NEHEMÍAS 9 - Dios Rimashca Shimicunami

Nehemiasca israelcunapaj juchata Diosman huillashcami

¹ Chai quillapajllataj ishqui chunga chuscu punllapimi israelcunaca cañamazuta churarishca, umapipish ñutu allpahuan shitarishca ayunangapaj tandanacurcacuna.

² Israelpaj huahua huahuacunaca chaipi shayacushpaca shujtaj llajtamanta shamushcacunamanta ña ch'icanyashca cashcamantami, paicunapaj juchacunata, paicunapaj ñaupa yayacuna millaita rurashcata Taita Diosman huillarcacuna.

³ Paicuna maipi shayacushcallapitaj shayacujpimi, paicunata Mandaj Taita Diospaj mandashca librota quimsa horasta rezarca. Shujtaj quimsa horastaca paicunapaj juchacunata Mandaj Diosman huillashpami Mandaj Taita Diosta adorarcacuna.

⁴ Chaipica, Jesúa, Bani, Cadmiel, Sebanías, Buni, Serebías, Bani, Quenani shuti levitacunaca caishuj levitacuna shayacushca tarimaman huichiyashpami paicunata Mandaj Taita Diosta caparishpa mañarcacuna.

⁵ Chai q'uipami Jesúa, Cadmiel, Bani, Hasabnías, Serebías, Hodías, Sebanías, Petaías levitacunaca cashna nircacuna: “Jatarichij, cancunata Mandaj Taita Diosta cashna alli nichij. Huiñaimanta huiñaicama caj Dios quiquinpaj sumaj shutitaca alli nishca cachun. Quiquintaca alabacunallamari” nircacunami.

⁶ Chaipimi cashna nirca: “Quiquinllami Mandaj Dios cangui. Jahua pachatapish, quiquinmi rurashcangui. Jahua pachamanta jahuaman caj pachacunatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Cai pachatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Mama cuchatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Tucui chaicunamanca quiquinmi causaita cungui. Jahua pacha angelcunapish quiquintami adorancuna.

⁷ Quiquinmi Mandaj Dios cangui. Abrahamta agllaj Diosmi cangui. Caldeocunapaj Ur llajtamanta llujshichishpami paitaca Abrahamta shutichircangui.

⁸ Paitaca pajtachij shungu cashcatami quiquinca ricushcangui. Paipajca shuj ruranatami ari nishcangui. Cananeocunapaj, heteocunapaj allpatami cusha nircangui. Amorreocunapaj, ferezeocunapaj allpatami cusha nircangui. Jebuseocunapaj, gergeseocunapaj allpatami cusha nircangui. Chai allpacunataca cambaj huahua huahuacunamanmi cusha nircangui. Quiquinpaj shimihuan nishcataca pajtachircanguimi. Cashcata ruraj cashcamantami chashna pajtachircangui.

⁹ Ñucanchij ñaupa yayacunataca Egiptopi llaquita apacujtami ricurcangui. Puca cuchapi paicuna caparishpa mañashcata uyarcanguimi.

¹⁰ Mancharina, pi mana rurai tucuipajta rurashpami Faraontaca llaquichircangui. Paipajta rurajcunatapish chashnallatajmi rurarcangui. Tucui chai llajtapi causajcunatapish chashnallatajmi rurarcangui. Paicuna jatun tucushpa israelcunata yallitaj llaquichishcamantami chashna rurarcangui. Cunan punllapi ricuchij shinallatajmi chai punllapipish quiquinpaj shutitaca jatun cashcata ricuchishcangui.

¹¹ Paicunapaj ñaupajpimi mama cuchatapish chaupircangui. Chaimi chaquishca pambata ch'imbarcacuna. Llaquichingapaj caticujcunataca chai yacuhuanmi tapachircangui. Paicunaca rumi shinami mama cucha ucujman saquirircacuna.

¹² Punllaca suni p'uyuhuanmi ñauparcangui. Tutaca lunyacuj ninahuanmi ñauparcangui. Paicuna maillata rina ñanta achijyachingapajmi chashna rurarcangui.

¹³ Sinaí urcuman uriyamushpami, paicunahuanca jahua pachamanta rimarcangui. Cashcata rurashpa mandachunmi mandashcata curcangui. Maijanman mana tucushpa mandachunmi mandanata curcangui. Chaitataj pajtachichun nishcata pajtachinacunatapish, mandashcacunatapish allicunatami curcangui.

¹⁴ Samana punllatapish cambajlla ch'icanchishca cachunmi mandashcangui. Cambajta ruraj Moisesman quillcachishpami mandashcacunatapish, chaitataj pajtachichun nishcacunatapish, mandashcacunatapish cushcangui.

