shuticunami carca. Datán, Abiram runacunaca israelcunata cunajcunami carca. Paicunami Mandaj Diostapish, Moisestapish, Aarontapish Coré runahuan tucushpa juchachishpa c'amircacuna. Datantapish, Abiramtapish Mandaj Diosta p'iñashpa c'ariyashcamantami,

¹⁰ allpaca pascarishpa Coré runandij millpurca. Chashnami Coré runahuan tucushpa Mandaj Diosta c'ariyajcunaca huañurca. Coré runahuan tucushpa jatarij 250 israelcunapish nina rupachijpi rupashpami huañurca. Chai llaquicunaca shujtajcunapish paicuna shina ama millaita rurachun yuyachingapajmi carca.

¹¹ Chai llaquipica, Coré runapaj churicunaca mana huañurcacunachu.

¹² Simeonpaj churicunamanta mirarishca familiacunaca: Nemuel runamanta mirarishca nemuelitas nishca familiacuna, Jamín runamanta mirarishca jaminitas nishca familiacuna, Jaquín runamanta mirarishca jaquinitas nishca familiacuna,

¹³ Zera runamanta mirarishca zeraitas nishca familiacuna, Saúl runamanta mirarishca saulitas nishca familiacunami carca.

¹⁴ Simeonitas nishca familiacunaca tucui chaicunami. Paicunapaj shuticunatapish quillcashpa yupajpica 22.200mi carca.

¹⁵ Gadpaj churicunamanta mirarishca familiacunaca: Zefón runamanta mirarishca zefonitas nishca familiacuna, Hagui runamanta mirarishca haguitas nishca familiacuna, Suni runamanta mirarishca sunitas nishca familiacuna,

¹⁶ Ozni runamanta mirarishca oznitas nishca familiacuna, Eri runamanta mirarishca eritas nishca familiacuna,

¹⁷ Arod runamanta mirarishca aroditas nishca familiacuna, Areli runamanta mirarishca arelitas nishca familiacunami carca.

¹⁸ Gadmanta mirarishca familiacunaca tucui chaicunami. Paicunapaj shuticunatapish quillcashpa yupajpica 40.500mi carca.

¹⁹ Judapaj churicunaca: Er, Onán shuticunami carca. Er, Onán runacunaca Canaán llajtapi cashparajmi huañurca.

²⁰ Judapaj churicunamanta mirarishca familiacunaca: Sela runamanta mirarishca selaitas nishca familiacuna, Fares runamanta mirarishca faresitas nishca familiacuna, Zera runamanta mirarishca zeraitas nishca familiacunami carca.

²¹ Fares runapaj churicunamanta mirarishcacunaca: Hezrón runamanta mirarishca hezronitas nishca familiacuna, Hamul runamanta mirarishca hamulitas nishca familiacunami carca.

²² Judamanta mirarishca familiacunaca tucui chaicunami. Paicunapaj shuticunatapish quillcashpa yupajpica 76.500mi carca.

²³ Isacarpaj churicunamanta mirarishca familiacunaca: Tola runamanta mirarishca tolaitas nishca familiacuna, Fúa runamanta mirarishca funitas nishca familiacuna,

²⁴ Jasub runamanta mirarishca jasubitas nishca familiacuna, Simrón runamanta mirarishca simronitas nishca familiacunami carca.

²⁵ Isacar aillumanta mirarishca familiacunaca tucui chaicunami. Paicunapaj shuticunatapish quillcashpa yupajpica 64.300mi carca.

²⁶ Zabulonpaj churicunamanta mirarishca familiacunaca: Sered runamanta mirarishca sereditas nishca familiacuna, Elón runamanta mirarishca elonitas nishca familiacuna, Jahleel runamanta mirarishca jahleelitas nishca familiacunami carca.

²⁷ Zabulonitas nishca familiacunaca tucui chaicunami. Paicunapaj shuticunatapish quillcashpa yupajpica 60.500mi carca.

²⁸ Josepaj Manasés, Efraín ishqui churicunamanta mirarishca familiacunaca.

