NÚMEROS 15 - Dios Rimashca Shimicunami

Ofrendacunata ima shinalla cunata mandashcami

¹ Mandaj Dios Moisesta mandashpaca cashnami nirca:

² “Israelcunataca cashna nishpa mandai: Cancuna causachun ñuca cusha nishca llajtaman ña yaicushca q'uipaca,

³ Mandaj Diosman cushpa rupachina ofrendata cunguichij. Chaicunataca vacacunata cashpa, ovejacunata cashpa Diosman cushpa tucui rupachina cajpi, Diosman cushpa huañuchina cajpipish, cushami nishcata pajtachishpa cucushpapish, mana cashpaca cuna munaita charishcamanta cucushpapish, mana cashpaca cancunapaj jatun fiestapi Mandaj Diosman cuna cashcata cucushpapish, Mandaj Diospaj mishquiman ashnacuj cachun cunguichij.

⁴ Chaicunata Mandaj Diosman cucujca, shuj efa ashtahuan alli cutata chungapi chaupishca shuj parteta, shuj hinta chuscupi chaupishca shuj parte aceitehuan chapushcahuan cuchun.

⁵ Diosman animalta cushpa ña rupachishca cashpapish, tucuita cushpa rupachishca cashpapish cada malta c'ari ovejahuan tallinapaj vinotaca shuj hinta chuscupi chaupishca shuj parteta apamuchun.

⁶ Carnerohuan cungapajca, chungapi chaupishca ishqui parte ashtahuan alli cutata, shuj hinta quimsapi chaupishca shuj parte aceitehuan chapushcahuan cuchun.

⁷ Tallina vinotaca shuj hinta quimsapi chaupishca shuj parteta cuchun. Chashna cujpimi Mandaj Diospajca mishquiman ashnacuj canga.

⁸ Shuj huagrata cushpaca, Diosman cushpa tucui rupachinapaj cashpa, mana cashpaca Diosman cushpa rupachinapaj cashpa, cuna tucushcata pajtachingapaj cashpa, sumaj causaimanta Mandaj Diosman cunapaj cashpapish,

⁹ chai huagrahuanca chungapi chaupishca quimsa parte ashtahuan alli cutata, shuj hinta ishquipi chaupishca shuj parte aceitehuan chapushcahuan cuchun.

¹⁰ Tallina vinotaca shuj hinta ishquipi chaupishca shuj parteta cuchun. Chaimi cushpa rupachishcacunaca Mandaj Diospajca mishquiman ashnacuj canga.

¹¹ Cada huagrahuan ima shina cunata, cada carnerohuan ima shina cunata, cada malta c'ari ovejahuan ima shina cunata, cada chivohuan ima shina cunataca,

¹² mashna animal cajpipish cada animalhuan ima shina cuna cashca shinallataj cuchun.

¹³ Mandaj Diospaj mishquiman ashnacuj cachun rupachishpa cucushpaca, tucui israelcuna chashna rurashpa cuchun.

¹⁴ Maijan mana israelcuna shamushpalla cancunapurapi causacushpapish, mana cashpaca causaitataj cancunahuan causacuj cashpapish, mishquiman ashnacuj cachun Mandaj Diosman rupachishpa cunapaj cusha nishpaca, cancuna ima shina cuj cashca shinallataj cuchun.

¹⁵ Israelcuna cashpapish, cancunahuan causacuj mana israelcuna cashpapish ima shinalla rurashpa pajtachinataca chai shina mandashcallatajmi charinguichij. Chaitaca cancunapaj huahua huahuacunapish, cancunahuan causacuj mana israelcunapaj huahua huahuacunapish chai shinallataj ruracuchunlla. Chashna rurashpami mana israelcunaca, cancuna shinallataj Mandaj Diospaj ñaupajpica cangacuna.

¹⁶ Israelcuna cashpapish, cancunahuan causacuj mana israelcuna cashpapish chai shinallataj mandashcata, chai shinallataj rurashpa pajtachinatami charinguichij” nircami.

¹⁷ Mandaj Dios Moisesta mandashpaca cashnami nirca:

¹⁸ “Israelcunataca cashna nishpa mandai: Cancunata ñuca pushacun llajtaman ña chayashpaca,

¹⁹ chai llajtapi p'ucushca granocunata micui callaringapajca, puntaca Mandaj Diosmanraj cunguichij.

²⁰ Trigota trillashpa ñucamanraj cuj shinallataj, punta trigo cutata masashpaca, chai masamanta punta rurashca tortataca ñucamanraj cunguichij.

²¹ Tandata rurangapaj masashpaca, Mandaj Diosmanraj cunguichij. Chaitaca cancunapaj huahua huahuacunapish chai shinallataj ruracuchunlla.

²² Mandaj Dios Moisesman huillachishca cai mandashcacunamanta maijanta cashpapish mana alli yuyarishpa, mana tucuita pajtachingachari.