¹⁵ Yaricaihuan cajpipish, jahua pachamanta micunatami cararcangui. Yacunaihuan cajpipish, peña urcumanta yacuta llujshichishpami curcangui. Ñuca cusha nishca allpaman yaicushpami chai allpataca quiquinpajta ruranguichij nishcanguimi. Chai llajtataca cancunamanmi cusha nishpaca pajtachishatajmi nishcanguimi.

¹⁶ Ashtahuanpish paicunapish ñucanchij ñaupa yayacunapish jatun tucurcacunami. Paipajta ruranataca ch'ahuancuna tucushpami mana rurarcacuna. Quiquin cushca mandashcacunatapish mana uyarcacunachu.

¹⁷ Quiquin Dios paicunapaj, mancharinacunata rurashcatapish mana uyashun nircacunachu, mana yuyarishun nircacunachu. Quiquinpajta ruranatapish ch'ahuanyashpa mana rurashun nircacunachu. Ashtahuanpish c'ariyashpami, cutinllataj huatashca shina cangapaj chai llajtallamantaj tigrangapaj paicunapaj pushajcunata agllanata yuyarircacuna. Quiquinca perdonaj Dios, c'uyaj, llaquij, mana utca p'iñarijmi cangui. Chashna yallitaj c'uyaj cashpami, paicunataca mana shitashcangui.

¹⁸ Fierrota yacuyachishpa bizi diosta rurashpa: Egiptomanta cancunata llujshichimuj diosca caimi nishpa yallitaj quiquinta p'iñachijpipish,

¹⁹ quiquinca yallitaj llaquij cashcamantami, chai shitashca pambapi mana saquishcangui. Ashtahuanpish paicuna rina ñanta pushachunca punllaca suni p'uyumi paicunamantaca mana anchurca. Paicuna rina ñanta achijyachichunca tutaca lunyacuj ninami paicunamantaca mana anchurirca.

²⁰ Yachachingapajpish quiquinpaj alli Espiritutami cacharcangui. Maná shuti micunatapish mana quichurcanguichu. Yacunachijpipish yacuta curcanguimi.

²¹ Shitashca pambapipish chuscu chunga huatacunatami cararcangui. Ima illajta mana charircanguichu. Paicunapaj churanacunapish mana maucayarcachu. Chaquicunapish mana p'unguircachu.

²² Mandanacunatapish, chai llajtapi causajcunatapish paicunapaj maquipimi churashcangui. Chai llajtataca chaupishpa chaupishpami paicunaman cushcangui. Chaimantami jatun mandaj Sehón mandacun Hesbón llajtatapish, jatun mandaj Og mandacun Basán llajtatapish paicuna japishcacuna.

²³ Israelcunataca jahua pacha luzerocunata shinami mirachishcangui. Paicuna mirarijpica paicunapaj ñaupa yayacunaman quiquin cusha nishca llajtapi causachunmi, chai llajtaman pushashcangui.

²⁴ Chashnami Israelcunaca chai llajtaman yaicushpa chai llajtataca paicunapaj cachun japircacuna. Chai llajtapi causaj cananeocunataca paicunapaj ñaupajpimi cumurichircangui. Paicunataca paicunata mandajcunandij israelcuna munashcata rurachunmi, paicunapaj maquipi churashcangui.

²⁵ Muyundij pircayuj pueblocunatapish japircacunami. Alli granota p'ucuj allpacunatapish japircacunami. Huasicunatapish tucui imalla tiyashcacunahuan jundatami japircacuna. Yacupaj tanque rurashcacunatapish, uva chagracunatapish japircacunami. Olivos yuracunatapish, tucui laya micunata p'ucuj yuracunatapish japircacunami. Paicunaca mana nijtami micurcacuna. Fuerzasapacunami tucurcacuna. Mandaj Dios c'uyaj cashcapimi cushicurcacuna.

²⁶ Ashtahuanpish paicunaca Diosta mana cazushpami colerachircacuna. Diostaca c'ariyarcacunami. Dios mandashcacunata saquishpami huashata ricuchircacuna. Diospajman cutirichij nishpa huillaj profetacunatapish huañuchircacunami. Chashnami yallitaj millananacunata rurarcacuna.

²⁷ Chaimi paicunata p'iñajcunapaj maquipi churarcangui. Paicunata p'iñajcunami llaquichircacuna. Chashna llaquichijpi llaquihuan cashpaca, quiquintami caparircacuna. Quiquinca jahua pachamantami uyarcangui. Quiquinca jatunta c'uyaj cashca shinallatajmi cacharichijcunata cacharcangui. Paicunata p'iñajcunapaj maquimanta quishpichingapajmi cacharcangui.

