NÚMEROS 1 - Dios Rimashca Shimicunami

Sinaipi cashpa israelcunata quillcashpa yupashcami

¹ Mandaj Diosca Sinaí urcupi caj shitashca pambapimi, Dioshuan tupanacuna carpa huasipi Moiseshuan rimarca. Egiptomanta israelcuna llujshimushca ña ishqui huata, ishqui quilla, chai quillapaj punta punllapimi Moisestaca cashna nirca:

² “Israelpaj huahuacunataca familiapuracunatapish, cada yayacunapaj huasi ucupuracunatapish tucui c'aricunapaj shuticunata cada quiquinta quillcashpa yupai.

³ Macanacuiman llujshipaj caj israelcunataca Aaronhuan tucushpa, ishqui chunga huatata charijmanta huichiman tucuicunata quillcanguichij. Paicunataca cada mirgata churanguichij.

⁴ Cancunahuanca cada aillumanta shuj pushaj cachun. Chaicunaca cada yayacunapaj huasi ucupuracunata pushaj cachun.

⁵ Cancunahuan cajcunapaj shuticunaca: Rubén aillumantaca, Sedeurpaj churi Elisur cachun.

⁶ Simeón aillumantaca Zurisadaipaj churi Selumiel cachun.

⁷ Judá aillumantaca Aminadabpaj churi Naasón cachun.

⁸ Isacar aillumantaca Zuarpaj churi Natanael cachun.

⁹ Zabulón aillumantaca, Helonpaj churi Eliab cachun.

¹⁰ Josepaj churicunamanta: Efraín aillumantaca, Amiudpaj churi Elisama cachun. Manasés aillumantaca, Pedasurpaj churi Gamaliel cachun.

¹¹ Benjamín aillumantaca, Gedeonipaj churi Abidán cachun.

¹² Dan aillumantaca, Amisadaipaj churi Ahiezer cachun.

¹³ Aser aillumantaca, Ocranpaj churi Pagiel cachun.

¹⁴ Gad aillumantaca, Deuelpaj churi Eliasaf cachun.

¹⁵ Neftalí aillumantaca, Enanpaj churi Ahira cachun” nircami.

¹⁶ Chaicunaca tucui tandanacushca ñaupa yaya aillucunamanta mirarishcacunata pushajcunami carca. Paicunallatajmi huaranga huaranga israelcunata pushajcuna carca.

¹⁷ Moisespish, Aaronpish paicunata ayudachun shutichishpa churashca runacunahuan tucushpami,

¹⁸ huatapaj ishqui quilla, chai quillapaj punta punllapi tucui israelcunata tandachirca. Chaipimi paicunaca familiapuracunatapish, cada yayapaj huasi ucupuracunatapish ishqui chunga huatayujmanta huichiman caj c'aricunapaj shuticunata cada quiquinpajta quillcarca.

¹⁹ Moisesca Mandaj Dios mandashca shinallatajmi, Sinaí shuti shitashca pambapica yuparca.

²⁰ Israelpaj punta churi Rubenpaj huahua huahuacunataca cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

²¹ Rubenpaj aillumanta yupashcacunaca, 46.500mi carca.

²² Simeonpaj huahua huahuacunatapish cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

²³ Simeonpaj aillumanta yupashcacunaca, 59.300mi carca.

²⁴ Gadpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

²⁵ Gadpaj aillumanta yupashcacunaca, 45.650mi carca.

²⁶ Judapaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

²⁷ Judapaj aillumanta yupashcacunaca, 75.600mi carca.

²⁸ Isacarpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

²⁹ Isacarpaj aillumanta yupashcacunaca, 54.400mi carca.

³⁰ Zabulonpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

³¹ Zabulonpaj aillumanta yupashcacunaca, 57.400mi carca.

³² Josepaj churi, Efrainpaj huahua huahuacunatapish cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

³³ Efrainpaj aillumanta yupashcacunaca, 40.500mi carca.

³⁴ Josepaj churi, Manasespaj huahua huahuacunatapish ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

³⁵ Manasés aillumanta yupashcacunaca, 32.200mi carca.

³⁶ Benjaminpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

³⁷ Benjaminpaj aillumanta yupashcacunaca, 35.400mi carca.

³⁸ Danpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

³⁹ Danpaj aillumanta yupashcacunaca, 62.700mi carca.

⁴⁰ Aserpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

⁴¹ Aserpaj aillumanta yupashcacunaca, 41.500mi carca.

⁴² Neftalipaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca.

⁴³ Neftalipaj aillumanta yupashcacunaca, 53.400mi carca.

⁴⁴ Tucui c'aricunatami Moiseshuan, Aaronhuan, Israel aillucunata pushajcunahuan tucushpa quillcarca. Chaicunaca cada aillumanta shuj pushajmi carca.

⁴⁵ Macanacuiman llujshipaj caj israelcunataca, ishqui chunga huatayujmanta huichiman cajcunatami tucuicunata quillcarca.

⁴⁶ Cada familiatami, ch'ican ch'icanta quillcarca. Tucuicunata tandachishpa yupajpica, 603.550mi carca.

Levitacunata imallata ruranacunapi churashcami

⁴⁷ Leví familiacunataca caishuj aillucunahuan tandachishpaca mana quillcarcachu.

⁴⁸ Mandaj Diosmi Moisestaca cashna nishca carca:

⁴⁹ “Levipaj huahua huahuacunallata paicunahuanca ama yupangui. Paicunapaj shuticunatapish caishuj israelcunahuanca ama tandachishpa quillcangui.

⁵⁰ Ashtahuanpish levitacunataca Dioshuan ari ninacushca quillcata huaquichina carpa huasita, chaipi Diospajta ruranapaj imalla charinacunata, chai carpa huasipi tucui imalla tiyajcunatapish ricuchun churangui. Diospaj carpa huasita, chaipi tucui imalla tiyajcunatapish paicunami apajcuna canga. Tucui chaicunata rurashpami Diospajta rurangacuna. Paicunaca Diospaj carpa huasi muyundijpi paicunapaj carpa huasicunata shayachishpa causachuncuna.

⁵¹ Diospaj carpa huasita shujtajman apana tucujpica, levitacuna pascashpa apachun. Diospaj carpa huasita ña maipi shayachina tucujpica, paicuna shayachichun. Manapish levita caj c'uchuyashpaca huañungami.

⁵² Caishuj israelcunapish cada aillu, quiquin aillupuralla paicunapaj carpa huasicunata shayachishpa tiyarichun. Quiquin bandera c'uchupi paicunapaj soldadocuna maipi canpi tiyarichun.

⁵³ Levitacunaca Dioshuan ari ninacushca quillcata huaquichina carpa huasi muyundijpi, paicunapaj carpa huasicunata shayachishpa tiyarichun. Tandanacushca israelcunapaj jahuaman Mandaj Dios p'iñarishca ama shamuchunmi paicunaca chaipi cuidangacuna”.

⁵⁴ Mandaj Dios Moisesta mandashca shinallatajmi, israelcunaca tucuita rurarca.