²³ Tucui cai mandashcacunataca Mandaj Diosca Moisesman pai huillachi punllamanta tucui cancunapaj huahua huahuacuna pajtachicuchunlla mandashcami.

²⁴ Tucui israelcuna cai mandashcacunata mana tucuita yuyarishcamanta mana tucuita pajtachishpa juchallishpaca, tucuicunamanta shuj huagrata apamushpa Mandaj Diosman cuchun. Chaitaca Mandaj Diospaj mishquiman ashnacuj cachunca, paiman cushpa tucui rupachichun. Chaihuan cunapajca mandashcapi ima shina cuna nishca shinallataj Diosman cuna granocunatapish, tallina vinotapish cuchun. Paicunapaj juchamanta cuchunca shuj chivota cuchun.

²⁵ Paicuna chaita cujpimi, curaca tucui israelcunapaj juchamanta Diosman cunga. Chaipimi mana alli yuyarishcamanta mana tucui pajtachishcataca perdonashca canga. Mana alli yuyarishcamanta mana tucuita pajtachishca cashpaca, tucuicunami Diosman cuna cashcatapish, Mandaj Diosman cushpa rupachina cashcatapish, juchamanta cushpa rupachinatapish Mandaj Diospaj ñaupajpi cungacuna.

²⁶ Chashna rurajpimi tucui israelcunatapish, paicunahuan causaj mana israelcunatapish mana alli yuyarishcamanta mana tucuita pajtachishcataca tucuicunata perdonashca canga.

²⁷ Mana alli yuyarishcamanta maijan cashpapish shujlla mana tucuita pajtachishpa juchallijca, paipaj juchamantaca shuj huatayuj chivota Diosman cuchun.

²⁸ Mana alli yuyarishpa mana tucuita pajtachishpa Mandaj Diospaj ñaupajpi juchallishcamanta cushcataca, curami chai runamanta Mandaj Diosman cushpa Dioshuan alli tucunacuchinga. Chashna rurajpimi, perdonashca canga.

²⁹ Israelcuna cashpapish, cancunahuan causacuj mana israelcuna cashpapish mana alli yuyarishpa mana tucuita pajtachishpa juchallishcamantaca chai shina mandashcallatatajmi charinguichij.

³⁰ Israelcuna cashpapish, mana israelcuna cashpapish jatun tucushpa mana cazuj cashcamanta, Mandaj Dios mandashcata yuyaipi cashca jahuallataj juchallingachari. Chashna rurajtaca israelcunapaj chaupimanta anchuchishca cachun.

³¹ Mandaj Dios rimashcata mana cazushpa pai mandashcata yangapi churaj runataca tucuitaj chingachishca cachun. Paipaj juchaca paipaj jahuapimi canga” nircami.

Samana punllapi mana huaquichirij runata huañuchishcami

³² Shitashca pambapi israelcuna cashpaca, paicunapuramanta shuj runa samana punllapi yantata pallacujtami japircacuna.

³³ Yantata pallacujta japishpaca, Moisespaj, Aaronpaj, tucui israelcunapaj ñaupajmanmi pusharca.

³⁴ Chai runataca imata ruranata manaraj huillajpimi, paitaca carcelpi churarcacuna.

³⁵ Chaipimi Mandaj Diosca, Moisestaca: “Chai runaca huañunatajmi can. Chaimanta carpa huasicunamanta caruman llujshichishpa tucui israelcuna rumicunahuan shitashpa huañuchichij” nirca.

³⁶ Chaimi israelcunaca Mandaj Dios Moisesta mandashca shinallataj carpa huasicunamanta caruman llujshichishpa, huañungacama rumicunahuan shitarcacuna.

Churana filocunapi flecoscunata churachun mandashcami

³⁷ Mandaj Dios Moisesta mandashpaca cashnami nirca:

³⁸ “Israelcunataca cashna nishpa mandai: Churana filocunataca flecosyujta rurachun. Chai flecoscunapica, cada flecospi azul puchcamanta rurashca bolacunata churachun. Chaitaca cancunapaj huahua huahuacunapish chashna ruracuchunlla.

³⁹ Chai flecoscunata ricushpami, Mandaj Dios tucui mandashcacunata yuyaringuichij. Chaipica tucui imalla mandashcacunata chaitataj rurashpami pajtachinguichij. Cancunapaj shungu munashcata ruranacunapi, ñahui ricushcata ruranacunapica ña mana huainayanguichijchu.

⁴⁰ Chashnami tucui ñuca mandashcacunataca yuyarishpa chaitataj pajtachinguichij. Cancunapaj Diospaj ñaupajpica ima jucha illajllami canguichij.

⁴¹ Ñucaca cancunapaj Dios cangapaj Egiptomanta cancunata llujshichij, cancunata Mandaj Diosmi cani. Mandaj Dios ñucaca cancunapaj Diosmi cani ninmi” nircami.