²⁸ Ashtahuanpish sumaj causaipi cashpaca, cutinllataj millaita ruranaman tigrashpami Diospaj ñaupajpi millai tucucurcallacuna. Paicunataca paicunata p'iñajcuna llaquichichun paicunapaj maquipimi saquijlla carcangui. Cutinllataj quiquinpajman tigrarishpa quiquinta caparijpica, quiquinca jahua pachamantami uyarcangui. Quiquinca ima shina c'uyaj cashca shinallatajmi cutin cutin p'iñajcunapaj maquimanta cacharichicurcanguilla.

²⁹ Quiquin cushca mandashcaman tigrachunmi rimarcangui. Ashtahuanpish paicunaca jatun tucushcallahuanmi junda tucurcacuna. Quiquin cushca mandashcacunatapish mana uyarcacunachu. Ashtahuanpish cashcata rurashpa mandachun cushca mandashcatapish p'aquishpami juchallircacuna. Chai mandashcacunaca pajtachijcunamanca causaita cunmi. Ashtahuanpish paicunaca quiquinpajta ruranatapish c'ariyashpa ch'ahuanyashpami mana uyarcacuna.

³⁰ Paicuna chashna rurajpipish achca huatacunatami mana llaquichircangui. Paicuna quiquinpajman tigrarichunca quiquinpaj Espirituhuanmi quiquinpaj profetacunata huillachircangui. Ashtahuanpish paicunaca mana uyarcacunachu. Chaimi chai llajtacunapi causajcunapaj maquipi churarcangui.

³¹ Ashtahuanpish quiquinca yallitaj c'uyaj cashpami, paicunataca mana chingachishcangui. Mana saquishcangui. C'uyaj, llaquij Dios cashcamantami chashna rurashcangui.

³² Ñucanchij Taita Dioslla, jatun Dioslla, tucuita rurai tucuj, manchana Diosmi cangui. Quiquin cusha nishcataca chaitataj pajtachij llaquij Diosmi cangui. Ñucanchij jatun mandajcunapish, llajtata mandajcunapish, curacunapish, profetacunapish ñucanchij ñaupa yayacunapish, can agllashca tucuicunapish Asiria llajtata jatun mandajcuna mandacushca punllamanta cunan punllacama tucui laya llaquita apacujtaca ama mana llaquita apacuj shinata ruraichu.

³³ Quiquinca cashcata ruraj cashpami, ñucanchij ima shina cashca shinallataj ñucanchij jahuaman llaquicunata cachashcangui. Ashtahuanpish ñucanchijmari mana allita rurashcanchij. Quiquinca imata mana pandata rurashcanguichu.

³⁴ Ñucanchij jatun mandajcunapish, llajtata mandajcunapish, ñucanchij curacunapish, ñucanchij yayacunapish quiquin Dios cushca mandashcata pajtachinapica mana yuyaita churashcacunachu. Quiquin cushca mandashcacunatapish, Dios ima shina cashca shina causachun nishcatapish mana uyashun nircacunachu. Tucui chaicunahuan rimashcatami mana uyashun nircacuna.

³⁵ Paicunamanca mandana llajtacunatapish cushcanguimi. Achca charinacunatapish cushcanguimi. Alli granota p'ucuj yallitaj achca allpacunatapish cushcanguimi. Chai jahuapish quiquinpajtaca mana rurarcacunachu. Paicuna mana allita ruracushcata saquishpa quiquinpajmanca mana cutirishun nircacunachu.

³⁶ Cai llajtataca ñucanchij ñaupa yayacuna chaipi imalla p'ucushca granota micushpa cushicushpa causachunmi cushcangui. Chai llajtallapitajmari cunanca shujtajpajta huatashca shina rurajcuna tucushcanchij.

³⁷ Ñucanchij quiquin allpapi p'ucushca granocunaca ñucanchij juchamanta ñucanchij jahuapi churashca jatun mandajcunapajllamari. Paicunami ñucanchijtapish, ñucanchij animalcunatapish, paicuna munashca shina mandancuna. Chaimanta yallitaj llaquipimari canchij” nircacunami.

Israelcunaca Dios mandashcacunataca pajtachishunmi nishcami

³⁸ Cutin ama chashna tucungapajmi ñucanchijca pajtachingapajtaj ari nishpa shuj quillcata quillcashpa, chaipica ñucanchij llajtata mandajcunapaj, ñucanchij levitacunapaj, ñucanchij curacunapaj firmahuan saquinchij.