²⁹ Manasespaj churicunamanta mirarishcacunaca: Maquir runamanta mirarishca maquiritas nishca familiacunami carca. Maquirca Galaad churitami charirca. Galaadmanta mirarishca galaaditas nishca familiacunami carca.

³⁰ Galaadpaj churicunamanta mirarishcacunaca: Jezer runamanta mirarishca jezeritas nishca familiacuna, Helec runamanta mirarishca helequitas nishca familiacuna,

³¹ Asriel runamanta mirarishca asrielitas nishca familiacuna, Siquem runamanta mirarishca siquemitas nishca familiacuna,

³² Semida runamanta mirarishca semidaitas nishca familiacuna, Hefer runamanta mirarishca heferitas nishca familiacunami carca.

³³ Hefer runapaj churi Zelofehad runaca, churicunataca mana charircachu. Ushushicunallatami charirca. Zelofehadpaj ushushicunaca Maala, Noa, Hogla, Milca, Tirsa shuticunami carca.

³⁴ Manasesmanta mirarishca familiacunaca, tucui chaicunami. Paicunapaj shuticunatapish quillcashpa yupajpica 52.700mi carca.

³⁵ Efrainpaj churicunamanta mirarishca familiacunaca: Sutela runamanta mirarishca sutelaitas nishca familiacuna, Bequer runamanta mirarishca bequeritas nishca familiacuna, Tahán runamanta mirarishca tahanitas nishca familiacunami carca.

³⁶ Sutelapaj churimanta mirarishcacunaca: Erán runamanta mirarishca eranitas nishca familiacunami carca.

³⁷ Efrainpaj churicunamanta mirarishca familiacunaca tucui chaicunami. Paicunapaj shuticunatapish quillcashpa yupajpica, 32.500mi carca. Tucui chaicunami, Josepaj churicunamanta mirarishca familiacuna carca.

³⁸ Benjaminpaj churicunamanta mirarishca familiacunaca: Bela runamanta mirarishca belaitas nishca familiacuna, Asbel runamanta mirarishca asbelitas nishca familiacuna, Ahiram runamanta mirarishca ahiramitas nishca familiacuna,

³⁹ Sufam runamanta mirarishca sufamitas nishca familiacuna, Hufam runamanta mirarishca hufamitas nishca familiacunami carca.

⁴⁰ Bela runaca Ard, Naamán churicunatami charirca. Ard runamanta mirarishcacunaca arditas nishca familiacuna, Naamán runamanta mirarishcacunaca naamitas nishca familiacunami carca.

⁴¹ Benjaminpaj churicunamanta mirarishca familiacunaca tucui chaicunami. Paicunapaj shuticunatapish quillcashpa yupajpica 45.600mi carca.

⁴² Danpaj churicunamanta mirarishca familiacunaca: Súham runamanta mirarishca suhamitas nishca familiacunami carca. Danmanta mirarishca familiacunaca tucui chaicunami.

⁴³ Suhamita nishca familiacunapaj shuticunatapish quillcashpa yupashcaca 64.400mi carca.

⁴⁴ Aserpaj churicunamanta mirarishca familiacunaca: Imna runamanta mirarishca imnitas nishca familiacuna, Isúi runamanta mirarishca isuitas nishca familiacuna, Bería runamanta mirarishca beriaitas nishca familiacunami carca.

⁴⁵ Beriapaj churicunamanta mirarishcacunaca: Heber runamanta mirarishca heberitas nishca familiacuna, Malquiel runamanta mirarishca malquielitas nishca familiacunami carca.

⁴⁶ Aser runaca Sera shuti ushushitapishmi charirca.

⁴⁷ Aserpaj churicunamanta mirarishca familiacunaca tucui chaicunami. Paicunapaj shuticunatapish quillcashpa yupajpica 53.400mi carca.

⁴⁸ Neftalipaj churicunamanta mirarishca familiacunaca: Jahzeel runamanta mirarishca jahzeelitas nishca familiacuna, Guni runamanta mirarishca gunitas nishca familiacuna,

⁴⁹ Jezer runamanta mirarishca jezeritas nishca familiacuna, Silem runamanta mirarishca silemitas nishca familiacunami carca.

⁵⁰ Neftalimanta mirarishca familiacunaca tucui chaicunami. Paicunapaj shuticunatapish quillcashpa yupajpica 45.400mi carca.

⁵¹ Tucui israelcunapaj shuticunata quillcashcata yupashcacunata tucuita tandachishpa yupajpica 601.730mi carca.

Allpata chaupichun mandashcami

⁵² Mandaj Dios Moisesta mandashpaca cashnami nirca:

⁵³ “Shuticunata quillcashpa yupashca israelcunamanca, ima shina shuticunata quillcashca shinallataj allpata chaupishpa cungui.

⁵⁴ Achca caj aillumanca, achca allpata cungui. Ashalla caj aillumanca ashalla allpata cungui. Shuticunata quillcashpa yupashca shinallataj allpacunatapish cada quiquinman cungui.

⁵⁵ Allpata chaupishpaca sorteashpa cungui. Maijan yayapaj aillupura cashpapish, chaipurallapitaj japichuncuna.

⁵⁶ Allpata chaupishpa sorteajpica, maipi urmashcapi japichun. Achcacunaca, achca allpatami japinga. Ashallacunapish, ashalla allpatami japinga” nircami.

Levipaj aillutapish shuticunata quillcashpa yupashcami

⁵⁷ Levipaj churicunamanta mirarishca familiacunata quillcashpa yupajpica caicunami: Gersonmanta mirarishca gersonitas nishca familiacuna, Coatmanta mirarishca coatitas nishca familiacuna, Merari runamanta mirarishca meraritas nishca familiacunami carca.

⁵⁸ Levitacunamanta mirarishca familiacunaca: Libnitas nishca familiacuna, hebronitas nishca familiacuna, mahlitas nishca familiacuna, musitas nishca familiacuna, coreitas nishca familiacunami carca. Coatca Amram shuti churitami charirca.

⁵⁹ Amrampaj huarmica Leví runapaj ushushi Jocabedmi carca. Leví runaca Egiptopi cashparajmi, Jocabed ushushitaca charirca. Jocabed huarmica Amramhuanmi Aarón, Moisés churicunatapish, María shuti ushushitapish charirca.

⁶⁰ Aaronca Nadab, Abiú, Eleazar, Itamar shuti churicunatami charirca.

⁶¹ Nadabhuan, Abiuhuanca manapish rupachina ninahuan Mandaj Diosman cushpa rupachicushcamantami, Mandaj Diospaj ñaupajpi huañurca.

⁶² Levitacunamanta mirarishcacunata shuj quillata charij huahuacunamanta huichiman tucui c'aricunapaj shuticunatapish quillcashpa yupajpica 23.000mi carca. Israelcunata quillcashpa yupacushpaca levitacunataca mana quillcashpa yuparcachu. Israelcunapurapi tarpuna allpata mana cuna cashcamantami israelcunahuan tandalla levitacunataca mana quillcarca.

Egiptomanta llujshimushpa shitashca pambapi causashpa shamujcunaca Calebhuan Josuellahuanmi mana huañushca

⁶³ Moiseshuan Eleazar curahuan tucushpa quillcashpa yupashcacunaca tucui chaicunami. Paicunaca Jericó pueblo ch'imbanijpi, Jordán yacu c'uchu uripi caj Moab pambapimi tucui israelcunata quillcashpa yuparca.

⁶⁴ Sinaí urcupi caj shitashca pambapi cashpa Moiseshuan Aarón curahuan tucushpa shuticunata quillcashpa yupashca israelcunaca, Jordán yacu uripi cashpa yupanapajca ñami tucui huañushca carca.

⁶⁵ Paicunataca Mandaj Diosmi: “Cai shitashca pambapimi huañungacuna” nishca carca. Mandaj Dios huañungami nishcacunaca tucuicunami huañurcacuna. Jefonepaj churi Calebhuan, Nunpaj churi Josuellahuanmi saquirirca.